18. कैप्टन मनोज कुमार पांडे

 

कैप्टन मनोज कुमार पाँडे

(3 जुलाई 1999)

19 मार्च सन् 2021, शुक्रवार दे दिन भारत  दे थल सेना अध्यक्ष जनरल मनोज मुकुंद नरवणे उत्तर प्रदेश दे सीतापुर जिले दे ग्राँ रुढ़ा च आए थे।  तिन्हाँ दे तित्थू ओणे दा मकसद तिस ग्राँ च जन्मे इक परमवीर चक्र जित्तू भारत माँ दे लाल जो सरधांजली देणा था कनै तित्थू फ़ौज दी सूर्या कमाँड दी बणाइयो तिन्हाँ दी यादगार दा अरपण करना था।  तित्थू तिस सहीद दा सारा परुआर भी बैठेया था। जनरल नरवणे होराँ बोल्या था, "मैं बड़े आदरे कन्नै श्री गोपीचंद पाँडे कनै श्रीमती मोहिनी पाँडे अग्गें अपणा सिर झुकाँदा जिन्हाँ 'बटालिक दे हीरो' जो देहा पाळेया था कि सैह् नड़र, देसभक्त कनै मज़बूत इरादे वाळे बणे जेह्डे सिद्धे दुस्मण  दियाँ हाखीं च घूरदे थे।"

कैप्टन मनोज कुमार पाँडे दा जन्म तिस ग्राँएं दे बसिंदे श्री गोपीचंद पाँडे कनै श्रीमती मोहिनी पाँडे दे घरें 25 जून सन् 1975 दे दिन होया था। तिन्हाँ दे दो छोटे भाऊ कनै इक बैह्ण थी।  तिस ग्राँ दे लोक ग्लाँदे हन् कि सैह् वचपण ते ही बडे नड़र थे।

कैप्टन पाँडे होराँ दी स्कूली पढ़ाई रानी लक्ष्मीबाई मेमोरियल सिनीयर सैकंडरी स्कूल, लखनऊ कनै उत्तर प्रदेश सैनिक स्कूल, लखनऊ च होई थी।  सैह् पढ़ाई च बड़े होसियार थे।  खेलकूद च खूब हेस्सा लैंदे थे।   तिन्हाँ जो बॉक्सिंग कन्नै बॉडी बिल्डिंग दा खास सौक था।  सन् 1990 च जुनियर डिवीजन एन सी सी उत्तर प्रदेश डायरेक्टरेट दे सैह् बेस्ट कैडट चुणे गै थे।  स्कूल दी पढ़ाई खत्म करने दे परंत तिन्हाँ म्तिहान पास करी नै नेशनल डिफेंस अकैडमी, पूणे च दाखला लई लिया था।  नेशनल डिफेंस अकैडमी दे 90वें कोर्स च तिन्हाँ अपणी ग्रेजुएशन पूरी कित्ती थी। 

कैप्टन पाँडे होराँ अपणे बालकपणे ते ही फ़ौजी बर्दी पहनणे दे सुपणे लैंदे थे। एसएसबी इंटरव्यू दे बग्त जाह्लू  इंटरव्यूइंग अफसर होराँ तिन्हाँ ते पुच्छेया था कि सैह् फ़ौज च कजो जाणा चाँह्दे थे ताँ तिन्हाँ जवाब दित्ता था कि सैह् परमवीर चक्र  जितणे  ताँईं फ़ौज ज्वाइन करना चाँह्दे थे।  तिन्हाँ दे जवाबे सुणी नै इंटरव्यूइंग अफसर होराँ हास्सी पै थे अपर पाँडे होराँ एह् जवाब अपणे दिले ते दित्ता था।  बग्त ओंणे पर तिन्हाँ एह् सच साबित करी दित्ता था।

कैप्टन मनोज कुमार पाँडे होराँ जो इंडियन मिलिट्री अकैडमी ते पासआउट होणे परंत जून सन् 1997 बिच  11 गोरखा राइफल्स दी पहली बटालियन (1/11 जी आर) च कमीशन मिल्लेया था। पाँडे होराँ गोरखे ताँ नीं थे पर बहादरी कनै नड़रपण दे मामले च गोरखेयाँ ते घट  भी नीं थे।  भारत दी फ़ौज दे पहले फील्ड मार्शल एस एच एफ जे मानेकशा होराँ गोरखेयाँ दे बारे च इक बरी ग्लाया था,। "जेकर कोई सिपाही ग्लाए कि तिस जो डर नीं लगदा ताँ जाँ ताँ सैह् झूठ बोलदा है जां फिरी सैह् गोरखा है।"

