16. नायब सूबेदार बाना सिंह

        

नायब सूबेदार बाना सिंह

(26 जून 1987)

सियाचिन ग्लेशियर काराकोरम पर्वतमाळा दियाँ उच्चाइयाँ पर पौंदा है। एह् धरती पर सब्भते बड्डा अल्पाइन ग्लेशियर है जिस च तकरीबन दो ट्रिलियन क्यूबिक फुट बर्फ है।  दुनिया भर च तिसते उच्चा कनै ठंडा जंग दा मदान कुत्थी भी ह्यी नीं।  कुसी जो भी नीं बक्सणे वाळे तिस जंग दे मदान च भारत कनै पाकिस्तान दियाँ फ़ौजाँ कई सालाँ ते आह्मणे-साह्म्णे डटी करी इक्की दुये जो घूरदियाँ रैंह्दियाँ आइयाँ हन्न।

1970 दिया दहाइया च, पाकिस्तानी सरकारें बाहरले मुल्खाँ दे पहाड़-चढ़ाह्कुआँ जो सियाचिन ग्लेशियर गास चोंह् पासेयाँ ते चढ़णे दे परमिट देणा सुरू करी दित्ते थे। इस ते सैह् एह् साबित करना चाँह्दे थे कि सियाचिन तिन्हाँ दा है।  1980 दिया दहाइया तिकर पाकिस्तानियाँ  सियाचिन पर अपणा दौआ साबित करने दा पक्का इरादा बणाई लिया था। जेकर एह् हौई जाँदा ताँ काराकोरम दर्रे जो कंट्रोल करने वाळी पाक-चीन कोरीड़ोर भारत दे लद्दाख ताँईं बड़ी ख़तरनाक साबित हौंदी।  पकिस्तान दी एह् मन्सा पूरी हौई जाँदी अपर सन् 1984 च भारत सरकारा दे खुफिया महकमें पाकिस्तान जो अपणी फ़ौज ताँईं लंदन च अति ठंड ते बचणे दे कपड़े दी थोक खरीदारी करदेयाँ ताड़ी लिया था। 

तिन्न साल परंत सन् 1987 च, जाह्लू भारत तिब्बत कन्नै लगदी अपणी उत्तरी सरहद पर पुंगरियाँ परेसानियाँ कन्नै निपटणा लग्गेह्या था, ताह्लू पाकिस्तानी फ़ौजाँ सियाचिन दे नेडें भारत दियाँ किछ चौकियाँ पर अपणा कब्जा जमाई लिया।पाकिस्तानी फ़ौज सालतोरो रिज पर बिलफोंड दर्रे दी इक खास जगह पर अपणी पोस्ट बणाणे च कामयाब हौई गई जिसदा नाँ तिन्हाँ कायद-ए-आजम मोहम्मद अली जिन्ना दे नाँएं पर रक्खेह्या था। तिसा जगह दी उच्चाई 21156 फुट है।   तित्थू ते पाकिस्तानी फ़ौज  तकरीबन अस्सी किलोमीटर तिकर पौणे वाळी भारत दी फ़ौजी चौकियाँ  पर नज़र रक्खी सकदी थी।  सैह् भारत दे हेलीकॉप्टराँ दे औणे-जाणे पर नज़र रक्खी सकदे थे, भारत दी सप्लाई लाइन पर अपणियाँ तोपाँ कनै अग्ग बरसाई सकदे थे कनै भारत दी फ़ौज दियाँ पेट्रोल पार्टियाँ पर गोळाबारी करी सकदे थे।

