11. लेफ्टिनेंट कर्नल अर्देशिर बर्जोरजी तारापोर

लेफ्टिनेंट  कर्नल अर्देशिर बर्जोरजी तारापोर

(16 सितंबर 1965)

सन् 1965 दे अगस्त महीने दा खीरी हप्ता। तिस बग्त 17 हॉर्स पंजाब दे कपूरथला च थी।   रेजीमेंट जस्न मना: दी थी।  तिन्हाँ इक रेजिमेंटल टूर्नामेंट जित्तेया था।  राती दे 10 बजणे जो थे।  अफसर मेस च पार्टी जोराँ पर थी।  हॉल च अफसर कनै जनानियाँ डांस करा दे थे। खुसियाँ दा आलम था।  ताह्लू रेजिमेंट दे एडजुटेंट कप्तान सुरींदर सिंह आए।  तिन्हां नचणे च मस्त अपणे कमांडिंग अफसर लेफ्टिनेंट कर्नल ए बी तारापोर होराँ दे कंन्धे च हल्का देहा ठोह्लू लाया कनै कन्नें च किच्छ ग्लाया।  दोयो अफसर इक कमरे च चली गै।  रेजीमेंट दे अफसराँ च कन्नो-सन्नी होणा लगी पई कनै तिसते परंत इक-इक करी नै सारे अफसर मेस ते बाहर चली गै थे। तकरीबन 10 बजे पार्टी खत्म होणे दा एलान होई गिया था। अगलिया भ्यागा 2-3 बजे टैंकाँ दी गड़गड़ाहट सुणोह्णा लगी पई। टैंक रेलवे स्टेसने बक्खी जाह्दे थे।

दरअसल 17 (पूना) हॉर्स जो पच्छमी बॉर्डर पर सांबा बक्खी जाणे दा  हुक्म उपरा ते आई गिह्या था। रेजीमेंट जो ट्रैना च लोड होणे दा टैम मिली गिह्या था।  रेजीमेंट दे चोंह् पासें चारदीवारी होणे दिया बजह ते टैंकाँ जो मुड़ी करी फेरा पाई जाणा पोआ दा था।  तिन्हाँ जो ट्रैना पर लोड करने ताँईं देरी होआ दी थी।  लेफ्टिनेंट कर्नल तारापोर होराँ कन्ध तोड़ने दा हुक्म देई दित्ता ताकि रेजीमेंटा दी लोडिंग दित्तेयो टैमे तिकर होई सके।  

तैह्डी ही रेजीमेंट लोड होई करी जाणे जो तियार होई गई।  लेफ्टिनेंट कर्नल तारापोर होराँ दी मेमसाब सारियाँ जणासाँ जो रेलवे टेसन लई गैह्यो थे।  ट्रैन चलणे आळी होई ताँ लेफ्टिनेंट कर्नल तारापोर होराँ इक खुल्ले फ्लैट रेल डब्बे पर आई करी अपणी घरेवाळिया समेत सारियाँ औरताँ जो सलूट दित्ता। तिन्हाँ सोगी सारेयाँ अफसराँ कनै जुआनाँ भी सलूट कित्ता था।  तिस वक्त तिन्हाँ कन्नै मेजर अजय सिंह, कप्तान जसबीर सिंह कनै कप्तान सुरिंदर सिंह थे।  मेजर अजय सिंह बाद च लेफ्टिनेंट जनरल दे रैंक ते रटैर होए कनै तिस दे परंत असम दे गवर्नर भी रैह्। 

सैह् तिन्हाँ दा विदाई सलूट था।  तिन्हाँ जो पता था―जाणे वाळेयाँ च सारेयाँ मुड़ी नै नीं औणा है।

