20. राइफलमैन संजय कुमार

 

राइफलमैन संजय कुमार

(5 जुलाई 1999)

जम्मू कश्मीर दी सरहद पर तक़रीबन सबा अठ सौ किलोमीटर लम्मी एलओसी (लाइन ऑफ कंट्रोल) खिंजिह्यो है। एह् एलओसी राजौरी, पुंछ, उड़ी, टिथवाल कारगिल कनै लेह च होंदी होई सियाचिन तिकर जाँदी है।  इसा लाइना ते तकरीबन छे किलोमीटर अंदर भारत दा नेशनल हाईवे गुज़रदा है जेह्डा श्रीनगर, कारगिल, द्रास कनै लेह जो जोड़दा है।  इस एलओसी पर 6000 फुट ते लई करी 17000 फुट तिकर उच्चे पहाड़ हन्न जिन्हाँ पर साल भर च 20 ते 30 फुट तिकर मोटी बर्फ पौंदी है। तिस इलाके च 15000 फुट तिकर डुग्घे खोळे हन्न।  दूरा-दूरा तिकर फैलयो कंडेयाँ वाळे झिंड, संगड़े कनै करड़े रस्ते दिखी दिल दहली जाँदा है।  तित्थु सितम्बर-अक्टूबर च टेम्परेचर ज़ीरो ते थल्लें चली जाँदा है।  दिसम्बर-जनवरी महीने दिया ठंडी दे बारे च ताँ गलाणा ही क्या।

कारगिल दा इलाका सामरिक नज़रिए ते बड़ा अहमियत रखदा है।  पाकिस्तान दे कन्नै-कन्नै चीन भी इस गास अपणी नज़र रखदा रिहा है। सन् 1999 दे सुरू च कारगिल च होई पाकिस्तानी घुसपैठ दे दो खास मकसद थे—कारगिल दे जिरिये सियाचिन जो अलग-थलग करी नै हड्डपी लैणा कनै सारी दुनिया दियाँ नज़राँ साह्म्णे कश्मीर मुद्दे दी बत्ती जगाई रखणी।  कारगिल दी जंग काश्मीर जो हथियाणे, शिमला समझौते जो तोड़ने कनै भारत जो हिलाणे ताँईं पाकिस्तान दी त्री कोसस दा नतीजा थी।  इसते पहलैं भी पाकिस्तान दी फ़ौज कनै कवाइली सन् 1947-48 कनै 1965 च दो बरी एह् कोसस करी चुकेह्यो थे। 

इसते पहलैं कि सन् 1999 दे मई महीनें भारत दी फ़ौज जो पता लगदा, पाकिस्तानी फ़ौज दे दो ब्रिगेड भारत दे अंदर घुसड़ी नै, मजबूत ठिकाणे बणाई करी, बैठी गैयो थे।  एह् घुसपैठ कारगिल च द्रास, मश्कोह घाटी कनै बटालिक दे इलाकेयाँ च होइयो थी। सुरू-सुरू च भारत दे फ़ौजी कमाँडराँ ये गल हल्कैं लई। 

10 मई सन् 1999 जो जाह्लू पाकिस्तानियाँ कारगिल द्रास इलाक़े पर घणी भारी गोळेबारी कित्ती, जिसते तित्थू असाँ दे गोळा-बारूद भंडार जो अग्ग लगी गई कनै म्हारे अट्ठ जुआन सहीद होई गै,  ताँ सारे चकन्नै होई गै।  आखिर च भारत दे पासे ते 26 मई सन् 1999  जो 'ऑपेरशन विजय' दी सुरुआत करी नै  जंग दा एलान होई गिया।

इस जंग च भारत माता दे सपूत बड़ी बहादरी कन्नै लड़े।  मते सारे जुआन सहीद होए।  तिन्हाँ पहाडाँ च लड़ने वाळे सारे जुआन इक ते इक बद्धी करी सूरमे थे। कारगिल दे उच्चे पहाड़ भारत दे जुआनाँ दी बहादरी दी अणगिणत कहाणियाँ दे गुआह् बणे।  तिन्हाँ कहाणियाँ च इक सूरमेयाँ च सूरमे राइफलमैन संजय कुमार दी कहाणी भी है।