1/11 गोरखा राइफल्स अपणी सियाचिन ग्लेशियर दी  तैनाती दी मुकरड़ मियाद पूरा करी नै पूणे दी पीस लोकेसन जो जाणे आळी थी।  बटालियन दी एडवांस पार्टी पूणे चली गइयो थी।  सारेयाँ जुआनाँ दे सियाचिन च इस्तेमाल होणे वाले गर्म कपड़े कनै साजो-समान बापस जमा होई चुक्केयो थे।  सियाचिन दा मौसम दुस्मणा ते जादा ज़ालिम होंदा है।  बटालियन थकी गइयो थी।  तकरीबन सारेयाँ जुआनाँ दा पंज किलो तिकर वज़न घटी गिया था।   कमांडिंग अफसर होराँ अपणे ज्यादातर जुआन,  होआ-पाणी बदळणे ताँईं, छुट्टी घली दित्तेयो थे। बटालियन दी नफरी बड़ी घट थी।  ठीक तिस बग्त बटालियन जो हुक्म मिल्लेया था कि तिन्हाँ सताबी ते सताबी,  पूणे दे बजाय बटालिक पासें  जाणा था जित्थू ते पाकिस्तान दी भारी घुसपैठ दी ख़बर ओआ दी थी।

भारत कनै पाकिस्तान दे तदकणे प्रधानमंत्रियाँ, अटल बिहारी बाजपेई होराँ कनै नवाज़ शरीफ़ होराँ, दी 21 फरवरी सन् 1999 दी 'लाहौर डिक्लेरेशन'  दे दसखताँ दी स्याही अज्हें ताजा ही थी।  बाजपेई होराँ दी लाहौर बस यात्रें  दूंहीं देसाँ दे बिच रिस्ते सधारने दी इक आस जगाई थी पर सच्चाई किछ होर ही थी। ठीक तिस बग्त पाकिस्तानी फौज भारत दे काश्मीर च घुसड़णे दे मनसूबे बणा दी थी। सन् 1999 दे मई महीने दे पहले हप्ते तिकर पाकिस्तानी फ़ौज मुशकोह, द्रास, काकसर कनै बटालिक सैक्टराँ च एलओसी ते चार ते अट्ठ किलोमीटर अंदर आई नै जमी करी बैठी गइयो थी। लेह पासें जाणे वाली सड़क पाकिस्तानी हथियाराँ दी सिद्धिया मारा पर थी।  तिन्हाँ दा मेन मकसद म्हारे लेह कनै सियाचिन दे सप्लाई रूट जो कटणा था।  किछ ख़ास-ख़ास जगहाँ च पाकिस्तानी मोर्चेबन्दी भारत दी फ़ौज दे तोपखाने कनै एयरफोर्स दी पोंह्च ते परें थी।  भारत दी फौज व्ह्ली उप्पर चढ़ी करी आमणे-साहम्णे मुठभेड़ दी लड़ाई लड़णे दे सिवा होर कोई चारा ही नीं रिहा था।  कारगिल दियाँ उच्चियाँ  धाराँ ते दुस्मणा जो खदेड़ने ताँईं भारत दिएं फौजें ऑपेरशन विजय चलाया था जेह्डा 26 जुलाई सन् 1999 च  भारत दी जित्त दे परंत खत्म होया था।

कैप्टन मनोज कुमार पाँडे होराँ दी बटालियन जो जुबार टॉप, कुकरथाम कनै खालूबार दे लाकेयाँ ते दुस्मणा जो टाह्णे दी ज़िम्मेदारी दित्ती गई थी। मनोज कुमार पाँडे होराँ जुबार टॉप पर कब्जा करने ताँईं भारत दी फ़ौज देयाँ हमलेयाँ च बढ़ी-चढ़ी करी हेस्सा लैणे वालेयाँ च सामल थे।

