19. ग्रेनेडियर योगेंद्र सिंह यादव

ग्रेनेडियर योगेंद्र सिंह यादव

(04 जुलाई 1999)

कारगिल दे जंग दे बग्त 'टाइगर हिल' पर कब्जा करने दे बारे च लिक्खेयो अपणे इक लेख च  तदकणे आर्मी चीफ ऑफ स्टाफ जनरल वेद प्रकाश मलिक होराँ दा एह् मनणा है कि "इक जंग फ़ौजाँ कनै तिन्हाँ दे सिपाहियाँ ताँईं असली इम्तिहान हौंदा है।  जंग च जित्त इस तंइएं मिलदी कैंह् कि लड़ाइयाँ जित्तियाँ जाँदियाँ हन्न। सैह् सिपाहियाँ दी फ़ौजी चतराई, भाईचारा, रेजीमेंटल भावना, सब्भते उप्पर इच्छा शक्ति कनै संकल्प हन्न जेह्डे हर जंग दे अंत च जित्त तय करदे हन्न"।   

भारत दी फ़ौज च लड़ाइयाँ जित्तणे दे गुणा दी घाट नीं।  तिन्हाँ कारगिल दी मुस्कल जंग जो जित्ती करी एह् साबित करी दित्ता था।  जनरल वेद प्रकाश मलिक होराँ दे मुताबिक, "कारगिल दे जंग च दो मोड़ आए : तोलोलिंग पर कब्जा जिन्नी 'टर्न इन द टाइड' सुरू कित्ता कनै टाइगर हिल पर कब्जा जेह्डा पाकिस्तान ताँईं इक जिस्मानी कनै दिमाग़ी झटका था कनै असाँ ताँईं इक 'एन्ड इन साइट' था।"

टाइगर हिल द्रास ते उत्तर पासें किच्छ किलोमीटर दूर पौणे वाळे उच्चेयाँ पहाडाँ दे विच बड़िया शाना कन्नै खड़ौतियो 5062 मीटर उच्ची पैनी चोटीदार पहाड़ी है।  एह् पच्छम ते पूर्व दे पासें तकरीबन 2200 मीटर कनै उत्तर ते दक्खण दे पासें तकरीबन 1000 मीटर तिकर पसरियो है।  ज़ोजिला ते कारगिल पासें नेशनल हाईवे 1ए पर गड्डियाँ च गुजरने वाळे इसजो दिक्खे बगैर जाँ इसदी तारीफ़ कित्ते बगैर नीं रही सकदे। कारगिल दी जंग दे दौरान फ़ोटो जर्नलिस्टाँ ताँईं एह् लड़ाई दियाँ मनचाहियाँ छैळ तस्वीराँ पेश करदी रही।  टाइगर हिल दिक्खणे जो ताँ बाँकी है पर चढ़णे ताँईं बड़ी करड़ी है। तिस बग्त एह् भारत च हर कुसी ताँईं कारगिल जंग दा प्रतीक बणी गई थी।

टाइगर हिल गास पाकिस्तान दे स्पेशल सर्विस ग्रुप, तोपखाने कनै इंजीनियराँ दी मदता कन्नै तिन्हाँ दी 12 नॉर्दन लाइट इन्फेंट्री दे जुआन कब्जा करी नै बैठेह्यो थे।  द्रास ट्राँजिट कैम्प ते भीमबत तिकर नेशनल हाईवे 1ए कनै लाइन ऑफ कंट्रोल पर मारपोला तिकर जाणे वाळा रोड़ सिद्धा  तिन्हाँ दिया नज़राँ च था।  सैह् अपणे तोपखाने कन्नै गोळाबारी करी नै तिन्हाँ सड़काँ पर गड्डियाँ दे औणे-जाणे च रुकावटाँ पाई सकदे थे।  भारत दी फ़ौज जो शुरू ते ही इसा गल्ला दा पता था कि जाह्लू तिकर टाइगर हिल कनै पॉइंट 4875, जेह्डा तिस ते दो किलोमीटर दच्छण-पच्छम पासें है, अपणे कब्जे नीं औंदे ताह्लू तिकर नेशनल हाईवे 1ए दा इस्तेमाल सेफ नीं है। टाइगर हिल पर कब्जा करने ताँईं हमला करना इक बड़ा मुस्कल कम्म था। दुस्मण बड़िया उच्चाइया पर निह्गे-पिड्डे होई करी बैठह्यो थे। 