'कायद' पोस्टा पर पाकिस्तान दे ब्रिगेडियर परवेज मुशर्रफ (बाद च चीफ ऑफ़ आर्मी स्टाफ कनै राष्ट्रपति) दे स्पेशल सर्विस ग्रुप दी तीजी बटालियन दी शाहीन कंपणी दे कमांडो जमी करी बैठेह्यो थे। 18 अप्रैल सन् 1987 जो  'कायद' पोस्ट ते पकिस्तानियाँ  उत्तर-पच्छम दे पासें पौंणे वाळी भारत दी 'सोनम' पोस्टा पर भारी गोळीबारी कित्ती जिस ते भारत दी फ़ौज दा इक जेसीओ कनै पंज जुआन सहीद होई गै। 'सोनम' पोस्टा पर इक लद्दाखी हवलदार सोनम नै 21000 फुट दिया उच्चाइया गास दुनिया दा सब्भते उच्चा हेलीकॉप्टर पैड बणाह्या था।  पाकिस्तानी फ़ौज भारत दे हेलीकॉप्टराँ पर गोळियाँ चलाणा लगी पई जिस दिया बजह ते 'कायद' पोस्ट दे दक्खणे पासें पौणे वाळी भारत दी 'अमर' पोस्ट तिकर रसद पजाणा मुस्कल होई गिया था।

भारत दिएं फौजें तरंत इक ऑपेरशन चलाया जिसदा मक़सद 'कायद' पोस्ट ते पाकिस्तानी फ़ौज जो पुट्टी सट्णा था।  जम्मू एंड कश्मीर लाइट इन्फेंट्री दी अठमीं बटालियन अति उच्चे पहाडाँ पर इस कम्म जो करने ताँईं चुणी गई। उच्चियाँ संगड़ियाँ चोटियाँ  कनै ऑक्सीजन दी कमी वाळे तिस इलाके च हेलीकॉप्टर गनशिप कन्नै अटैक करना नामुमकिण  था। बटालियन दे कमांडिग अफसर कर्नल ए.पी. राय होराँ, दुस्मण कनै इलाके दा अता-पता करने ताँईं, इक टीम भेजी।   इक अफसर, इक जेसीओ कनै ग्यारह जुआनाँ वाळिया तिसा पार्टिया दे कमांडर सेकिंड लेफ्टिनेंट राजीव पाँडे  होराँ थे।  पाँडे होराँ दी टीम दे जुआनाँ कनै तिन्हाँ दे साजो-समान जो ढोणे ताँईं  हेलिकॉप्टराँ जो पैंती ते ज्यादा डुआराँ मारनियाँ पइयाँ थियाँ।  सेकिंड  लेफ्टिनेंट पाँडे  होराँ दा  कम्म 'कायद'  पोस्टा उप्पर गोह्णे दे रस्ते तोपणा कनै  तित्थू बैठेयो दुस्मणा दी नफरी कनै हथियाराँ दी टोह लैणा था।

अपणे आपे जो तिसा उच्चाइया दे वातावरण हौआ-पाणी च ढाळणे दे परंत पाँडे होराँ दी टीमें 29 मई सन् 1987 दी स्याह रात जो बर्फ दिया उच्चिया कंधा बक्खी चढ़णा सुरू करी दित्ता।  तिसा कंधा दे उप्पर कायद पोस्ट थी। किछ मीटर उप्पर गोह्यी करी जुआनाँ जो बसोणे ताँईं कनै साह लैणे जो बार-बार रुकणा पौंदा था। तिसा उच्चाइया पर माइनस डिग्री टेम्परेचर कनै बर्फानी तुफान च जाह्लू हौआ दी स्पीड़ सौ किलोमीटर ते उप्पर होए, हाड़-माँस दे बणेयो माह्णुआँ जो इक लप्प भी पुटणा बड़ी मुस्कल हौंदी है।

