1. मेजर सोमनाथ शर्मा

 

मेजर सोमनाथ शर्मा

(3 नवम्बर 1947)

असाँ दा हिमाचल प्रदेश देवभूमि ही नीं वीर भूमि भी है। अज्ज तिकर पूरे भारत च परमवीर चक्र जितणे वाळे इक्की 'सूरमेयाँ च सूरमे' होए जिन्हाँ च चार म्हारे निक्के जेहे हिमाचल प्रदेशे दे हन्न।  

एह् कहाणी आजाद भारत दे पहले परमवीर चक्र जित्तू सूरमे दी है।  कहाणिया दी सुरूआत अक्टूबर सन् 1947 दे सुरूआती दिनाँ ते हौंदी है। भारत-पाकिस्तान बणेह्यो अज्हें मसाँ-मसाँ डिढ़ कि महीना ही हौया था। नॉर्थवेस्ट फ्रंटियर सूबे दे डेरा इस्माइल खान जिले दे पुराणे डिप्टी कमिश्नर दा प्रधानमंत्री जवाहरलाल नेहरू होराँ जो इक स्नेहा मिल्लेया जिस च तिन्हाँ पाकिस्तान ते हथियारबंद आदिवासियों जो पाकिस्तान-कश्मीर सरहदा पर भेजणे दे मंसूबे दे बारे च चेताह्या था। आदिवासियाँ जो हथियार कनै मोटर-गड्डियाँ पाकिस्तान दी सरकारें मुहैया करवाह्यो थे। कश्मीर दे महाराजा हरि सिंह  भारत कन्नै मिलणे दे कागज़ाताँ पर दस्तखत करने तंईं राज़ी नीं थे इस करी नै नेहरू होराँ तिसा ख़बरा पर कोई भी एक्सन लैणे  ताँईं नाँह् करी दित्ती। 

दो हफ्तेयाँ परंत अफरीदी, महसूद, वजीर, स्वाति कनै पाकिस्तानी फ़ौज दे सिपाहियाँ दी इक बड्डी टुकड़ी 'मुफ्ती च' कश्मीर दे अंदर घुसड़ी आई। 22 अक्टूबर दिया राती हमलावराँ मुजफ्फराबाद कस्बे जो अग्ग दे हवाले करी दित्ता।  फिरी तिन्हाँ उरी पर कब्जा करी लिया कनै श्रीनगर ते पंजाह् मील दूर बिजली स्टेशन महुरा जो हथिआई लिया।  श्रीनगर शहर हनेरे च डुब्बी गिया।

तिन्हाँ हलाताँ च सरदार पटेल होराँ दे वफादार साथी वी.पी. मेनन होराँ जम्मू गै कनै कश्मीर जो भारत कन्नै मिलाणे दे कागदाँ पर महाराजा हरि सिंह दे दस्तखत करुआई लै। तिस ते परंत सैह् भारत दे गवर्नर जनरल लॉर्ड माउंटबेटन दी सदारत च कश्मीर दे बारे च हौणे वाळी ऐतिहासिक बैठका च हिस्सा लैणे ताँईं दिल्ली मुड़ी आए।  तिसा बैठका च सामल हौणे वाले सैम मानेकशॉ नाँ दे इक जुआन कर्नल (बाद च फील्ड मार्शल) होराँ बैठका च हौणे वाळी गल्ल-बात दा जिक्र करदेयाँ ग्लाया था, "म्हेसा साँह्ईं नेहरू होराँ यू.एन.ओ, रूस, अफ्रीका, सर्वशक्तिमान भगुआन, सब्भ दे बारे च गल्ल करदे रैह्, जाह्लू तिकर सरदार पटेल होराँ गुस्सें नीं होई गै।  तिन्हाँ पुच्छेया, 'जवाहर लाल तुसाँ कश्मीर लैणा चाँह्दे हन्न कि देणा चाँह्दे हन्न?'  नेहरू होराँ जवाब दित्ता, 'बेशक, मिंजो कश्मीर चाहीदा।'  तिस पर पटेल होराँ बोल्ले, 'मेहरवानी करी नै अपणे ऑर्डर दिया।"  फिरी सब्भ किच्छ बड्डिया तेजिया कन्नै अग्गें बद्धेया।