मई सन् 1999 दे दूजें हप्ता चल्लेह्या था। 8 सिख, जेह्डी उधमपुर ते कश्मीर घाटी च औआ दी थी,  जो द्रास पासें मोड़ी दित्ता गिया। द्रास पौंह्चदेयाँ ही, ब्रिगेड कमाँडरें,  युनिट जो बगैर अक्लाइमटाइज़ेशन कनै ठंड ते बचणे ताँईं ज़रूरी कपड़ेयाँ ते, टाइगर हिल जो वापस लैणे दा कम्म देई दित्ता। युनिट जो अपणे टारगेट दे नेडें पौंह्चणे ताँईं मतियाँ सारियाँ जानीं गुआणा पइयाँ। तिस दे परंत युनिट जो टाइगर हिल दे दक्खण-पूर्वी हिस्से च कनै उत्तर दे पासें 'परियों का तालाब' नाँ दे इलाके च उच्चियाँ चोटियाँ पर कब्जा करने दा हुक्म दित्ता गिया।  अगले छे हप्तेयाँ तिकर, जाह्लू तिकर रस्ते नीं साफ करी लै कनै पूरी तियारी नीं होई गई, भारत दिएं फ़ौजें टाइगर हिल पर कब्जा करने दी कोई कोसस नीं कित्ती।

3 कनै 4 जुलाई सन् 1999 दिया बिचलिया राती जो टाइगर हिल पर कब्जा करने दा बग्त मुकर्रर होया। ब्रिगेड कमांडर होरां 18 ग्रेनेडियर्स कनै 8 सिख जो हमला करने दी जिम्मेदारी दित्ती।  तिन्हाँ दिया मदता ताँई हाई एल्टीट्यूड वारफेयर स्कूल दी इक टीम सामल कित्ती गई।  बहोत सारी आर्टिलरी,  इंजीनियर कनै होर ज़रूरी स्पोर्ट दित्ती गई।  2 कनै 3 जुलाई जो भारत दी हौआई फ़ौजें भी टाइगर हिल पर भारी बम्बारी कित्ती।

एह् इक साथ मतेयाँ पासेयाँ ते होणे वाळा इन्फेंट्री अटैक था। टाइगर हिल तकरीबन सतरह हजार फुट उच्चा पहाड़ है।  दूंहीं बटालियनां देयाँ सूरमेयाँ हमले दे तय टैमे ते चौबी घंटे पहलैं,  2 कनै 3 जुलाई सन् 1999 दिया गभलिया राती जो पहाड़े पर चढ़ाई सुरू कित्ती। 8 सिख नै  हमले ताँईं इक मजबूत बेस दित्ता।  दुस्मण जो धोखे च रक्खणे तंईं सैह् साह्म्णे दे जाणे-पछाणेयाँ रस्तेयाँ ते उप्पर गौह्णा लग्गे। 18 ग्रेनेडियर्स नै दक्खण कनै उत्तर-पूर्व दे पासे ते अपणे टारगेट दे पासें  चढ़ाई सुरू कित्ती।  दुस्मण जो हैरत च पाणे ताँईं तैह्डी मौसम नै भी महारेयाँ जुआनाँ दा भरपूर साथ दित्ता।  इस हमले दी स्कीम, 18 ग्रेनेडियर्स दे कमांडिंग अफ़सर कर्नल खुशाल चंद ठाकुर होराँ तैयार कित्तिह्यो थी।

2 कनै 3 जुलाई सन् 1999 दी बिचली घुप्प हनेरी रात।  उत्तर-पूर्व दी बहोत मुस्कल पौंहच दे पासे ते लेफ्टिनेंट बलवान सिंह होराँ 18 ग्रेनेडियर्स दी घातक (कमांडो) प्ळटून दी अगुआई करा दे थे।  तिन्हाँ दी सपोर्ट ताँईं बटालियन दी डेल्टा कंपणी जो लई नै कैप्टन सचिन निम्बालकर होराँ भी उप्पर गौहा दे थे।   सारे अपणेयाँ हत्थाँ, पैराँ कनै रस्सियाँ दा इस्तेमाल करदे इक-दूजे जो सहारा दिंदे उप्पर चढ़ा दे थे।  काले साये भूताँ साँह्ईं सुज्झा दे थे।  तिन्हाँ दे पिट्ठआँ च बहत्तर घण्टे दा राशन था जिस च सुक्कियाँ पूरियाँ, काजू, बादाम, किसमिस, चाह पत्ती कनै दुद्धे दा पाउडर सामल थे।

 