दरअसल 'कायद' पोस्ट इक मज़बूत किला थी जिसदे तिन्नों पासें साढ़े चार सौ-पंज सौ मीटर उच्चियाँ अस्सी-नब्बैं डिग्री खड़ियाँ  बर्फे दियाँ कन्धाँ थियाँ कनै चौथे बक्खें, जिस  जो 'सैडल' जाँ 'सोलडर' ग्लांदे थे, तिस पर इक ब्लेड़े साँहीं पैनीं 'रिज लाईन' थी।  ग्लेशियर दे तिस मज़बूत किले जो फतह करना तकरीबन नामुमकिण था।  सेकिंड लेफ्टिनेंट राजीव होराँ दे बहादुर जुआन बर्फे दियाँ खड़ियाँ कंधाँ पर लोहे दे कुंडे ठोकदे जाह्दे थे कनै कुंडेयाँ कन्नै रस्सियाँ फसाई करी 'सैडल' दे  नेडें जाई पूज्जे थे। उप्पर बैठेयाँ दुस्मणां दियाँ नज़राँ ते बच्ची करी तिस ते अग्गें बद्वणा मुस्कल था। एह्  साह्म्णे ते इक आत्मघाती हमला था।  फिरी भी राजीव होराँ अग्गें बद्धदे रैह्।  उप्परा ते पाकिस्तानी तिन्हाँ जो दिक्खा दे थे। जिंञा सैह् पाकिस्तानी हथियाराँ दे रेंज च आए  तिन्हाँ गास हैवी मशीन गन दा फैर औणा लगी पिया।  किछ पलाँ च ही सेकंड लेफ्टिनेंट राजीव पाँडे होराँ समेत दस जुआन सहीद होई गै।  बाकी बचेयो तिन्न जुआन ढैंदे-पौंदे 'सोनम' पोस्ट पर मुड़ी आए थे।

सेकंड लेफ्टिनेंट राजीव पाँडे होराँ कनै तिन्हाँ दे जुआन अपणा कम्म करी नै ही गै थे।  तिन्हाँ दियाँ टंगाइयाँ रस्सियाँ अगले हमले करने ताँईं बड़ियाँ मदतगार साबित होणे वाळियाँ थियाँ।  तिन्हाँ दियाँ मौताँ दा बदळा लैणे ताँईं बटालियन दे जुआनाँ च गुस्से दा इक बुआळ आई गिया था।  सैह् बुआळ 'कायद' पोस्ट पर जित्त हासिल करने ताँईं बड़े कम्में औणे वाळा था।

बटालियन दे सीओ कर्नल ए.पी. राय होराँ मेजर वीरेंद्र सिंह होराँ जो 'कायद' पोस्ट पर कब्जा करी नै अपणे सहीद साथियाँ दा बदळा लैणे दी ज़िम्मेदारी दित्ती।  दो अफसर—मेजर वीरेंद्र सिंह कनै कैप्टन अनिल शर्मा कन्नै तिन्न जेसीओ—सूबेदार हरनाम सिंह,  सूबेदार संसार चंद कनै नायव सूबेदार बाना सिंह सौगी सतूंजा जुआन तिस अटैक ताँईं चुणे गै। कैप्टन राम प्रकाश होराँ दी अगुआई च दस जुआनाँ दा इक दस्ता सोनम पोस्ट ते थोड़ा कि अग्गें तैनात कित्ता गिया जिसदा कम्म अपणे अग्गें बद्धदे बहादुराँ जो आर्टिलरी कवर देणा था।

जुआनाँ कनै तिन्हाँ दे ज़रूरी समाने जो  'अमर' कनै 'सोनम' पोस्ट  तिकर पजाणे ताँईं  'चीता' हेलीकॉप्टराँ दो सौ ते ज्यादा डुआराँ भरियाँ थियाँ। तिसा ठाहरी आलू कनै फळ ठंडी च जमी करी पत्थराँ साँह्ईं हौई जाँदे कनै हथौड़े कन्नै भी नीं टुटदे थे। इस तांईं रासन टिन दे डब्बेयां च भेज्या गिया।  रिहर्सल करदे टैमें दो जुआन बर्फे दियाँ चेडाँ च म्हेसा ताँईं लुप्त होई गै।  बर्फे दिया पतळिया परता हेठ दो सौ फुट डुग्घी चेड़ भी छुप्पियो होई सकदी है। बर्फानी झंगड़ कुसी दी भी जान लई सकदा है जाँ फिरी सनो-ब्लाइंडनेस कुसी दियाँ भी हाखीं च म्हेसा ताँईं नेहरे दा सुरमा पाई सकदी है। परसीना दस्तानेयाँ कनै जुराबाँ च जमी नै बर्फ बणी करी उंगळियाँ गाळी सकदा है। हाई एल्टीट्यूड सिकनेस जिस्म दे अंगाँ जो फेल करी सकदी है।  सत्त दिन लग्गे थे म्हारेयाँ जुआनाँ जो माइनस पंजाह् डिग्री सेंटीग्रेड तिकर दे टेंप्रेचर दे माहौल च ढळणे ताँईं।

