6. कैप्टन गुरबचन सिंह सलारिया

कैप्टन गुरबचन सिंह सलारिया

(5 दिसम्बर 1961)

अज्ज तिकर भारत च इक्की 'सूरमेयाँ च सूरमे' होए, तिन्हाँ च छठे नंबरे पर जेह्डे सूरमा हन्न तिन्हाँ दी बहादुरी दे कारनामे जो जाणने वाळे लोक घट ही हन्न। अपर तिस सूरमे दी पळटण तिस्सेयो कदी भी नीं भुलदी। भारत दी फ़ौज भी तिस्सेयो कई मौकेयाँ पर याद करदी रैंह्दी है।  6 सितंबर सन् 2019 जो, तदकणे थलसेनाध्यक्ष जनरल बिपिन रावत होराँ, तिस सूरमे दे इक्यासियां सालां दे बमार छोटे भाऊए कनै तिसदे परुआरे कन्नै मिलणे ताँईं पठानकोट आए।  तिन्हाँ सारेयाँ कन्नै गल्ल-बात कित्ती कनै हाल-चाल जाणेया। थलसेनाध्यक्ष होराँ तिन्हाँ सारेयाँ दा, फ़ौज कनै देस दिया तरफा ते, तिस सूरमे दे सब्भते उच्चे वलिदान ताँईं, शुक्रिया अदा कित्ता था।    

सैह् सूरमा थे, भारत दियाँ सरहदाँ ते हजाराँ किलोमीटर दूर, अपणा फर्ज़ निभांदिया बेला, दुनिया जो अपणी नौखी बहादुरी दसणे वाळे भारत माता दे सपूत कैप्टन गुरबचन सिंह सलारिया।  तिन्हाँ दे बारे च दो गल्लाँ खास हन्न — पहली एह् कि सैह् परमवीर चक्र पाणे वाळे नेशनल डिफेंस अकैडमी ते निकळेयो पहले फ़ौजी अफ़सर हन्न कनै दूजी एह् कि अपणे देस ते बाहर जाई करी परमवीर चक्र जित्तणे वाळे भी सैह् पहले अफ़सर हन्न।

30 जून 1960 जो काँगो बेल्जियम ते आजाद होया था।  चुनाओ ते बाद प्रधानमंत्री पैट्रिस लुमुम्बा दी सरकार बणी गई।  अपर किच्छ दिनाँ परंत काँगो दिया फौजा च बलवा होई गिया कनै गोरे कालेयाँ दी अप्पु च मार-धाड़ मच्ची गई। मोइज़ त्सोम्बे नाँएं दे इक अलगाववादी लीडर दी अगुआई च काँगो दा कटंगा राज्य लग्ग होई बैठा। बेल्जियम दी सरकार अपणी फौजाँ कनै हथियाराँ नै इस अलगाओवादी लीडर दी मदद करदी रही। काँगो दी 60% कुदरती दौलत कटंगा च ही पाई जाँदी थी। बेल्जियम दियाँ कंपणियाँ एत्थू दियाँ खानाँ ते कच्चा माल निकाळी करी अपणे देस लई जाँदियाँ थियाँ।   

प्रधानमंत्री पैट्रिस लुमुम्बा दे अपील करने पर यू.एन. सुरक्षा परिषद नै 13 जुलाई सन् 1960 जो इक मसौदा पास कित्ता जिसदे मुताबिक बेल्जियम जो काँगो ते अपणियाँ फ़ौजाँ टहाई लैणियाँ थियाँ कनै यू एन जो काँगो सरकार दी मदद करनी थी। इस मसौदे पर तिस बग्त दी दुनिया दियाँ दोह्यो बड्डियाँ ताकताँ राजी थियाँ अपर होया एह् कि यू एन फ़ौजाँ अलगाववादी ताकताँ जो काबू पाणे च कामयाव नीं होई सकियाँ।  अगस्त महीने दे अद्ध च लुमुम्बा नै सोवियत यूनियन जो दो-बक्खी मदद करने दी अपील करी दित्ती। इस तरहाँ काँगो दूंहीं बड्डियाँ ताकताँ दे सर्द जंग च सामल होई गिया।