लेफ्टिनेंट बलवान सिंह होराँ दे घातक दस्ते च महज  उनिह्याँ सालाँ दा इक तगड़ा कनै फुर्तीला जुआन भी था जिसदी अज्हें मसैं-मसैं अढ़ाई साल नौकरी ही होइह्यो थी। सैह् मज़बूत जुआन कमांडो नीं था पर तिसजो सहीद होई चुक्केह्यो कमांडो दिया जगह बटालियन दे घातक दस्ते च सामल कित्ता गिह्या था।  तिस जुआन दा नाँ था ग्रेनेडियर योगेन्द्र सिंह यादव।  

योगेन्द्र सिंह यादव होराँ दा जन्म 10 मई सन् 1980 जो उत्तर प्रदेश दे जिला बुलंदशहर दे औरंगाबाद अहीर नाँ दे ग्राँ च होया। तिन्हाँ दे बापू राम करण सिंह होराँ भी 11 कुमाऊं च सिपाही दे तौर पर सन् 1971 दी जंग च हेस्सा लई चुक्ह्यो थे।  तिन्हाँ ते सन् 1971 दी जंग दियाँ कहाणियाँ सुणी करी योगेन्द्र सिंह यादव कनै तिन्हाँ दे दोह्यो छोटे भाऊआँ फ़ौज च जाणे दा मन बणाई लिह्या था।  पंजवीं तिकर तिन्हाँ दी पढ़ाई ग्राँ दे प्राइमरी स्कूल च होई। तिस दे परंत सैह् अपणे घरे ते तिन्न किलोमीटर दूर सन्नोता श्रीकृष्णा कॉलेज च दाख़ल होए। जाह्लू  सैह् बारहवीं जमात ते अद्धे च ही थे सैह् ग्रेनेडियर्स रेजीमेंट च भर्ती होए गै।  तिस बग्त तिन्हाँ दी उमर मात्र सोलह साल कनै पंज महीने थी।

योगेन्द्र सिंह यादव होराँ अपणा व्याह करने ताँईं 1 मई ते 20 मई सन् 1999 तिकर घरें छुट्टिया पर थे। तिन्हाँ दा व्याह 5 मई सन् 1999 च रीना यादव कन्नै होया। व्याह ते पंद्रह दिन परंत जाह्लू सैह  द्रास च आई करी अपणी बटालियन कन्नै आई मिल्ले ताह्लू कारगिल दी जंग दे बद्दळ छाई गैह्यो थे।

जिंञा-जिंञा सैह् उप्पर गौह्दे थे ठंड बद्धदी जाह्दी थी। जुआनाँ जो गर्म कपड़ेयाँ दी कमी महसूस होणा लगी पई। तिन्हाँ व्ह्ली बर्फीले इलाके ताँईं गर्म कपड़े नीं थे। सैह् कपड़े तिन्हाँ जो मिल्ले ज़रूर थे पर टाइगर हिल पर तिरंगा गड्डणे ते परंत।  भ्याग होई।  पत्थराँ पछाँह लुक्की नै सैह् इलाके दा जायज़ा लैणा लग्गे।  उप्परले पासें इक पहाड़ दी चोटी सुज्झी।  कैप्टन निम्बालकर होराँ जो लग्गा सैह् ही टाईगर हिल है।  ग्रेनेडियर्स  रुके नीं।  सैह् उपपर चढ़दे गै।  भ्यागा दे साढ़े पंज बजे सैह् चोटिया पर जाई रैह्। तित्थू ते तिन्हाँ दिक्खेया ताँ उप्पर इक होर उच्चा पहाड़ था।  सैह् उप्पर गौंह्दे गै।  सूरमेयाँ दे पेटाँ च मूसे दौड़ना लग्गी पै अप्पर सैह् रुके नीं।