इतणी सख्त तियारी दे परंत 23 जून सन् 1987 दिया संझा सहीद सेकंड लेफ्टिनेंट राजीव पाँडे दी याद च  'ऑपरेशन राजीव' दी शुरुआत होई।  इक प्ळटून उन्हाँ रस्सियाँ जो तोपणे ताँईं निकळी जेह्डियाँ राजीव पाँडे होराँ दी  पैट्रॉल नै बह्नियाँ थियाँ। भारी बर्फबारी दिया बजह ते कमर तिकर डुग्घे बर्फ च सैह् प्ळटून भ्यागा चार बजे तिकर मातर किछ सौ मीटर ही चढ़ी सकी।  तिसा प्ळटूना जो सैह् रस्सियाँ नीं मिल्लियाँ कनै तिन्हाँ जो मुड़ी बेस कैम्प च औणा पिया था।  

24 जून दिया संझा अट्ठ बजे मेजर वीरेंद्र सिंह होराँ अपणी सारी दी सारी टीम लई करी चली पै थे। सूबेदार हरनाम सिंह होराँ दे दस्ते जो सेकंड लेफ्टिनेंट राजीव पाँडे होराँ दे बन्हेयो सैह् खूंटे कनै रस्सियाँ मिली गइयाँ थियाँ।  तिन्हाँ दी खुसी तौळी ही गुम होई गई जाह्लू तिन्हाँ तित्थू बर्फे च जम्मियाँ ल्हासाँ दिक्खियाँ।  सैह् ल्हासाँ सहीद सेकंड लेफ्टिनेंट राजीव पाँडे कनै तिन्हाँ दे साथियाँ दियाँ थियाँ।  तिन्हाँ ल्हासां जो बाद च तित्थू ते रिकवर करी लिया गिया था।

जिंञा कि पहले ते ही प्लान बणिह्यो थी, हमले ताँईं तिन्न टीमाँ तियार कित्तियाँ गइयाँ।  दस जुआनाँ दी पहली टीम सूबेदार हरनाम सिंह होराँ दी कमाण च सब्भते अग्गें थी।  सूबेदार संसार चंद होराँ दी टीम तिस ते ज़रा कि पिछें थी।  सब्भते पिछें इक रिज़र्व टीम थी जिसा दे कमांडर नायब सूबेदार बाना सिंह होराँ थे।  सूबेदार हरनाम सिंह होराँ दी टीम नब्बें डिगरी खड़िया चढ़ाइया पर गौह्णा लगी पई। सैह् अज्हें पंजाह् कि मीटर चढ़े थे कि पाकिस्तानियाँ तिन्हाँ गास अपणा फैर खोली दित्ता।  तिन्न जुआन मारे गै कनै कई जख्मी होई गै।  हादसे दे सिकार हरेक जुआन जो बेस तिकर लई जाणे ताँईं चार जुआनाँ दी ज़रूरत होंदी। बेस ते तिन्हाँ जो हेलीकॉप्टर पिछें लई जाँदे।  

भारत दे जुआन मुकम्मल जवाबी फैर नीं देई सके।  माइनस पंजी डिग्री टेम्परेचर च तिन्हाँ दे हथियार जाम होई गैयो थे। उप्पर बैठह्यो पाकिस्तानी अपणे हथियाराँ जो कैरोसीन दे स्टोवाँ नै गर्म करी नै फैर करा दे थे। तैह्ड़ी कैप्टन राम प्रकश होराँ भी तोपखाने दी कारगर कवर देणे च कामयाब नीं  रैहे थे। हौआँ दी स्पीड बड़ी भारी थी जिस दिया बजह ते गोळेयाँ जो सही नशाणे पर सटणा मुमकिन नीं था।  गोळे अपणेयाँ जुआनाँ गास भी फटी सकदे थे।