अगलिया भ्यागा तड़कैं भारत दी फौज दी पहली टुकड़ी  दिल्ली हौआई अड्डे ते श्रीनगर बक्खी उड्डी गई।  इक नौजुआन मेजर भी कश्मीर च अपणी पहली अपॉइंटमेंट पर गै।  तिन्हाँ पर कश्मीर च जाणे वाळियाँ फ़ौजाँ जो रसद दा इंतजाम करने दी जिम्मेदारी थी।  तिन्हाँ दा नाँ था एस.के. सिन्हा।  बाद च सैह् लेफ्टिनेंट जनरल दे रैंक ते रटैर होए कनै जम्मू-कश्मीर दे गवर्नर भी रैहे थे। 

लेफ्टिनेंट जनरल एस.के. सिन्हा होराँ अपणी किताब 'अ सोल्जर रिकॉलस' च लिक्खेया,  "...मैं श्रीनगर हौआई अड्डे पर 4 कुमाऊं दे इक पराणे दोस्त मेजर सोमनाथ शर्मा नै मिल्लेया जिन्हाँ जो मैं दो दिन पहलैं तिन्हाँ दिया कंपणिया समेत दिल्ली ते विदा कित्तेह्या था।  सोम पराणे दोस्त थे।  तिन्हाँ दे खब्बे हत्थ च प्लस्तर लग्गेह्या था कनै सैह् थोड़ा दुआस लग्गा दे थे। तिन्हाँ मिंजो दस्सेया कि तिन्हाँ दे हत्थ च पलस्तर हौणे दिया बजह ते तिन्हाँ दी कंपणी जो एक्टिव रोल नीं मिल्लेह्या था। तिन्हाँ जो हौआई अड्डे दे आसपास दी फ्हाजत ताँईं लगाया गिह्या था कनै जुआनाँ जो जहाजाँ ते समान तुआरने च हत्थ बंडाणा पौआ दा था। मैं सोम जो, दित्तेह्यो कम्म दा महत्व समझाणे दी कोसस कित्ती।  तिन्हाँ ग्लाया था कि सैह् हवाई अड्डे च अटके रैह्णे दे बजाय पट्टन जाणा पसंद करदे थे।  मैं तिन्हाँ जो दस्सेया कि देहियाँ खबराँ हन्न कि दुस्मण पट्टन दे डिफेंस जो लंघी करी दक्खण-पच्छम ते हौआई अड्डे दे पासैं बद्धा दा है।  मैं तिन्हाँ जो एह् भी दस्सेया कि दुस्मण जो हराणे ताँईं हौआई अड्डे जो असाँ दिया फ्हाजता च हौणा कितणा जरूरी है। मिंजो डर है कि मेरियाँ सारियाँ गल्लाँ दा  सोम पर घट ही असर पिया सैह् अपणे जो मिल्लेह्यो रोल ते नाराज़ रैहे। मैं तैह्डी दिल्ली वापस जाणे वाळी खीरी फ्लाइट पकड़णे दिया निहाळा च करीब इक घंटे तिकर तिन्हाँ सौगी था। ताह्लू मिंजो इसा गल्ला दा अंदाजा नीं था कि अगले अठताळियाँ घंटेयाँ च सोम श्रीनगर दे हौआई अड्डे दी फ्हाजत ताँईं इक अहम् लड़ाई च बहादुरी कन्नै लड़दे-लड़दे सहीद हौणे वाळे थे।"

मेजर सोम नाथ शर्मा होराँ दा जन्म 31 जनवरी सन् 1923 जो हौया था।  हिमाचल प्रदेश दे जिला काँगड़ा दे डाढ़ नाँ दे ग्राँ दा रैह्णे वाळा तिन्हाँ दा परुआर सही मायन्याँ च इक फ़ौजी परुआर था।  तिन्हाँ दे बापू मेजर जनरल अमरनाथ शर्मा फ़ौज च डॉक्टर थे।  सैह् डायरेक्टर जनरल, आर्मी मेडिकल सर्विसेज दे औह्दे ते रैटर हौए थे। तिन्हाँ दे भाऊ जनरल विश्वानाथ शर्मा आर्मी चीफ (1988-90) दे औह्दे ते रटैर हौए कनै लेफ्टिनेंट जनरल सुरेन्द्रनाथ शर्मा, इंजीनियर-इन-चीफ दे तौर पर कनै तिन्हाँ दी बैह्ण मेजर कमला तिवारी आर्मी मेडिकल कोर ते रटैर होए।