वीरभूमि हिमाचल प्रदेश दे जिला बिलासपुर दी कलोल ग्राम पंचायत दे बकैंन ग्राँ च 3 मार्च सन् 1976 जो श्री दुर्गा राम कनै श्रीमति भाग देवी दे घर इक मुन्नू  पैदा होया था जिन्नीं जुआन होई करी कारगिल देयाँ पहाडाँ पर अपणी बहादुरी दे झंडे गड्डी दित्ते थे।  तिस जागते दा नाँअ् था  संजय कुमार।  संजय कुमार होराँ अपणे फ़ौजी चाचा ते सन् 1965 दे भारत-पाकिस्तान जंग दियाँ कहाणियाँ सुणी-सुणी करी फ़ौज च भर्ती होणे दा मन बणाई लिह्या था। तिन्हाँ  दिनाँ च कनै अज्ज भी, फ़ौज हिमाचल प्रदेश देयाँ नौजुआनां दा इक मुख पेसा है। सैह् ज्यादातर जम्मू एंड कश्मीर राइफल्स, डोगरा रेजीमेंट कनै पंजाब रेजीमेंट च सामल होई नै देस दियाँ सरहदाँ दी रखुआळी करदे हन्न। गौरमिंट सीनियर सेकेंडरी स्कूल, कलोल ते मैट्रिक दा मतिहान पास करी नै संजय कुमार होराँ कोसस कित्ती कनै  फ़ौज च भर्ती होई करी जम्मू एंड कश्मीर राइफल्स दी तेरहवीं बटालियन च सामल होए।

लेफ्टिनेंट कर्नल (बाद च लेफ्टिनेंट जनरल) योगेश कुमार जोशी होराँ दी कमान च 13 जैक राइफल्स 'ऑपेरशन विजय' च जित्ताँ दे झंडे गड़दी जाह्दी थी। 14 जून ते लई करी 20 जून सन् 1999  तिकर चले ऑपेरशन च इस बटालियन दे सूरमे कैप्टन विक्रम बत्रा होराँ द्रास सेक्टर दे पॉइंट 5140 पर कब्जा करी लिह्या था। एह् भारत दी जित्त दा इक खास पड़ाओ था। जुआनाँ दे हौंसले बुलंद थे।   इस दे परंत बारी थी मश्कोह घाटी दे  पॉइंट  4875 कनै फ्लैट टॉप दी। तित्थु ते सारी मश्कोह घाटी पर दुस्मण नज़र रखदे थे।  भारत दा नेशनल हाइवे नंबर 1 डी जेह्डा कारगिल, लेह कनै तिसते अग्गे देयाँ इलाकेयाँ च रैंह्णे वाळेयां आम लोकाँ कनै फौज़ियाँ दी लाइफ-लाइन है, हर बग्त दुस्मणां दियाँ नज़राँ च था। हाईवे पर गड्डियाँ दी औंद-जाँद रोकणा पई गई।  रासन-पाणी कनै गोला-बारूद दी सप्लाई पर असर पौणा लग्गा।  भारत दे तोपखाने जो तित्थू अपणियाँ तोपाँ लई जाणा मुस्कल होई गिया।   इन्हैं दूंहीं चौकियाँ जो दुस्मणां ते बापस लैणा बड़ा ज़रूरी होई गिया था। दुस्मणां जो इन्हाँ पोस्टाँ दी अहमियत दा पता था।   तिन्हाँ तित्थू बड़ी भारी मज़बूत मोर्चेबंदी कित्तियो थी। तिसा जगह तिन्हाँ दी नफरी भी ज्यादा थी।  भारत दियाँ फ़ौजाँ जो तिन्हाँ दी तादाद,  हथियार कनै  लोकेसन दी सही जाणकारी नीं थी। भारत दिएं पैदल फ़ौजें सारी-सारी  रात गश्त करी नै थोड़ी-बहोत जाणकारी कट्ठी कित्ती कनैं तोपखाने वाळेयाँ भी  अपणियाँ तोपाँ ताँईं टारगेट रजिस्टर कित्ते।