पाकिस्तानियाँ दी भारी गोळीबारी दे बावजूद मेजर वीरेंद्र सिंह होराँ अपणेयाँ साथियाँ कन्नै सिद्धे खड़े हेस्से जो चढ़णे च कामयाब रैह् कनै सैह् टॉप ते मात्र दो सौ मीटर तिकर जाई रैह्।  तिन्हाँ तित्थू बर्फ दे खड्डेयाँ च कनै लटकेयो बर्फे दे पिच्छें अपणे आपे जो छुपाई लिया। भुक्खे-तरिहायाँ जुआनाँ बड़ियाँ मुस्कलाँ नै सैह् दिन तित्थु ही कटी दित्ता था।

25 जून दिया राती नौ बजे सूबेदार संसार चंद होराँ दी टीम हमला करने ताँईं अग्गें बद्धी। मेजर वीरेंद्र सिंह होराँ दी टीम सूबेदार संसार चंद होराँ दी टीम जो अपणियाँ मसीन गनां कन्नै सपोर्ट करा दी थी। हथियाराँ जो कपूर जळाई करी गर्म रक्खेया जाह्दा था। तैह्ड़ी कैप्टन राम प्रकाश होराँ दियाँ तोपाँ भी कमाल दा कम्म करदियाँ रहियाँ। तिन्हाँ  तोपाँ तैह्डी इतणी अग्ग उगळी कि  दुस्मण  सिर नीं चुक्की सके।  सूबेदार संसार चंद होराँ दी टीम 26 जून दिया भ्यागा दो बजे दुस्मण दे पहले बंकर पर ग्रेनेडाँ दा हमला करी नै कब्जा करने च कामयाब रही।  टीम थकी गइह्यो थी पर तिन्हाँ अराम नीं कित्ता कनै पंज बजे दूजे बंकर पर भी कब्जा करी लिया।  तिन्हाँ बर्फे च पइह्याँ ख़तरनाक दराळां पार थियाँ कित्तियाँ कनै दुस्मण दी लगातार भारी फैरिंग थी झेलियो।  सूबेदार संसार चंद होराँ दे कई जुआनाँ दियाँ ल्हासाँ बर्फे दियाँ दराळां च देहियां गुम होइयाँ कि फिरी मिलियाँ ही नीं।  

सूबेदार संसार चंद होराँ दी रही-सही टीम टॉप पर 'कायद' पोस्ट दे नेडें पुज्जी गइह्यो थी।  रेडियो सैट दी बैटरी डिस्चार्ज होणे दिया बजह ते तिन्हाँ अपणा इक जुआन सनेहा देई करी मेजर वीरेंद्र सिंह होराँ व्ह्ली भेजेया अपर तिस जो पाकिस्तानियाँ गोळी मारी दित्ती।  तकरीबन सौ मीटर पिछें 'सैडल' पर बैठेयो मेजर वीरेंद्र सिंह होराँ कन्नै कम्युनिकेशन दा तिन्हाँ व्ह्ली कोई ज़रिया नीं रिहा।  तिन्न दिन होई गैह्यो थे तिन्हां व्ह्ली खाणे-पीणे ताँईं बड़ा ही घट समान रिहा था।  बर्फीली चोटियाँ गास तिन्हाँ दा साह कनै पसीना जमी करी बर्फ बणी जाह्दा था।