मेजर सोमनाथ शर्मा होराँ दी मुढ़ळी स्कूली पढ़ाई, जित्थू-जित्थू तिन्हाँ दे बापू होराँ दी पोस्टिंग हौंदी गई तित्थू-तित्थू लग्ग-लग्ग जगहाँ च हौंदी रही। तिस ते परंत सैह् शेरवुड कॉलेज, नैनीताल च दाखल हौए। रॉयल मिलिट्री एकेडमी जॉइन करने ते पहलैं सैह प्रिंस ऑफ वेल्स रॉयल मिलिट्री कॉलेज, देहरादून च भी पढ़े।  मेजर सोमनाथ बचपण ते ही खेल कूद कनै ऐथलेटिक्स च रुचि रखदे थे। 

तिन्हाँ दे दोस्त कनै परुआर वाळे तिन्हाँ जो 'सोम' करी नै बुलाँदे थे।  वचपण च सोम अपणा ज़्यादातर बग्त श्रीनगर च अपणे नानू पंडत दौलत राम होराँ सौगी गुजारदे थे। जाह्लू तिन्हाँ दे नानू होराँ भगवद् गीता दा पाठ करदे, सैह् तिन्हाँ बक्खें बैठी करी, श्री कृष्ण भगुआन दियाँ अर्जुन जो दित्तियाँ नसीहताँ जो कन्न कनै मन लगाई करी सुणदे।  तिन्हाँ नसीहताँ दा असर तिन्हाँ पर खीरी साह तिकर रैह्णे वाळा था।

जाह्लू सैह् नौजुआन लेफ्टिनेंट बणी करी रॉयल मिलिट्री एकेडमी ते निकळे, तिन्हाँ अप्पू ताँईं ब्रिटिश इंडियन आर्मी दी 8/19 हैदराबाद इन्फैंट्री जो चुणेया जेह्डी बाद च  इंडियन आर्मी दी कुमाऊं रेजीमेंट दी चौथी बटालियन बणी।  तिन्हाँ दे  मामा कैप्टन कृष्ण दत्त वासुदेव, तिसा ही रेजिमेंटा दे थे।  सैह् जापानियाँ दे खलाफ मलाया च स्लिम दरिया पर बणे इक पुल दी फ्हाजत करदे हौए मारे गै थे। तिन्हाँ बड़ी बहादुरिया कन्नै अपणे कई सौ जुआनाँ दा सही-सलामत पार जाणा मुमकिण बणाया था।  तिन्हाँ दे मामा होराँ दे तिस बहादुरी दै कारनामें तिन्हाँ पर बड़ा डुग्घा असर पाया था।

मेजर सोम नाथ शर्मा होराँ दूजी आलमी जंग च ब्रिटिश फ़ौज दे अफसर दे तौर पर बर्मा च, इक मात्र हिंदोस्तानी ब्रिगेड कमांडर कर्नल के.एस. थिम्मैया (बाद च आर्मी चीफ) होराँ दे अंडर लड़े थे। तिस जंग दा इक बाक्या  नौजुआन अफसर सोमनाथ शर्मा होराँ दे चरित्र पर बखूबी लौ पाँदा है। 

इक दिन शर्मा  होराँ दे अर्दली, जिन्हाँ दा नाँ  बहादुर था, इक फ़ौजी कार्रवाई च बुरे हालैं जख्मी हौई गै।  सैह् अपणेयाँ पैराँ पर वापस कैंप तिकर औणे जोगी नीं थे।   शर्मा होराँ बहादुर जो अपणे कंधे पर चुक्की करी चलणा लगी पै।  जाह्लू ब्रिगेड कमांडर थिम्मैया होराँ दिक्खेया कि तिन्हाँ दा स्टाफ अफसर अपणे अर्दली दे बोझे दिया वज़ह ते पिच्छें रही जाह्दा ताँ तिन्हाँ ऑर्डर दित्ता, 'सोम इस आदमी जो छड्डी दे कनै कैंपे बक्खी तौळा चल।' 

सोमनाथ शर्मा होराँ दा जवाब था, 'सर, एह् मेरा ही अर्दली है जिस जो मैं चुक्की चलाह्या। एह् बुरे हालैं जख्मी है कनै इस ते खून निकळा दा, मैं इस जो पिच्छें नीं छड़णा है।'  सैह् आखीर च अपणे आपे जो बचाणे कनै बहादुर जो सही-सलामत बापस लाणे च कामयाब रैहे थे। ‌हौंसले दे इस कम्म ताँईं तिन्हाँ जो 'मेंशन इन डिस्पैच' मिल्लेया था।