संझा दे छे बजे सैह् टाइगर हिल दिया चोटिया दे करीब जाई रैह्।  कैप्टन निम्बालकर होराँ जुआनाँ जो टी ब्रेक करने ताँईं हुक्म दित्ता कनै अप्पू किछ जुआन कन्नै लई करी सैह् इलाके दी रैकी करना चली पै।  सैह् तकरीबन सौ मीटर ही गै हौंगे कि तिन्हाँ पर गोळियाँ दी झड़ी लगी पई।  तिस बग्त सैह् इक रिज पर थे जिसदे दूंहीं बक्खें दुस्मन दे बंकर थे। पत्थराँ दी आड़ लई करी तिन्हाँ भी जवाबी  फैर कित्ता पर सैह फैर बेअसर रिहा।  दुस्मण दियाँ गोळियाँ औआ दियाँ थियाँ पर एह् नीं पता लग्गा दा था कि दुस्मण है कुत्थू।  टी ब्रेक कैंसिल होई गई कनै कमांडिंग अफसर कर्नल खुशाल चंद ठाकुर होराँ जो हालात दी खबर रेड़ियो सेट पर दित्ती गई।  कमांडिंग अफसर होराँ तिन्हाँ जो चट्टानाँ पिच्छें आड़ लई करी अपणे सिर नींमे रक्खणे दी सलाह दित्ती। तिन्हाँ द्रास च तियार बैठेयो तोपखाने ते फौरी मदत मंगी।  भारत दे तोपखाने दियाँ तोपाँ डायरेक्ट कनै इनडाइरेक्ट फैर करी नै धड़ाधड़ गोळे बरसाणा सुरू करी दित्ते।  अद्धिया राती दे आस-पास कैप्टन निम्बालकर कनै तिन्हाँ दे साथी जुआनां जो बच्चाई करी तिसा जगह ते निकाळेया गिया। सिर्फ इक जुआन  दा हत्थ ज़ख्मी होया बाकी सारे सही-सलामत आए।

भारत दी फ़ौज उप्पर चढ़ी आइह्यो इस सच्चाइया दा पाकिस्तानियाँ जो पता लगी गिह्या था।  कर्नल खुशाल चंद ठाकुर होराँ पाकिस्तानियाँ दे रियेक्ट करने ते पहलैं ही अपणे जुआनाँ जो हमला करने हुक्म देई दित्ता। जुआनाँ खाणा खाणे दी टाळ करी दित्ती। उप्परा बक्खी चढ़ाई फिरी सुरू होई गई। लेफ्टिनेंट बलवान सिंह होराँ दा घातक दस्ता गाँह्-गाँह् था।   ग्रेनेडियर योगेन्द्र सिंह यादव कनै तिन्हाँ  दे नामराशि जो लीडिंग स्काउट नम्बर इक कनै नम्बर दो दी जिम्मेदारी मिल्ली।  भ्यागा साढ़े पंज बजे  सैह् इक नाळे च थे। जिस बग्त सैह् इक संगड़े जेहे पुळ च होई करी उप्पर चढ़ा दे थे तिन्हाँ गास दुस्मणा दा फैर आई गिया। सैह् फैर रिज दे दूंहीं पासें बणेह्याँ पाकिस्तानी बंकराँ ते औआ दा था।

अफरा तफरी दे माहौल च अगले सत्त जुआन ही उप्पर चढ़ी सके  बाकी घणे फैर दिया बजह ते पिच्छें हटणे ताँईं मजबूर होई गै।  योगेन्द्र सिंह यादव कनै तिन्हाँ दे साथी योगेन्द्र यादव पंज होर साथियाँ कन्नै उप्पर चढ़णे च कामयाब रैह् पर सैह् अपणे होर बाकी साथियाँ ते कटोई गै।  सैह् थल्ले पासें  हटी नीं सकदे थे कनै तिन्हाँ व्ह्ली उप्पर गौह्णे दे सिवा होर कोई चारा ही नीं था। इक ख़तरनाक मुहीम दी सुरूआत होई चुकिह्यो थी।

योगेंद्र सिंह यादव होराँ इस ते अग्गे दी आप-बीती सुणाॅऺदे हन्न, "हुण असाँ सिर्फ सत्त जणे ही थे। दुस्मणाॅऺ म्हारा रस्ता कटी दित्तेह्या था।  असाँ पिच्छें हटी भी नीं सकदे थे।   असाँ अग्गें जाणे दा फैसला कित्ता।  अग्गें इक पोस्ट नज़र औआ दी थी।  सैह्  पत्थराँ कन्नै चिणेह्या दुस्मणा दा इक संगर  था।  असाँ जो पता नीं था तिस संगर दे अंदर कितणे पाकिस्तानी थे।  इसते पहलैं कि सैह् असाँ जो दिक्खदे असाँ तिन्हाँ जो दिक्खी लिह्या था।  असाँ तिन्हाँ पर फैर खौली दित्ता।  किच्छ देरा परंत तिन्हाँ दा जवाबी फैर औणा बंद होई गिया।  असाँ समझी गै कि सैह् मारे गै। तित्थू सिर्फ चार पाकिस्तानी ही थे।  