मेजर वीरेंद्र सिंह जाणदे थे कि तिन्हाँ दे जुआन तिसा उचाइया पर  मात्र इक चॉकलेट खाई करी इक दिन होर नीं टिकी सकदे थे।  जेकर मिशन कमयाब करना था ताँ  तिसजो तैह्डी ही पूरा करना था।  जेकर मौसम साफ होई जाँदा ताँ पाकिस्तानी फ़ौज जो होर कुमक मिली जाणी थी।  सूबेदार संसार चंद होराँ कन्नै कोई कॉन्टेक्ट नीं हौआ दा था।  पता नीं लगा था सैह् जींदे भी हन्न कि नीं।  मेजर वीरेंद्र सिंह होराँ अपणी अट्ठ जणेयाँ दी टीम कन्नै नायव सूबेदार बाना सिंह होराँ दी पंज जणेयाँ दी टीम जो जोड़ी करी कायद पोस्ट पर हमला करने दा फैसला कित्ता।

26 जून सन् 1987 दिया हछिया भ्यागा मेजर वीरेंद्र सिंह होराँ नायब सूबेदार बाना सिंह होराँ कन्नै जाई मिलणे ताँईं अपणे जुआनाँ जो लई करी रैंगदे होए 'सैडल' ते निकळे।  तिस बग्त नायब सूबेदार बाना सिंह होराँ दे होंसले पस्त हौआ दे थे।  तिन्हाँ दे साथी बमार थे कनै तिन्हाँ व्ह्ली खाण-पीण दियाँ चीजाँ दी घाट थी।  तिसा घड़िया तिन्हाँ जो देहा महसूस होया कि गुरू गोविंद सिंह जी तिन्हाँ जो गलाह्दे होण, "मैं तेरा  मतिहान लैह्दा है" — कनै  तिन्हाँ च फिरी जोस भरोई गिया।

दोपहराँ दा बग्त था पर नेह्रा था।  नायब सूबेदार बाना सिंह होराँ अपणे चार साथी लई करी हमला करणे ताँईं निकळी पै। तिन्हाँ चढ़णे ताँईं मुसकल रस्ता चुणेया ताँ कि तिन्हाँ गास दुस्मण दी नज़र नीं पोए। तिन्हाँ साह्मणे तकरीबन पंदरा सौ फुट खड़ी कंध थी। बर्फानी झंगड़, सख्त ठंड कनै रौसनी दी कमी तिन्हाँ जो दुस्मणा दियाँ नज़राँ ते बचाह्दे थे। दुस्मण सोची भी नीं सकदे थे कि तिन्हाँ हलाताँ च कोई पिछले पासे ते उप्पर गोह्णे दी हिम्मत करी सकदा था।  बाना सिंह कनै तिन्हाँ दे साथी बर्फे च लुकिह्याँ डुग्घियाँ धोखेबाज  चेडाँ  कनै दुस्मणां दियां नज़राँ ते बचदे-बचाँदे चढ़दे गै।  तिन्हाँ दे जिस्म थक्केयो थे पर दिमाग चत्तन थे।

कई घंटेयाँ दे परंत नायब सूबेदार बाना सिंह अपणे जुआनाँ सौगी टॉप पर जाई रैह्। तिन्हाँ दिक्खेया तित्थू पाकिस्तानियाँ दा सिर्फ इक बंकर था कनै अक्खें-बक्खें किछ ट्रेंच थे।  तिन्हाँ अपणे जुआनाँ जो दूंहीं हेस्सेयाँ च बंडी करी बंकर जो घेरा पाई दित्ता। तिस ख़तरनाक खराब मौसम च पाकिस्तानी बंकर दे अंदर दड़ी नै बैठह्यो थे। इकी पासे ते बाना सिंह होराँ छुपी करी रगडोंदे-रगडोंदे तिस बंकर दे  दरबाजे तिकर जाई पूज्जे।  तिन्हाँ लत मारी नै  दरबाजा चाणचक खोह्ली दित्ता। पाकिस्तानी हक्के-बक्के होई नै रही गै।  बाना सिंह होराँ फुर्तिया कन्नै हैंड ग्रेनेड अन्दर सट्टेया कनै दरबाजा झटपट बंद करी दित्ता।  दूजे पासे ते चुनी लाल होराँ अपणे साथियाँ कन्नै, ट्रेंचाँ च डट्टेयो पाकिस्तानियाँ गास धावा बोलीता। अंधाधुंध फैरिंग हौणा लगी पई। हत्थापाई होई।  खूब बैनट चल्ले। किछ पाकिस्तानी मारे गै, किछ ढळाना च फिसळी करी रिड़की गै कनै  किछ पाकिस्ताने बक्खी नह्ठी गै।  