सितंबर सन् 1945 च कुआलालंपुर च जापानियाँ दी हार कनै आत्मसमर्पण दे परंत सोम नाथ शर्मा होराँ मलाया ते कलकत्ता हौंदे हौए बापस आए। जहाज ते उतरनें ते पहलैं, इक छोटी देही घटणा घटी जाह्लू ब्रिटिश फ़ौज दी पुलिस प्रतिबंधित सामग्री दी जाँच ताँईं  जहाज पर सुआर हौई। शर्मा होराँ व्ह्ली इक समुराई तलुआर, जेह्डी सारे अफसराँ जो मिल्लिह्यो थी,  दे इलावा इक जपानी अफसरे दी दित्तिह्यो गैर-कनूनी पिस्तौल थी।  शर्मा होराँ ब्रिटिश अफसर जो झाँसा देणे ताँईं कोई कहाणी नीं घड़ी।  तिन्हाँ सैह् पिस्तौल तरंत संमुदरे च सटी दित्ती।  इतणे सिद्धे-सादे थे मेजर सोमनाथ शर्मा।

सन् 1947 जो भारत आजाद हौया अपर पागलपण भरेयाँ मज़हबी दंगेयाँ दा सिकार हौईं गिया।  मेजर शर्मा होराँ कनै तिन्हाँ दे जुआनाँ जो दिल्ली च दंगे फसाद रोकणे ताँईं सिविल अमले दी मदत करने दी जिम्मेदारी दित्ती गई।  तिन्हाँ सैह जिम्मेदारी इमानदारिया कन्नै निष्पक्ष हौई नै निभाई। तिस बग्त सैह् आरकणिया ते लई करी मौने तिकर प्लस्तर चढ़िया अपणिया खबिया बाँही लई करी इक्की जगह ते दूजिया जगह घुमदे रैहे थे।  तिन्हाँ जो सैह् चोट हॉकी दे मैदान च  खेलदे बग्त लग्गिह्यो थी।

जाह्लू तिंन्हाँ दी बटालियन जो श्रीनगर जाणे ताँईं हुक्म हौया तिस बग्त मेजर शर्मा होराँ एक्टिव डियूटी ताँईं मेडिकली अनफिट थे।  तिन्हाँ श्रीनगर जाई करी अपणी कंपणी जो लीड करने ताँईं हठ कित्ता।  आख़िर तिन्हाँ जो जाणे दी इजाज़त मिली गई।

श्रीनगर जाणे ते पहलैं तिन्हाँ दिल्ली दे क्वीन विक्टोरिया रोड बैचलर ऑफिसर्स मेस च, अपणे इक पक्के दोस्त कनै बर्मा दिया लड़ाईया दे साथी, मेजर के.के. तिवारी हौराँ कन्नै दिल्लिया च अपणी आखरी रात गुजारी।  दोह्यो दोस्त राती देरिया तिकर गप्पाँ मारदे रैहे। गल्लाँ करदे-करदे सोम होराँ जाह्लू अपणे दोस्त जो दस्सेया कि सैह् दोबारा फिरी लड़ाइया च जाह्दे अपर इसा बारिया किह्ले अपणे दोस्ते बगैर। शैद हौणियाँ दा तिन्हाँ जो आभास हौई गिह्या था, तिन्हाँ मेजर तिवारी होराँ ते यादास्त दी इक नशाणी मंगी। तिवारी होराँ तिन्हाँ जो ग्लाया कि कमरे च रक्खियाँ चीजाँ च  तिन्हाँ जो जेह्डी भी खरी लगे सैह् लई सकदे। सोम होराँ तिन्हाँ दिया अलमारिया ते इक ओटोमेटिक जर्मन लूगर पिस्तौल कढ़ी लई।  मेजर तिवारी होराँ परेसान होई गै पर तिन्हाँ व्ह्ली अपणे बायदे जो नभाणे दे इलावा होर कोई चारा भी नीं था।