गोळियाँ दी उआज सुणी करी नै उप्पर इक होर बंकर च दड़ेह्यो पाकिस्तानियाँ असां गास ताबड़तोड़ फैर खोह्ली दित्ता।  हौआ च गोळियाँ तरा दियाँ थियाँ।  असाँ न पिच्छें हटणे जोगी रैह् न अग्गें बद्धणे जोगी। ताह्लू म्हारे लीडर  हौलदार मदन होराँ चिल्लाई कर बोले, " सारे संगर दे अंदर घुसड़ी जा।  सैह्ही सेफ जगह है।"  "संगर दे अंदर माइंस होई सकदियाँ",  असाँ च कोई बोल्या।  "असाँ व्ह्ली होर कोई चारा नीं है,"  हौलदार मदन होराँ रुखाइया कन्नै बोले, "पहलैं गोळियाँ ते बचा... फिरी माइंस दे बारे च सोचह्गे।" एह् ग्लाई करी तिन्हाँ संगरे पासें सण्हूट मारी दित्ती। 

अन्दर जाई नै असाँ पाकिस्तानियाँ दियाँ ल्हासाँ बक्खें अपणियाँ-अपणियाँ पुजीसनाँ लई करी उपरले बंकरे पासें फैर करना लगी पै।  सैह् गोळाबारी तकरीबन पंज घंटे तिकर चलदी रही।  असाँ च कोई जख्मी नीं होया अपर लगातार गोळाबारिएं असाँ जो इक इंच भी अग्गें बद्धणा नीं दित्ता। असाँ जो लग्गेया कि थल्ले ते कुमक नीं औणे दिया बजह ते म्हारा एम्युनीशन ज्यादा देर नीं चलणे वाळा। तिस पाकिस्तानी संगरे च रक्खेह्या एम्युनीशन भी खत्म हौणे जो था। घड़ियाँ-पलाँ च म्हारियाँ गोळियाँ मुकणे वाळियाँ थियाँ।  तिस बग्त असाँ सोच्चेया असाँ ताँ मरना ही है अपर मरने ते पहलैं  जितणे पाकिस्तानियाँ जो मारी सकह्ण उतनेंयाँ जो मारी करी ही मरना है।  असां अपणी फैरिंग बंद करी दित्ती ताँ कि सैह् होर नेडें आई जाह्ण।

तक़रीबन दिनें दे साढे ग्यारह बजे बारह पाकिस्तानी सिपाही थल्लैं लुह्थे एह दिक्खणा कि असाँ मरेह्यो हन्न कि जींदे हन्न। तिस बग्त असाँ सारेयाँ दियाँ रैफळाॅऺ च पंजताळी-पंजताळी रौंद थे।  असाँ चुपगुप लेटेह्यो थे।  सैह् बहोत नेडें आई ढुक्के। मिंजो चेता है तिन्हाँ दियाँ दाह्ड़ियाँ लम्मियाँ थियाँ। तिन्हाँ प्यूळे साफे कनै  क्रीम कलर दे पठाणी सूट पहन्यों  थे। सारेयाँ दे चिट्टे कोटाँ पर हुड लग्गेह्यो थे।  असाँ सैह् होर नेडें औणा दित्ते।  जाह्लू सैह् कतई नेडें आई गै असाँ सारेयाँ इक साथ तिन्हाँ गास फैर खोह्ली दित्ता।  तिन्हाँ च दस पाकिस्तानी मारे गै कनै दो नह्ठणे च कामयाब रैह्।  जींदे बच्चेह्यो सैह् दो पाकिस्तानी अपणी दूजी पोस्टा च जाई रैह्।  तीस ते अद्धे कि घंटे ते परंत तकरीबन पैंती पाकिस्तानियाँ असाँ जो घेरी लिया। असाँ दे संगरे गास मिडियम मशीन गन (एम.एम.जी), उबेर मशीन गन (यू.एम.जी) कनै रॉकेट प्रोपेल्ड ग्रेनेड (आर.पी.जी) दा अंधाधुंध फैर औणा लगी पिया।  सैह् असाँ गास बड्डे-बड्डे पत्थराँ जो भी रड़काणा लगी पै।

