सूरमेयाँ च सूरमे

  राइफलमैन संजय कुमार (5 जुलाई 1999) जम्मू कश्मीर दी सरहद पर तक़रीबन सबा अठ सौ किलोमीटर लम्मी एलओसी (लाइन ऑफ कंट्रोल) खिंजिह्यो है। एह् एलओसी राजौरी, पुंछ, उड़ी, टिथवाल कारगिल कनै लेह च होंदी होई सियाचिन तिकर जाँदी है।  इसा लाइना ते तकरीबन छे किलोमीटर अंदर भारत दा नेशनल हाईवे गुज़रदा है जेह्डा श्रीनगर, कारगिल, द्रास कनै लेह जो जोड़दा है।  इस एलओसी पर 6000 फुट ते लई करी 17000 फुट तिकर उच्चे पहाड़ हन्न जिन्हाँ पर साल भर च 20 ते 30 फुट तिकर मोटी बर्फ पौंदी है। तिस इलाके च 15000 फुट तिकर डुग्घे खोळे हन्न।  दूरा-दूरा तिकर फैलयो कंडेयाँ वाळे झिंड, संगड़े कनै करड़े रस्ते दिखी दिल दहली जाँदा है।  तित्थु सितम्बर-अक्टूबर च टेम्परेचर ज़ीरो ते थल्लें चली जाँदा है।  दिसम्बर-जनवरी महीने दिया ठंडी दे बारे च ताँ गलाणा ही क्या। कारगिल दा इलाका सामरिक नज़रिए ते बड़ा अहमियत रखदा है।  पाकिस्तान दे कन्नै-कन्नै चीन भी इस गास अपणी नज़र रखदा रिहा है। सन् 1999 दे सुरू च कारगिल च होई पाकिस्तानी घुसपैठ दे दो खास मकसद थे—कारगिल दे जिरिये सियाचिन जो अलग-थलग करी न...