2 जुलाई सन् 1999 दे दिन 1/11 गोरखा राइफल्स दे कमांडिंग अफसर कर्नल ललित राय होराँ जो बटालिक सैक्टर दे  खालूबार दे पहाडाँ पर बणेयो  पाकिस्तानी बंकराँ दा सफाया करने ताँईं हुक्म मिल्लेया था।  कर्नल राय होराँ व्ह्ली तिस बग्त इक अफसर कनै सट्ठ जुआन थे।  सैह् 14 घंटे पैदल चल्ले थे।  जाह्लू तिन्हाँ दा मकसद 400 मीटर दूर रही गिया था ताह्लू तिन्हाँ गास आटोमेटिक हथियाराँ दा ताबड़तोड़ भारी फैर ओणा लगी पिया था।  सैह् फैर दूंहीं पासेयाँ ते ओआ दा था—उपरले पासे ते कनै बख्ले पासे ते।  

उच्चेयाँ पहाडाँ पर होणे वाळी तिस जंग च म्हारी फ़ौज इक साथ तिन्न-तिन्न दुस्मणा कन्नै  लड़ा दी थी—इक हड्डियाँ जो भी जमाई देणे वाळी ठंड,  दूजी 70-80 डिग्री खड़ी मुस्कल चढ़ाई कनै तीजी पाकिस्तानी फ़ौज जेह्डी पहाडाँ दियाँ चोटियाँ गास बणेयो मजबूत बंकराँ च मजे कनै म्हारे जुआनाँ दिया ताड़ा च बैठियो थी। सैह् पहाड़ गंजे थे।  तिन्हाँ गास कोई रुख-बूटा नीं था। पाकिस्तानी फ़ौज जो दूरा-दूरा तिकर भारत दी फ़ौज दी हरकत नज़र आई जाँदी थी।   

कर्नल राय होराँ, हालात दा जायजा लई करी, अपणे जुआन दो हेस्सेयाँ च बरोबर बंडी दित्ते थे। सैह् तिह् जुआन अप्पू कन्नै लई करी उपरले पासे दे पाकिस्तानी बंकराँ बक्खी गोह्णा लगी पै थे।  बख्ले पासे दे पाकिस्तानी  ठकाणेयाँ दा सफाया करने ताँईं  तिन्हाँ कैप्टन मनोज कुमार पाँडे होराँ कन्नै बाकी बचेयो तिह् जुआन भेजे थे।  तिस बग्त कर्नल राय होराँ अपणे बहादर अफसर जो खीरी बरी  जिंदा दिक्खेया था।

कर्नल राय होराँ दा अनुमान था कि बख्ले पासें दुस्मण दे सिर्फ दो बंकर ही थे पर बाद च पता चलेया था कि तित्थू तिन्हाँ दे छे संगर थे। बंकर कनै संगर च मोटा-मोटा फर्क एह् होंदा है कि बंकर कंक्रीट दे बणेयो होंदे हन् जिन्हाँ जो तोड़ना सान नीं होंदा है कनै संगर पत्थराँ दे चिणेयो होंदे हन् जेह्डे भारी गोळाबारिया कन्नै तौळे ढई जाँदे हन् पर छोटे हथियाराँ दा तिन्हाँ पर खास असर नीं होंदा है।  बंकराँ कनै संगराँ च दड़ह्यो दुस्मणा दा सफाया करने ताँईं ग्रेनेड बड़े कारगर होंदे हन् पर ग्रेनेड़ सटणे ताँईं तिन्हाँ दे नेडें जाणा पोंदा है।  ग्रेनेड़ अक्सर ज़मीना ते उप्पर ऊठी करी सटणा पोंदा है।  तिस बग्त जान जाणे दे चाँस मते होंदे हन्।  एह् कम्म कुसी माऊ दा कोई दिलेर जाया ही करी सकदा है।