तिन्हाँ पोस्टाँ जो बापस लैणे ताँईं जाट रेजीमेंट दी सत्रहवीं बटालियन जो कामयाबी नीं मिल्ली।  17 जाट दा भारी जानीं नुकसान होया।  एह् चौकियाँ भारत दी फौज तांईं इक भारी चुनौतियाँ बणी गइयाँ।  आखिर इन्हाँ चौकियाँ ते दुस्मणा दा सफाया करने दी जिम्मेदारी 13 जैक रिफ जो मिल्ली। 4 जुलाई सन् 1999 दिया संझा जो 13 जैक रिफ अपणा जोस दसणे जो तियार थी। लेफ्टिनेंट कर्नल जोशी होराँ इक खास रणनीति बणाई। तिन्हाँ एह् मुस्कल कम्म अपणी बटालियन दी 'सी' कंपणी दे कमांडर मेजर गुरप्रीत सिंह होराँ जो दित्ता।  तिन्हाँ कन्नै सह्त्तर-अस्सी जुआन थे।  तिन्हाँ सौगी सूबेदार रमेश कुमार होराँ दी अगुआई च ग्यारहाँ जुआनाँ दी इक लीडिंग टीम भेजी गई। राइफलमैन (बाद च सूबेदार मेजर) संजय कुमार होराँ, अप्पु अग्गें आई करी, लीडिंग टीम दे लीडिंग स्काउट बणे।

तिन्हाँ दे किछ पिच्छें सज्जें पासें 17 जाट कनै खब्बें पासें जैक रिफ दे जुआन भी औआ दे थे।  सैह् सारे छोटी-छोटी टुकड़ियाँ च बंडोह्यो थे ताकि दुस्मण दे फैर ते इक साथ बड्डा नुकसान नीं ठुआणा पौए। अंदाजा था कि तिन्हाँ तिसा राती ढाई-तिन्न बजे दे करीब दूंहीं चौकियाँ दे थल्लैं पौंदे इक पड़ाओ साउथ सपर चोटी तिकर जाई रैह्णा है।  सारे जुआन घुप्प न्हेरे च अग्गें बद्धा दे थे।  तोपखाने दियाँ बेरहम बोफोर्स तोपाँ तिन्हाँ जो बरोबर कवरिंग फैर देणा लगिह्याँ थियाँ।  तिस पड़ाओ तिकर पौंह्चणे जो सैह् ढाई घंटे लेट होई गै थे।  तकरीबन 400 मीठर चढ़ाई अज्हें बाकी थी।  तिस बग्त 13 जैक रिफ दी 'सी' कंपणी दे जुआन देहिया ठाहरी जाई रैह्यो थे जित्थू ते तिन्हाँ जो दुस्मण दी लोकेसन नज़र औआ दी थी अपर दुस्मणा जो सैह्  सिद्धे नीं सुज्झा दे थे।   पाकिस्तानियाँ जो सिर्फ 17 जाट दे जुआन दुस्सा दे थे।  जाटाँ गास दुस्मणा दा घणा फैर औआ दा था कनै सैह् भी ज़वाबी फेर करा दे थे। औत्थु दुये बक्खें 13 जैक रिफ दी 'सी' कंपणी दी लीडिंग टीम हौळें-हौळें उप्पर गोंह्दी-गोंहदी पहली चौकी  पॉइंट 4875  तिकर जाई रही थी।  तित्थु भी तिन्हाँ गास दुस्मणा दी सिद्धी नज़र नीं पौआ दी थी। 