मेजर सोमनाथ शर्मा होराँ दी कंपणी 31 अक्तूबर सन् 1947 दे ध्याडें श्रीनगर जो एयरलिफ्ट कित्ती गई। तित्थू तिन्हाँ जो श्रीनगर हौआई अड्डे दी फ्हाजत करने दी जिम्मेदारी मिल्ली। तिस बग्त श्रीनगर हौआई अड्डे जो बचाणा बड़ा जरूरी था। खबराँ औआ दियाँ थियाँ कि कवाइली बड़िया तेजिया कन्नै श्रीनगर पासें अग्गें बद्धा दे हन्न। जेकर श्रीनगर हौआई अड्डा दुस्मणा दे कब्जे च चली जाँदा ताँ फ़ौज कनै रसद जो कश्मीर च पजाणा मुस्कल हौई जाणा था। कश्मीर जो बचाणे ताँईं श्रीनगर हौआई अड्डे जो अपणे कंट्रोल च रखणा जरूरी था। 

शर्मा होराँ अपणिया तिसा डियुटिया ते खुस नीं थे। सैह् अग्गें जाई करी दुस्मणा नै दो-दो हत्थ करना चाँह्दे थे। तिन्हाँ दे मने दी मुराद तौळी ही पूरी हौई गई। 2 नवंबर सन् 1947 दिया भ्यागा हेडकुआटर 161 इन्फेंट्री ब्रिगेड जो इक रपोर्ट मिल्ली कि श्रीनगर दे नेडें बड़गाम नाँ दे ग्राँ च तकरीबन इक हजार कवाइली इकट्ठे हौणे वाळे थे। एक्टिंग ब्रिगेड कमांडर कर्नल हरबख्श सिंह होराँ फैसला कित्ता कि जाह्लू सैह् इकट्ठे हौई जाह्ण तिन्हाँ पर इक साथ हमला कित्ता जाए। मेजर सोमनाथ शर्मा होराँ दी कमांड च तिन्न कंपणियाँ दी इक फोर्स तैयार कित्ती गई जिस च 4 कुमाऊँ दी अल्फा कंपणी, मेजर शर्मा होराँ दी डेल्टा कंपणी कनै इक कंपणी 1 (पैरा) कुमाऊँ दी थी।  सैह् फोर्स 2-3 नवंबर दिया राती, धराता हौणे ते पहलैं, बड़गाम बक्खी कूच करी गई। सैह् हनेरे च, आबादी वाळे इलाक़ेयाँ दे बक्खें-बक्खें हौंदे हौए, 3 नवंबर जो ध्याडा सीरदेयाँ ही, बड़गाम च इक उच्चिया देहिया ठाहरी जाई रैह्। सारे ग्राँ कनै अक्खे-बक्खे दे इलाके जो छाणनें ताँईं पैट्रॉल पार्टियाँ भेजियाँ गइयाँ।  तिन्हाँ पैट्रॉल पार्टियाँ जो,  ग्राँ ते बाहर इक नाळे च बहोत सारे 'कशमीरी रिफ्यूजियाँ' जो छड्डी करी, होर कोई भी नीं मिल्लेया। जिंञा कि कोई अणहोणी नीं हौई जाँ फिरी दुस्मण दा कोई साह्म्णा नीं हौया, दोपहराँ दे दो बजे दे करीब, अल्फा कंपणी कनै पैरा कुमाऊं दी कंपणी जो बापस जाणे कनै मेजर शर्मा होराँ जो, डेल्टा कंपणी सौगी, बड़गाम-श्रीनगर सड़का दे नेड़ें अपणिया जगह डटे रैह्णे  दा हुक्म हौया।

दूंहीं कंपणियाँ दे जाणे ते दो घंटे परंत, संझा दे तकरीबन चार बजे,  मेजर शर्मा होराँ दी पोजीशन पर थ्री इंच मोर्टार दा फैर औणा लगी पिया।  चंद मिंटाँ परंत एल.एम.जी दे एक्यूरेट फैर दी कवर हेठ तिन्हाँ पर हमला हौई गिया।  'सरीफ कश्मीरी रिफ्युजियाँ' दे भेष च छुपेह्यो कबाइली, ग्राँ दे इर्द-गिर्द इक्कट्ठे हौई गै। तिन्हाँ अपणी-अपणी कश्मीरी फिरन (लबादे) ते हथियार बाहर कड्ढे कनै हमला करी दित्ता।  मेजर शर्मा होराँ दे  जुआनाँ पहला हमला  बेअसर करी दित्ता।  तिस ते परंत इक ते बाद इक हमला हौंदा गिया।  मेजर शर्मा होराँ ब्रिगेड हैडकुआटर ते एयर कनै आर्टिलरी स्पोर्ट मंगी। 13 फील्ड बैट्री दे तोपचियाँ कमाल दा फैर दित्ता कनै  हौआई जहाज भी मदत करना आए अपर बड़ी तादाद च कवाइली मुट्ठी भर कुमाऊंनियाँ पर हावी हौंदे गै। तिस बग्त तकरीबन पंज सौ ते उप्पर कबाइलियाँ दा मुकाबला, शर्मा होराँ दे नब्बैं ते घट जुआन करा दे थे। तिन्हाँ दी नफरी दा अनुपात 7:1 था।