हमले ताँईं चलणे दे चार घंटेयाँ अंदर नायब सूबेदार बाना सिंह दियें टीमे 'कायद' पोस्ट पर कब्ज़ा करी लिया। तिन्हाँ 'विक्टरी फ़लेयर' फैर करी दित्ता।  तितणे च ही मेजर वीरेंद्र सिंह होराँ दी टीम भी उप्पर आई गई।  तिन्हाँ पाकिस्तानी बंकर खोल्या। तिस अंदर पाकिस्तानी डिब्बाबंद खाणा भी था। सारेयाँ अंदर बैठी नै तिन्न दिनाँ परंत पहली बरी खाणा खाह्दा।

पाकिस्तानी ब्रिगेडियर परवेज़ मुशर्रफ जो अपणी तिस हार ते बड़ा दुःख होया। तिन्हाँ तिसा पोस्टा बक्खी पाकिस्तानी तोपाँ दे मुँह खोली दित्ते। अंधाधुंध फैरिंग कित्ती। ज़मीनी जवाबी हमला कित्ता पर भारत माता दे लाल  डटी रैह्। मेजर वीरेंद्र सिंह होराँ बुरी तरहाँ जख्मी होई गै पर सैह् तिसा हालता च भी कमांड करदे रैह्। पाकिस्तानियाँ जो पिच्छें हटणा पिया।  तित्थू मेजर वीरेंद्र सिंह होराँ जंगी बढ़त हासिल करी लइह्यो थी।  संझा दे पंज बजे तिकर चौकिया पर तिरंगा लहराणा लगी पिया था।

27 जून दिया भ्यागा ब्रिगेड कमांडर ब्रिगेडियर चंदन सिंह नुगयाल पोस्टा गास हैलीकॉप्टर ते उतरे। तिन्हाँ तिस न्यारी जित्त ताँईं सारेयाँ जो शाबाशी कनै बधाई दित्ती।  तिन्हाँ तिसा पोस्टा दा नाँ 'बाना पोस्ट' कनै रिज लाइन दा नाँ मेजर वीरेंद्र सिंह दे नाँयें पर 'वीरू सैडल' रक्खेया।

नायब सूबेदार बाना सिंह होराँ जो 'परमवीर चक्र' कनै सूबेदार संसार चंद होराँ जो 'महावीर चक्र' दित्ता गिया। तिसा लड़ाइया च सत्त 'वीर चक्र' पाणे वाळेयाँ च मेजर वीरेंद्र सिंह कनै सेकंड लेफ्टिनेंट राजीब पाँडे होराँ भी सामल थे।

बाना सिंह होराँ दा जन्म 6 जनवरी सन् 1949 जो जम्मू दे आरएस पुरा दे कदयाल ग्राँ च हौया था। सैह् 6 जनवरी सन् 1969 जो जम्मू एंड कश्मीर लाइट इन्फेंट्री दी अठमी बटालियन च सामल  होए।  तिन्हां हाई एल्टीट्यूड वारफेयर स्कूल, गुलमर्ग च स्पेशल ट्रेनिंग लइह्यो थी।  बाना सिंह होराँ 31 अक्टूबर सन् 2000 जो फ़ौज ते सूबेदार मेजर (ऑनरेरी कैप्टन) दे रैंक ते रटैर हौई करी अपणे ग्राँएं च जाई बस्से थे।

― भगत राम मंडोत्रा

References - Die Hard Indian ―Siachen, the world's highest battlefield. diehardindian.com/Siachen-the-worlds-highest-battlefield/