असाँ व्ह्ली थोड़ा जेहा एम्युनीशन था जिसजो असाँ व्यर्थ नीं गुआणा चाँहदे थे। असाँ फैरिंग बंद करी दित्ती।  तिन्हाँ  म्हारी लाइट मशीन गन ताड़ी लई कनै तिसा पर आर.पी.जी दागी दित्ता। एल.एम.जी दा बैरल उड़ी गिया।  एल.एम.जी जो चलाणे वाला नौंआँ मूंडू था सैह् दौड़ी नै हौलदार मदन होराँ व्ह्ली आई रिहा।  हौलदार मदन होराँ मिंजो  एल.एम.जी तिन्हाँ पासें सट्टणे ताँईं उआज दित्ती।  जाह्लू मैं एल.एम.जी  जो चुक्णे ताँई बाहर आया, मेरी नजर उप्परले पासें पई।  असाँ दे संगरे उप्पर पठाणी सूट पहन्यों  सत्त बंदे खडौत्यो थे।  "उस्ताद, सैह् आई गैह्यो" मैं जोरे नै हौलदार मदन होराँ जो उआज मारी। उस्ताद होराँ मिंजो कनै ग्रिनेडियर अनन्त राम जो जाई करी म्हारे सनाइपर नायक नरेश होराँ दी मदत करने ताँईं ग्लाया।  जिंञा ही मैं तिन्हां पासें दौडेया पाकिस्तानियाँ मिंजो उप्पर ग्रेनेड देई मारेया। मिंजो सैह् जाह्नुएं पर आई बज्जेया।  मिंजो लग्गा मेरी जंघ उड़ी गई।  मैं हत्थ लाई करी अपणी जंघ थ्ळोह्पी ताँ सैह्  मिंजो अपणे जिस्मे कन्नै जुड़िह्यो मिल्ली। मिंजो तसल्ली मिल्ली।  तितणे च ही इक होर ग्रिनेड दी छींगड़ मेरे मत्थे छिलदी निकळी गई।  मैं थल्लैं पई गिया।  मैं पीड़ कनै हाक्खीं पर खून दा फुआरा फुटणे दिया बजह ते अन्हाँ होई गिया। मिंजो सुज्झणा बंद होई गिया।

ताह्लू तिकर मैं कनै ग्रिनेडियर अनन्त राम नायक नरेश होराँ व्ह्ली पौंह्ची गैह्यो थे।  मैं नायक नरेश होराँ जो मत्थे पर पट्टी बन्हणे ताँईं ग्लाया अपर तिन्हाँ मिंजो  पहलैं  फैर करनें ताँईं बोल्या।  तित्थू इक पुराणा पाकिस्तानी स्लीपिंग बैग पीह्या था, मैं तिस कन्नै अपणे मत्थे कनै चेहरे पर बग्दे खूंनें जो पूंह्ज्दा रिहा।  नायक नरेश होराँ मेरी तकलीफ़ दिक्खी नै अपणी फील्ड पट्टी कह्डी।  जिंञा ही सैह् मेरे जख्मे पर पट्टी बन्हणा लग्गे इक गोळा तिन्हाँ जो आई बज्जेया।  तिन्हाँ दियाँ हाक्खीं मटौई गइयाँ, सैह् पिच्छें झुके कनै थल्लैं पई गै।  पट्टी तिन्हाँ दे हत्थाँ च ही थी, सैह् सहीद होई गैह्यो थे।

मैं ग्रिनेडियर अनन्त राम होराँ दे पासें गिया। मैं तिन्हाँ जो दस्सणा ही लग्गेह्या था कि क्या हौया,  ठीक तिस बग्त तिन्हाँ जो यू.एम.जी दा इक बर्स्ट आई लग्गा। तिन्हाँ दा सिर उड़ी गिया। बस फिरी क्या था, तिस ते परंत तित्थू तबाही सुरू होई गई।  'अल्लाह हू अकबर' दा नारा लगाँदे इक ते बाद इक पाकिस्तानी असाँ गास कुदणा लगी पै।  सैह् पैंती थे।  असाँ दे सत्ताँ जुआनाँ च दो सहीद होई चुक्केह्यो थे कनै दो जख्मी थे जिन्हाँ च इक मैं कनै इक मेरा नाम राशि था जिसदी फायर करने वाळी उंगली कटोई गइह्यो थी। तिन्हाँ दे पैंतिह्याँ साह्म्णे असाँ दे सिर्फ तिन्न जुआन सही सलामत थे।  

कुत्थू सैह् पैंती कनै कुत्थू म्हारे तिन्न।  म्हारेयाँ जुआनाँ जो जवाब देणे दा मौका ही नीं मिल्लेया।  मेरे सारे साथी सहीद होई गै।  मैं भी अपणे मरेह्याँ साथियाँ कन्नै पिह्या था।  पाकिस्तानियाँ नेडें आई करी बारी-बारी सारेयाँ पर गोळियाँ दागी नै तसल्ली कित्ती कि असाँ च कोई भी जीन्दा नीं बचेह्या रैह्।  जाह्लू तिन्हाँ मेरे बक्खें पैह्यो मेरे सहीद साथिए जो चार गोळियाँ मारियाँ ता मैं दिक्खेया तिसदी ल्हास उपरा जो उड़कदी दिक्खी।  मैं हाखीं मिट्टी करी अपणी बारी औणे दी निहाग करदा चुपचाप पई रिहा।  तिन्हाँ मिंजो पर भी नेडें आई नै गोळियाँ दागियाँ।  जाह्लू पाकिस्तानी मिंजो गोळी मारी नै पिच्छें हटेया ताह तिसदा पैर मिंजो नै छौह्या। मिंजो बझौया कि मैं जिन्दा है।  मै सोच्चेया कि इतणा किच्छ होणे पर भी मैं अतिह्यें जिन्दा है ताँ हुण मैं नीं मरना।  