लुमुम्बा दा झुकाब सोवियत यूनियन पासें होणे दिया बजह ते तिन्हां जो हर हाल च टाह्णा अमरीका कनै ब्रिटेन दा मकसद बणी गिया।  5 सितम्बर  सन् 1960 दे दिन काँगो दे राष्ट्रपति जोसेफ कासावुबू नै प्रधानमंत्री लुमुम्बा जो उन्हां दे औद्धे ते टहाई दित्ता कनै काँगो दी बागडोर कर्नल जोसेफ डिजाइर मोबुतु दे हत्थाँ च देई दित्ती।  काँगो च फौजी राज आई गिया। चार महीने बाद लुमुम्बा जो कत्ल करी दित्ता गिया।

तिस बग्त दे भारत दे प्रधानमंत्री जवाहर लाल नेहरू होराँ लुमुम्बा दे कत्ल जो इक घिनौणे अंतर्राष्ट्रीय अपराधे  दा नाँ दित्ता। तिन्हाँ यू.एन. सेक्रेटी जनरल हैमरशोल्ड होराँ जो इस मामले च सख्त कदम उठाणे दी सलाह दित्ती।  21 फरवरी सन् 1961 जो यू एन सुरक्षा परिषद नै दूजा मसौदा पास कित्ता। जिसदे तहत नेहरू होराँ भारत दी फ़ौज दा इक ब्रिगेड काँगो भेजणे दी हामी भरी लई। ये गल्ल काँगो दे राष्ट्रपति कासावुबू कनै फौजी हुक्मरान कर्नल मोबुतु जो भली नीं लग्गी।

सन् 1961 दे मार्च ते लई करी जून महीने तिकर भारत दी फ़ौज दा 99 इन्फेंट्री ब्रिगेड हौआई कनै संमुद्री रस्ते च होई करी काँगो जाई रिहा। तिस ब्रिगेड च कैप्टन गुरबचन सिंह सलारिया होराँ दी फर्स्ट गोरखा राइफल्स दी तीजी बटालियन भी सामल थी।

कैप्टन गुरबचन सिंह सलारिया होराँ दा जन्म 29 नवंबर सन् 1935 च यूनाइटेड पंजाब दे शक्करगढ़ दे नेडें  जंवाल नाँ दे ग्राँ च श्री मुन्शी राम कनै श्रीमती धन देवी दे घर होया था। आजादी कनै बंटवारे दे परंत एह् जगह पाकिस्तान दे हेस्से च चली गई।  सलारिया परुआर भारत दे पंजाब दे जिला गुरदासपुर दे ग्राँ  जाँगल च आई बस्सेया था।  सलारिया होराँ सन् 1946 च मसहूर किंग जॉर्ज रॉयल इंडियन मिलिट्री कॉलेज,  बंगलोर च दाखल होए।  बाद च किंग जॉर्ज रॉयल इंडियन मिलिट्री कॉलेज, जालंधर (अज्जकणे राष्ट्रीय मिलिट्री स्कूल, चैल, हिमाचल प्रदेश) च आई गै।  तिस दे परंत तिन्हाँ नेशनल डिफेंस अकैडमी दे नौंमें बैच च दाखिला लिया।  सन् 1954 च सलारिया होराँ मसहूर, बहादुर कनै नड़र तीजी गोरखा राइफल्स रेजीमेंट दी दूजी बटालियन च कमीशंड अफसर बणी करी सामल होए।  सन् 1960 च तिन्हाँ जो फर्स्ट गोरखा राइफल्स दी तीजी बटालियन च बदली होणे दे हुक्म होया।

काँगो च शाँति बणाई रखणे ताँईं भेजियाँ फ़ौजाँ तित्थू बुरे हालें उलझी गइयाँ थियाँ। यूनाइटेड नेशन्स दियाँ फ़ौजाँ कटंगा दे जेंडरमेरी पर काबू पाणे ताँईं मते सारे ऑपेरशन चलाए अपर तिन्हाँ पर पूरी तरहाँ काबू नीं पाया जाई सक्केया।  जेंडरमेरी कटंगा दा गैर-मान्यता वाळा इक अद्ध-फ़ौजी बल था।  