टीम दे लीडिंग स्काउट  राइफलमैन संजय कुमार होराँ सारेयाँ ते गाँह् थे। तिन्हाँ सौगी राइफलमैन नीतेंद्र कुमार भी थे।  सैह् दोयो पाकिस्तानी बंकर दे बड़े नेडैं जाई रैह्यो थे।  तिस पाकिस्तानी बंकर ते लगातार भारी फैर औआ दा था।  तित्थू ते इक युनिवर्सल मशीन गन भारत देयां सूरमेयाँ गास बरोबर कहर ढाँदी जाह्दी थी। तिस बग्त सूबेदार रमेश कुमार होराँ भी तित्थू अक्खें-बक्खें ही थे कनै तिन्हाँ दी नज़र भी पाकिस्तानी बंकरे गास थी।  तिन्हाँ राइफलमैन संजय कुमार जो तिस बंकर पर हल्ला बोलणे दा इसारा करी दित्ता।  तिस ते परंत संजय कुमार होराँ अपणे जोड़ीदार नीतेंद्र होराँ जो बंकरे गास ग्रेनेड दा हमला करने दा इसारा कित्ता।  जिंञा ही तिन्हाँ बंकरे गास ग्रेनेड सट्टेया संजय कुमार होराँ दुस्मणां जो मौका दित्ते बगैर तिन्हाँ दी युनिवर्सल मशीन गन खोही लई।  तिन्हाँ दे पिच्छें नीतेंद्र कनै होर साथियाँ आई करी बंकर दे अंदर बैठेयाँ पाकिस्तानियाँ जो ढेर करी दित्ता।  राइफलमैन संजय कुमार होराँ दुस्मणां ते खोहियो युनिवर्सल मशीन गन दुस्मणां गास ही इस्तेमाल करी दित्ती।  तिसा चौकिया पर भारत दा कब्जा होई गिया।  13 जैक रिफ दी 'सी' कंपणी दी लीडिंग टीम दे तिस बग्त तिकर पंज जुआन जख्मी होई चुक्केह्यो थे। तिन्हाँ दी मरहम पट्टी हौआ दी थी।

हुण बारी थी फ्लैट टॉप पोस्ट दी।  टीम दे बाकी बचे छे जुआन फ्लैट टॉप पोस्ट बक्खी बद्धणा लगी पै थे। इसदे बिच ही हिमाचल प्रदेश दे दो सूरमे राइफलमैन  सहीद होई गै — तिन्हां च इक शिमला दे  श्याम कनै दूजे हमीरपुर दे प्रवीण कुमार थे।  राइफलमैन संजय कुमार समेत टीम दे चार जुआन जान दी बाज़ी लगाई करी  अग्गें बद्धदे जाह्दे थे।  पिच्छे ते तिन्हाँ जो  कवरिंग फैर बरोबर मिल्ला दा था।  संजय कुमार होराँ इक पत्थर दी आड़ लई करी दुस्मणा पर कहर ढाह्दे थे ताह्लू तिन्हाँ जो दुस्मण दियाँ दो गोळियाँ पैरे च आई बज्जियाँ।  किछ समै परंत संजय कुमार कनै तिन्हाँ दे साथी फ्लैट टॉप पोस्टा पर जाई रैह्।  तिन्हाँ किछ दुस्मणा जो मौत दे घाट तुआरी दित्ता कनै किछ पाकिस्तानी अपणी जान बचाई करी नह्ठी गै।  हुण फ्लैट टॉप चौकी पर भारत दा तिरंगा लहरा दा था।

राइफलमैन संजय कुमार होराँ जो तिन्हाँ दी अणथोही बहादुरी ताँईं परमवीर चक्र दित्ता गिया।   तिसा लड़ाइया परंत तिन्हाँ दिया पळटणा जो बैटल ऑनर 'कारगिल' कन्नै नवाजेया गिया था।  13 जैक रिफ (कारगिल) अज्ज तिकर भारत दी फ़ौज दी पहली इक मात्र पलटण है जिन्नैं इक लडाई च दो-दो परमवीर चक्र जित्तेह्यो हन्न।  दूजा परमवीर चक्र पाणे वाळे अमर सहीद कैप्टन विक्रम बत्रा होराँ थे।

संजय कुमार होराँ दा व्याह 17अप्रैल सन् 2000 जो होया।  तिन्हाँ दिया घरेवाळिया दा नाँअ् श्रीमती प्रोमिला है।  तिन्हाँ दे दो निक्केयाणे हन्न—इक जागत कन्नै इक बिट्टी।

समै गुजरने दे परंत संजय कुमार होराँ सूबेदार बणे ।  तिन्हाँ  इंडियन मिलिट्री एकेडमी च इंस्ट्रक्टर बणी करी फ़ौज दे अफ़सराँ जो पढ़ाणे दी जिम्मेदारी भी बखूबी नभाई।

―  भगत राम मंडोत्रा

(References ― Paramvir Chakra citation of Rfn Sanjay Kumar, an article by Sanjay Pokhriyal published in Jagran on 24 Jul 2020, 11.48 AM (IST) and an article written by Col Dilbag Dabas (Retd) in The Tribune on 08 Dec 2018  01.22 AM.)