पाकिस्तानी तसल्ली करी नै बापस  मुड़े।  तिन्हाँ जाँदेयां-जाँदेयां मश्कोह घाटी च अपणे वेस हेडकुआटर जो रेडियो पर खबर दित्ती कि किच्छ हिंदोस्तानी उप्पर गौही आह्यो थे तिन्हाँ दा सफाया होई गिया अपर थल्ले पासें इक हिंदोस्तानी एल.एम.जी पोस्ट है तिसा जो क्लीयर करना पौणा।  मिंजो पता था सैह् मेरेयाँ उन्हाँ बाकी अठारह साथियाँ दी गल्ल करा दे थे जेह्डे उप्पर गौही नीं सके थे।  मैं अपणे साथियाँ जो बचाणे ताँईं जींदा रैह्णा चाँह्दा था।  मैं लौहुए नै लथपथ अपणियाँ हाखीं नै दिक्खेया कि तिन्हाँ दे दो आदमी आए कनै असाँ दे हथियार कठेरी करी मूंह्डेयाँ पर लंगाई नै बापस मुड़े। मैं अपणे पौउच च रक्खेह्या इक ग्रेनेड कड्ढेह्या।  सेफ्टी पिन निकाळी करी तिस्सेयो तिन्हाँ पासें छुआळी दित्ता।  सैह् ग्रेनेड इक पाकिस्तानी दे कोट दे हुड च जाई फस्सेया। तिन्नी छड़ाणे दी मती कोसस कित्ती अपर ग्रेनेडें फटी करी तिसदा सिर डुआई दित्ता।  सैह् मिंजो उप्पर आई पिया।  मैं तिसदा हथियार लई नै किच्छ दूर खड़ोह्त्यो पाकिस्तानियाँ गास फैर खौह्ली दित्ता। पाकिस्तानियाँ च खलबली मची गई। तिन्हाँ जो लग्गा भारत दी होर फ़ौज उप्पर चढ़ी आई कनै सैह् नह्स्सी गै। मैं तिन्हाँ पिच्छें रगडौंदा तिन्हाँ दे कैम्प दे नेडें जाई रिहा।  मिंजो तिन्हाँ दे तम्बू दुस्से। तिन्हाँ दे लंगरे च रसो तियार हौआ दी थी।  तिस बग्त मेरी हालत खराब थी। इस करी नै मैं किच्छ भी नीं करी सकदा था।  मैं अपणे साथियाँ जो एह् खबर देई करी बचाणे ताँईं जींदा रैह्णा चाँह्दा था। 

दिने दे डिढ कि बजेह्यो होंगे।  मैं मुड़ी करी अपणे साथियाँ व्ह्ली आया। तिन्हाँ च कोई भी जींदा नीं बचेह्या था।  कुसी दा सिर उड़ी गिह्या था, कुसी दी छाती फटी गइयो थी, कुसी दे पेटे दियाँ आँदराँ बाहर आई गइयाँ थियाँ ताँ कुसी दियाँ जंघाँ-बाँहीं कटोई नै दूर पइह्याँ थियाँ। मिजों तिन्हाँ दी हालत दिक्खी रौणा आई गिया। मैं खूब रोया। 

मेरा बदन ठंडा हौणा लग्गी पिया।  पीड़ बद्धी गई। मेरिया बाँहीं दियाँ टुट्टियाँ हड्डियाँ अप्पू च रगड़ोई नै बहोत दर्द करा दियाँ थियाँ।  मिंजो लग्गा मेरी बाँह बेकार होई गई।  मैं बाँहीं जो बदनें ते तोड़ी सट्टणे दी कोसस कित्ती पर कामयाब नीं हौया।  मैं अपणी बाँह पिट्ठी पासें घुमाई करी  अपणियाँ बेलटा कन्नै फसाई दित्ती।  मिंजो लग्गा दा था कि मैं इतणा किच्छ हौणे पर नीं मरेया तां मैं हुण नीं मरना है। मैं इक नाळे च ढैंह्दा-पौंदा थल्ले पासें लौह्णा लग्गा।