2 दिसम्बर सन् 1961 जो कैप्टन सलारिया होराँ जो, अल्फा कंपणी दी इक पलाटून लई करी, एलिजाबेथविले दे रिफ्यूजी कैम्प दी फ्हाज़त दी जिम्मेदारी निभाणे दा हुक्म होया।  तिन्हाँ ही दिनाँ च जेंडरमेरी दे किछ लड़ाके शराव पी करी शाँति सेना दे जुआनाँ कन्नै उळझी पै।  अच्छा-खासा बलवा होई गिया।  गोळियाँ चलियाँ पर कोई जख्मी नीं होया। अपर इसदा नतीजा एह् होया कि नेड़े दी जेंडरमेरी छाउणी दे लड़ाकेयाँ तित्थू रोड ब्लॉक खड़ा करी दित्ता कनै सैह् उल्कपात कमाणा लगी पै।  तिन्हाँ  यू.एन. दे 14 कार-कारिंदे अगवा करी लै। इस ते पहलैं, तिन्हाँ नवम्बर महीनें भी यूनाइटेड नेशन्स दे दो औद्धेदाराँ जो अगवा करी लिह्या था।तिन्हाँ औद्धेदाराँ जो छुड़ाणे दी जिम्मेदारी नभाँदेयाँ,  3/1 गोरखा राइफल्स दे मेजर अजीत होराँ कनै तिन्हाँ दे डरैवर जो भी तिन्हाँ धोखे कन्नै अगवा करी नै मारी दित्तेह्या था।

5 दिसम्बर सन् 1961 दी भ्यागा दे नौ बजणा लग्गेयो थे।   कैप्टन सलारिया होराँ एलिजाबेथविले दे रिफ्यूजी कैम्प दी फ्हाज़त दी जिम्मेदारी निभाणे च बिजी थे। ताह्लू  तिन्हाँ जो बटालियन हेडकुआटर ते बटालियन एडजुटेंट मेजर (बाद च मेजर जनरल) आर.पी. सिंह होराँ दा स्नेहा मिल्ला।  तिन्हाँ जो अल्फा कंपणी दी इक पलाटून लई करी हौआई अड्डे जो जाँदिया सड़का पर पौणे वाळे इक चौपाटे (चौराहे) पर जेंडरमेरी लड़ाकेयाँ दे लग्गाहेयो रोड़ ब्लॉक जो टाह्णा था।  एह् कम्म तिन्हाँ जो सताबी ते सताबी करना था ताकि यू एन फ़ौजाँ दी लाइफलाइन एयरपोर्ट रोड़ जो चालू रक्खेया जाई सके। इस रोड़ ते होई करी यू एन दियाँ फ़ौजाँ जो रासन पाणी, हथियार कनै गोळा-बारूद ही नीं औंदा था बल्कि जख्मियाँ कनै सहीदाँ जो बाहर भी भेज्या जाँदा था।  कैप्टन सलारिया होराँ जो जेंडरमेरी दे पिच्छें हटणे दे रस्ते जो बंद करदे होयाँ तिन्हाँ पर रस्ते दे अद्ध गब्भें चाणचक हमला करना था।

तकरीबन साढ़े ग्यारह बजे सलारिया होराँ बटालियन एडजुटेंट जो रिपोर्ट दित्ती कि सैह् अगलेयाँ बिह्याँ मिंटाँ च कैंप ते निकळने वाळे हन्न।  फिरी तिन्हाँ कन्नै कांटेक्ट नीं होई पाया अपर इक घंटे दे परंत सलारिया होराँ रेडियो पर एडजुटेंट होराँ जो स्नेहा भेज्या कि सैह् दुस्मणा दी एम्बुश च घिरी गैह्यो कनै तिन्हाँ गास चोंह पासेयाँ ते घणा मसीन गन फैर औआ दा था।  तिन्हाँ एह् भी दस्सेया कि तिन्हाँ दे जुआन दुस्मणां जो तगड़ा जवाब देया दे थे कनै तिस बग्त तिकर तिन्हाँ अपणे रॉकेट लॉन्चर कन्नै दुश्मणां दियाँ दो बख्तरबंद गड़ियाँ तबाह करी दित्तियाँ थियाँ।  सलारिया होराँ कन्नै तिस बग्त सोलह गोरखा जुआन थे।

मेजर जनरल (रटैर) आर. पी. सिंह होराँ रचना बिष्ट रावत जो दस्सेया था कि सलारिया दिया उआजा च जोश था।  लग्गा दा था कि सैह् तिन्हाँ घड़ियाँ दी ही निहाळ करा दे थे। जेह्डा सैह् अग्गें करने वाळे थे, तिस जो करने ताँईं, तिन्हाँ जो अप्पू पर पूरा भरोसा था।  जाह्लू बटालियन हेडकुआटर च बैठेह्यो आर.पी. सिंह होराँ तिन्हाँ जो खबरदार कित्ता था कि अगला कदम चुकणे ते पहलैं हालाताँ दा खरा कि जायजा लेई लैन्यों ताँ सलारिया होराँ दा जवाब आया था, "मैं अटैक करना चल्लेया। मिंजो अपणी जित्त दा फक्का विसुआस है।" बटालियन एडजुटेंट कन्नै गल्लबात च एह् तिन्हाँ दे खीरी बोल थे।  मेजर जनरल (रटैर) आर. पी. सिंह होराँ रचना बिष्ट रावत जो अग्गें दस्सेया था, "जेह्डा तिन्हां कित्ता तिसजो करने तांईं निह्रे नंगे हौंसले दी जरूरत हौंदी है।  अपणे रेडियो सेट कनै ऑपरेटर जो पिच्छें छड्डी करी, तिन्हां खुद अग्गें होई, मुट्ठी भर गोरखेयां जो कन्नै लई नै, दिन दे परगड़े च धावा बोली दित्ता था।" 