जाह्लू कैप्टन पाँडे होराँ अपणे मिसन बक्खी जाणा लगे थे, दुस्मण दियाँ गोळियाँ दी झड़ी लगियो थी। तिन्हाँ कर्नल राय होराँ जो अपणा कम पूरा करने दे परंत ही हटणे दा भरोसा दित्ता था।  दुस्मण दी गोळाबारी पाँडे होराँ दिया पळटूना गास कहर ढाह् दी थी।  जुआनाँ दे जिस्माँ दे चित्थड़े उड्डा दे थे।  पाँडे होराँ जो सिर चुकणे दा मौका नीं मिल्ला दा था।  जाह्लू जुआन साह लैणे ताँईं पत्थराँ दिया आड़ा च बसोणा लगेयो थे, कैप्टन पाँडे होराँ फुर्तीले चीते साँहीं दुस्मणा बक्खी फैर करदे पत्थरे पचाँह् ते निकळी करी खुलिया जगहा पर आई गै थे।   तिन्हाँ पर दुस्मणा दा फैर ओणा लगी पिया था।  सैह् मुड़ी करी तरंत अपणे जुआनां व्ह्ली चली आए थे।  तिन्हाँ अपणे साथी जुआनाँ जो दस्सेया था कि तिन्हाँ खुले च निकळी करी दुस्मण दी गन पोजीसन दिक्खी लईयो थी कनै सैह् दुस्मणा जो तबाह करने ताँईं तरंत निकळा दे थे।  एह् गलाई करी सैह् निकळी गै थे। तिन्हाँ अपणे जुआनाँ जो एह् नीं ग्लाया था कि सैह् भी तिन्हाँ कन्नै ओण पर सारे जींदे बचेयो कनै चलणे काबल रैह्यो जुआन तिन्हाँ  पिच्छें-पिच्छें होई लै थे।  

सैह् आमणे-सामणे दा हमला था जिस च हमला करने वाळे जो अपणी जान दी वाजी लगाणा पोंदी है। इक बरी गल्लाँ ही गल्लाँ च कैप्टन पाँडे दी अम्मा होराँ तिन्हाँ जो ग्लाया था कि सैह् ताँ अफसर हन तिन्हाँ जो लड़ाई च अग्गें रैह्णे दी  ज़रूरत कजो पोणी थी, लड़णे दा कम्म ताँ जुआन करी सकदे थे।  तिन्हाँ अपणी अम्मा ते पुच्छेया था कि जे परुआरे गास मुसीबत ओए ताँ तिन्हाँ अपणे बच्चे अग्गें करने थे कि अप्पू अग्गें होणा था।  अम्मा दा जवाब था कि मुस्कला दिया घड़िया ताँ तिन्हाँ ही गाँह् होणा था।  कैप्टन पाँडे होराँ अपणिया अम्मा जो समझाया था कि तिन्हाँ दे जुआन तिन्हाँ दे बच्चेयाँ साँहीं ही थे सैह् अपणेयाँ जुआनाँ जो जंग च अप्पू ते गाँह् किंञा करी सकदे थे।

दुस्मण तकरीबन 17000 फुट दिया उचाइया पर बैठेयो थे।   सैह् 2 कनै 3  जुलाई दी बिचली रात थी।  न्हेरा था पर दुस्मण हर तिन्न-चार मिंट परंत इल्लुमिनेटिंग राउंड फैर करा दे थे। इल्लुमिनेटिंग राउंड तकरीबन तिन्न मिंट तिकर लौ करी नै राती च दिने साँहीं परगड़ा करी दिंदे हन्।  कैप्टन पाँडे होराँ दी टीम लगातार दुस्मणा दियाँ नज़राँ हेठ थी।  तिन्हाँ पर घणी गोळीबारी होआ दी थी पर भारत माँ दे सपूत जानी दी परुआह कित्ते बगैर खड़िया चढाइया चढ़दे जाह्दे थे।  कैप्टन पाँडे होराँ अपणा मिसन भ्याग होणे ते पहलें पूरा करने दी ठाणी लइयो थी।   तिन्हाँ साह्म्णे दुस्मणा दे छे संगर थे।   तिन्हाँ तित्थू तुरंत फैसला लिया था, खब्बे हत्थे पासे ते पहले चार संगर तबाह करने दी ज़िम्मेदारी अप्पू पर लई थी कनै सज्जे पासें पोणे वाळे बाकी दे दो संगराँ ते दुस्मणा दा सफाया करने दा कम्म हवलदार भीम बहादुर दीवान होराँ जो दित्ता था।  तिस ताँईं कैप्टन पाँडे होराँ अपणेयाँ जुआनाँ जो दो हेस्सेयाँ च बंडी दित्ता था। इक हेस्सा हवलदार भीम बहादुर दीवान होराँ कन्नै भेजया था कनै इक हेस्सा अप्पू कन्नै रक्खेया था।