मैं अपणे सलामत हत्थे कन्नै इक पत्थरे नै लंगोह्या था।  ताह्लू मिंजो थल्ले बक्खें अपणे साथी सुज्झे।  मै तिन्हाँ जो उआज दित्ती। तिन्हाँ मिंजो बारी-बारी अपणियां पिट्ठीं पर लद्दी करी टाइगर हिल दे अद्ध रस्तें बणेह्यो बटालियन दे कैम्प च पज़ाई दित्ता।"

तिस दे परंत ग्रेनेडियर योगेन्द्र सिंह यादव होराँ जो कमांडिंग अफसर कर्नल खुशाल चन्द ठाकुर होराँ दे टेंट च ल्याया गिया। बहोत सारा लौहू निकळी जाणे दिया बजह ते तिन्हाँ जो बड़ी कमज़ोरी आई गइयो थी कनै हाखीं ते किच्छ भी नीं सुज्झा दा था।  जाह्लू तिन्हाँ ते कमांडिंग अफसर होराँ पुच्छेया कि क्या सैह् तिन्हाँ जो पच्छैणदे ताँ तिन्हाँ जवाब दित्ता,  "साहब मैं तुसाँ दी उआज पच्छैणदा, जय हिंद साहब।"  योगेन्द्र सिंह यादव होराँ ठंडी नै कंपा दे थे।  तिन्हाँ जो गर्मास देणे ताँईं स्टोव जळाए गै।  तिन्हाँ  अपणे सी.ओ. साहब जो उप्परा दी सारी जाणकारी दित्ती कि कुत्थू दुस्मण था, किंञा तिन्हाँ दिया पोस्टा तिकर जाई सकदे कनै उप्पर चढ़णे जो कुण देहा रूट ठीक रैह्णा था। एह् दस्सी करी सैह् बेसुध होई गै।

ग्रेनेडियर योगेन्द्र सिंह यादव होराँ जो 9 जुलाई  जो होस आया ताँ तिन्हाँ जो अप्पू उप्पर पंखा घुमदा सुज्झेया। किच्छ देर तिन्हाँ जो पता ही नीं चल्लेया कि सैह् कुत्थू हन्न।  तिन्हाँ जो नर्सें दस्सेया कि सैह् तिस बग्त, खतरे ते बाहर, बेस हॉस्पिटल, श्रीनगर  च थे।  तिन्हाँ अपणी बटालियन दे बारे च पुच्छेया ताँ तिन्हाँ जो पता लग्गेया कि जिसा राती सैह् थल्लें लुह्त्थे थे तिसा राती ही ‌ ब्रावो कनै डेल्टा कंपणी दे तकरीबन सौ जुआनाँ घातक प्ळटून सौगी हमला करी नै, बगैर कुसी नुकसान ते,  टाइगर हिल पर कब्जा करी लिह्या था।  

ग्रेनेडियर योगेन्द्र सिंह यादव होराँ जो  दिल्ली हॉस्पिटल भेज्या गिया जित्थू  तिन्हाँ दा लम्मा इलाज चल्लेया। तिन्हाँ दे बदन च पन्द्रह गोळियाँ लग्गिह्याँ थियाँ कनै तिन्हाँ पंज पाकिस्तानियाँ जो मारेह्या था। तिन्हाँ उप्परा दी जेह्डी खबर अपणे सी.ओ. साहब जो दित्ती सैह् बड़ी कीमती थी। तिस दी बजह ते मतियाँ कीमती जाँनी बच्ची गइयाँ थियाँ। ग्रेनेडियर योगेन्द्र सिंह यादव होराँ जो भारत सरकारें परमवीर चक्र कन्नै नवाजेया।  सैह् फ़ौज ते सूबेदार मेजर ऑनरेरी कैप्टन दे रैंक ते रटैर होए। योगेन्द्र सिंह यादव होराँ हर साल खुल्लिया जीपा पर खड़ोई करी, ऑनरेरी कैप्टन बाना सिंह  कनै सूबेदार संजय कुमार सौगी 26 जनवरी दिया परेडा जो लीड करदे भारत दे राष्ट्रपति जो सलामी दिंदे हन्न।

References ― The capture of Tiger Hill: a first-hand account by Gen VP Malik  dated July 26, 2002 Tribune News Service; interviews of Yogender Singh Yadav given to various channels available on You Tube and The Brave : Paramvir Chakra Stories by Rachna Bisht Rawat.