कैप्टन सलारिया कनै तिन्हाँ दे जुआनाँ अपणियाँ- अपणियाँ खुखरियाँ अपणे दंदाँ च जिक्किह्याँ थियाँ। तिन्हाँ दे हत्थाँ च .303 रैफळाॅऺ थियाँ, जिन्हाँ पर बैनट चढ़ेह्यो थे। सैह् सारे "जय महाकाली आयो गोरखाली" दा नारा लगाई करी दुस्मणा गास चढ़ी गै थे। तिस बग्त तिन्हां साह्म्णे आटोमैटिक हथियाराँ नै लैस दो बख़्तरबंद गड्डियाँ कनै तकरीबन नब्बें जेंडरमेरी लड़ाके मोर्चेयाँ च कनै उजड़ेयो घराँ दियाँ छत्ताँ पर डट्टेयो थे।

सलारिया होराँ दे दिल कनै दिमागे च मेजर अजीत कनै तिन्हाँ दे डरैवर जो घोखे नै मौत दे घाट तुआरने वाळे निर्दयी खूंखार जेंडरमेरियाँ  जो सजा देणे दा ख्याल था।  सैह् इक योगिक वारियर दा रूप धारी करी जेंडरमेरियाँ पर कहर बणी नै टुटी पै थे। तिन्हाँ जो अपणी सलामती दी रति भी परुआह नीं थी। खुखरियाँ दी चमक कनै मार दिक्खी जेंडरमेरी भौंचक रही गै। तिन्हाँ तिस क़िस्म दा हथियार पहलैं दिक्खेह्या ही नीं था। खुखरियाँ कनै बैनटाँ दी खच-खच दी उआज, कटोइयाँ गर्दनाँ ते निकळदे खूने दे फुहारे…पेटाँ ते बाहर निकळिह्याँ आँदराँ….दूर बर्बाद जळदियाँ दो बख़्तरबंद गड्डियाँ ते निकळदे धूंएं दे ग़ुबार…..बड़ा डरौणा मंजर था।  तक़रीबन चाळी जेंडरमेरी मारे गै। कैप्टन सलारिया होराँ दा सैह् रूप दिक्खी करी जेंडरमेरियाँ दे पैर पटोई गै कनै  सैह् तित्तर-बित्तर होई नै नह्स्सणा लगी पै थे। 

सलारिया होराँ जो नह्स्दे जेंडरमेरियाँ दिक्खी किच्छ तसल्ली होई।  तिन्हाँ इक होर जेंडरमेरी गुरीले जो अपणिया खुखरिया नै मारी सट्टेया।  ताह्लू चाणचक दुस्मण दी इक मशीनगन दा बर्स्ट तिन्हाँ दिया क्याड़िया पर आई बज्जेया।  तिन्हाँ दी रैफळ कनै खुखरी छुटी करी थल्लैं पई गै।  भारत माता दे सपूत कैप्टन गुरबचन सिंह सलारिया अपणा फर्ज़ नभाँदे सहीद होई गै थे।  तिन्हां जो मरणे परंत परमवीर चक्र कन्नै नवाजेया गिया था।

कई साल पहलैं जाह्लू सलारिया होराँ गोरखा राइफल्स च सामल होए थे ताँ तिन्हाँ जो दस्सेया गिया था कि गोरखा राइफल्स दा मोटो है, "कफर हुनु भंडा मरनू" मतलब डरपोकाँ साँह्ईं जीणे ते बद्धिया है मरना।

कैप्टन गुरबचन सिंह सलारिया होराँ इस मोटो पर खरे उतरे थे।

(References ― The Brave - Paramvir Chakra stories by Rachna Bisht Rawat, Paramvir Chakra citation of Capt Gurbachan Singh Salaria, Govt of Punjab web site― https://pathankot.nic.in/important-personality/  )