मेजर शर्मा होराँ व्ह्ली एम्युनिशन तेजिया कन्नै मुकदा जाह्दा था।  ब्रिगेड हेडकुआटर नै 1 पंजाब जो तिन्हाँ दिया मदता ताँईं रवाना करी दित्ता।  तिन्हाँ ताँईं एम्युनिशन दा भरेया इक सिविल ट्रक भी भेजी दित्ता। अपर मेजर शर्मा जो पता था तिन्हाँ जो कोई भी मदत बग्त रैंह्देयाँ नी मिली सकदी थी।  सैह् जाणदे थे तिस बग्त श्रीनगर शहर कनै हौआई अड्डे जो सिर्फ सैह् ही बचाई सकदे थे।  तिन्हाँ श्रीनगर ताँईं जान दी वाजी लगाणे कनै जितणी ज्यादा देर तिकर हौई सके दुस्मणा जो रोकणे दा  फैसला करी लिया।  सैह् बहादुरिया कनै मुकाबला करदे रैहे।  इक मोर्च ते दूजे मोर्चे तिकर जाई करी जुआनाँ दा हौंसला बद्धाँदे रैह्। जाह्लू तिन्हाँ दा एल.एम.जी. गनर सहीद हौई गिया सैह् एल.एम.जी. गनर नंबर टू जो एम्युनिशन भरी-भरी मैगजीनाँ दिंदे रैह्।

मेजर सोमनाथ शर्मा होराँ दा ब्रिगेड कमांडर जो रेडियो पर अखीरी स्नेहा था, " दुस्मण असाँ ते सिर्फ पंजाह् गज दूर है। तिन्हाँ दे मुकाबलैं म्हारी नफरी बड़ी घट है। मैं इक इंच  भी पिच्छें नीं हटणा है कनै अखीरी जुआन कनै अखीरी गोळी तिकर लड़दे रैह्णा है।"

जाह्लू सैह् मैगजीना च एम्युनिशन भरा दे थे, दुस्मण दा इक गोळा एम्युनिशन डंप पर आई फट्टेया। मेजर शर्मा वीरगति पाई गै।  तिसा लड़ाइया च मेजर शर्मा होराँ दे इलावा इक जेसीओ बिह् जुआन सहीद कनै छब्बी जुआन जख्मी हौए थे। तिन्हाँ साह्मणे तकरीबन तिन्न सौ पाकिस्तानियाँ दियाँ ल्हासाँ पइह्याँ थियाँ।

मेजर सोमनाथ शर्मा होराँ दे मृत शरीर दी पछाण तिन्हाँ बक्खें बिखरेयो भगवद् गीता दे पन्नेयाँ कनै पिस्तौल दे खाली हॉलस्टर ते होई थी। श्रीनगर कनै कश्मीर जो बचाणे वाळे,  मेजर सोमनाथ शर्मा होराँ जो मरणेपरंत आजाद भारत दा पहला परमवीर चक्र मिल्लेया था।

References―

1.  An article in IDR Blog dated 06 Nov 2020 by Claude Arpi  Blog 'The Soldier who Won India's First Param Vir Chakra'. http://www.indiandefencereview.com/the-soldier-who-won-indias-first-param-vir-chakra/

2.  'A Soldier Recalls' by Lt Gen SK Sinha. 

3.  'Param Vir: Our Heroes in Battle’ by Major General Cardozo.  

4.  An article 'Remembering the Battle for Srinagar' published in the Tribune on 09 Nov 2015 by Capt Amrinder Singh.

भगत राम मंडोत्रा