खीरी हमला करने ते पहलें कैप्टन पाँडे होराँ, दुस्मण दे घणे फैर दे बावजूद, अपणी टुकड़िया जो इक फायदेमंद पोजीसना पर लई आए थे। सैह् दुस्मणा दे संगराँ नेडें आई रैह् थे।  ताह्लू सैह् पूरे जोसे नै  अपणी बटालियन दा जुध्द घोष 'जय महाकाली आयो गोरखाली' करदे होए दुस्मणा पर कहर बणी नै टुटी पै थे।  

तिन्हाँ किह्ले हत्थें पहले संगर च दड़ह्यो दो दुस्मणां दा सफाया करी दित्ता था।  हुण दूजे संगर दी बारी थी।  तिस च भी दो पाकिस्तानी थे।  कैप्टन पाँडे होराँ तिन्हाँ जो भी म्हेसा ताँईं सुआई दित्ता था।  जाह्लू सैह् त्रिये संगरे पर झपटणे वाळे थे तिन्हाँ गास दुस्मणां गोळियाँ दी झड़ी लगाई दित्ती थी।  कैप्टन पाँडे  होराँ दा कंघा कनै जंघ बुरी हालें जख्मी होई गै थे।  जख्माँ ते खूनें दे फुआरे फुट्टा दे थे।  सैह् तिसा हालता च भी चौथे संगरे बक्खी लपके थे। तिन्हाँ दे साथी जुआनाँ तिन्हाँ जो बसोणे ताँईं ग्लाया था कनै चौथे संगर जो तवाह करने दी इज़ाजत मंगी थी।  अपर कैप्टन पाँडे होराँ नीं मन्नै थे।  तिन्हाँ चौथे संगर पर धावा बोलीता था।  तिन्हाँ संगर दे अंदर इक ग्रेनेड सटी दित्ता था।  ग्रेनेड फटणे जो घट ते घट चार सकिंट लगणे थे। ग्रेनेड फटेया था कनै संगर दे अंदर दड़ेह्यो सारे पाकिस्तानी मारे गै थे पर ग्रेनेड फटणे ते पहलें तिस संगर ते इक  मसीनगन दा बर्स्ट कैप्टन पाँडे होराँ दे हेल्मटे गास आई बज्जेया था।  हेल्मटे च तिन्न छींडे पई गै थे। पाँडे होराँ गिरी गै थे।  पोंदेयाँ-पोंदेयाँ तिन्हाँ अपणे साथियाँ जो हुक्म दित्ता था, "ना छोड़नू" (छड़दे मत)।  भारत माँ दा इक बहादुर सपूत 24 साल दी उमरा च सहीद होई गिया था।

कैप्टन मनोज कुमार पाँडे होराँ अपणिया डायरिया च इक्की ठाहरी लिक्खेया था, "जे खुद जो साबित करने ते पहलें मिंजो मौत आई गई ता कसम से मैं मौत भी मारी देणी है।"   पाँडे होराँ  मौत ओणे ते पहलें ही अपणे आपे जो साबित करी दित्ता था। तिन्हाँ परमवीर चक्र जित्ती लिया था पर तिस जो लैणे तांईं सैह् नीं  रैहे थे। तिन्हाँ अपणियां अम्मा कन्नै वायदा कित्तेया था कि तिन्हाँ अपणे 25वें जन्म दिनें जो घरें जरूर ओणा था। सैह् घरें आए ज़रूर थे पर तरंगे च लपटोई करी।

कैप्टन पांडे होराँ अपणी कुर्बानी देई करी कारगिल दे जंग जो इक नोआं मोड़ देई गै थे। जित्ताँ दा इक सिलसिला सुरू होई गिया थाा। किछ दिनाँ च सारे खालूबार ते दुस्मणा दा सफाया होई गिया था।

―भगत राम मंडोत्रा