लेफ्टिनेंट कर्नल तारापोर होराँ दा जन्म 18 अगस्त सन् 1923 बिच मुंबई च होया था।  तिन्हाँ दे पुरखे रतनजीवा होराँ, छत्रपति शिवाजी महाराज दी फ़ौज दे जरनैल  थे।  छत्रपति शिवाजी महाराज होराँ अपणे सेनापति रतनजीवा होराँ जो 100 ग्राँ इनाम दित्तेयो थे जिन्हाँ च तारापोर नाँयें दा इक बड्डा ग्राँ भी सामल था। तिन्हाँ दे नाँ कन्नै 'तारापोर' जुड़णे दी बजह एह् ही थी।  लेफ्टिनेंट कर्नल तारापोर होराँ दे बापू बर्जोरजी होराँ तदकणी हैदराबाद रियासत दे कस्टम डपार्टमेंट च कम्म करदे थे। 

लेफ्टिनेंट कर्नल तारापोर अपणे माँ-पियो दी मंझली लुआद थे।  तिन्हाँ  दी इक बड्डी बैह्ण कनै इक छोटा भाऊ था।  तारापोर होराँ जो प्यारे नै 'आदी' करी नै बुलाया जाँदा था। तिन्हाँ अपणी मैट्रिकुलेशन तिकर दी पढ़ाई सरदार दस्तूर बॉयज बोर्डिंग स्कूल, पूणे ते सन् 1940 च पूरी कित्ती थी। सैह् अपणे स्कूल देयाँ दिनाँ च पढ़ाई ते जादा खेलकूद च रूचि लैंदे थे। तारापोर होराँ इक बद्धिया स्पोर्ट्समैन थे। तिन्हाँ जो एथलेटिक्स, मुक्केबाजी, तैराकी, टेनिस कनै क्रिकेट च खरी महारत हासिल थी।

तारापोर होराँ मैट्रिक दे परंत  हैदराबाद रियासत दी फ़ौज च कमीशन दा मतिहान पास करी नै ऑफिसरज ट्रेनिंग स्कूल, गोलकोंडा च दाखला लई लिया था। तिन्हाँ दी इच्छा बख्तरबंद रेजीमेंट च जाणे दी थी, जिस च टैंकाँ कन्नै जंग लड़ी जांदी है अपर तिन्हाँ जो 01 जनवरी सन् 1942 दे दिन 7वीं हैदराबाद इन्फैंट्री च कमीशन मिली गया था। 

तारापोर होराँ जो आर्मड रेजिमेंट च जाणे दा अपणा सुपना सच करने दा मौका तौळा ही मिली गिया।  इक दिन हैदराबाद स्टेट फोर्सेज दे कमांडर-इन-चीफ मेजर जनरल एल एडरूज तिन्हाँ दिया बटालियना दा मुआयना करा दे थे।   तारापोर दी कंपणी रोज़मर्रा दी सिखलाई दे दौरान ग्रेनेड सटणे दा भ्यास करा दी थी। इक सिपाही ग्रेनेड सटदे टैमे घबराईया कनै  सेफ्टी पिन निकाळने दे परंत ग्रेनेड तिसदे हत्थे ते फिसळी करी मोर्चे अन्दर ही पई गिया।  नोजुआन लेफ्टिनेंट 'आदी' तरंत मोर्चे च कुद्दी गै कनै तिन्हाँ फुर्तिया नै ग्रेनेड चुक्की करी बाहर सटी दित्ता।  कोई बड्डा नुकसान तां नी होया पर ग्रेनेड होआ च फटणे दे कारण लेफ्टिनेंट 'आदी' जख्मी होई गै थे। एह् सब्भ किच्छ मेजर जनरल एल एडरूज होराँ दे साह्मणे होया था।   मेजर जनरल एल एडरूज होराँ तिन्हाँ जो सद्दी करी तिन्हाँ दी हिम्मत कनै फुर्ती ताँईं साबासी दित्ती थी।  तारापोर होराँ तिस मौके दा फायदा ठुआया तिन्हाँ अपणे कमांडर-इन-चीफ साह्म्णे अरज कित्ती कि तिन्हाँ जो बख्तरबंद रेजिमेंट च बदळी कित्ता जाए।  तिन्हाँ दी अरज मनोई गई कनै तिन्हाँ दी बदळी फर्स्ट हैदराबाद इम्पीरियल सर्विस लांसर्स च होई गई थी।

दूजी आलमी जंग दे बग्त तिन्हाँ जो मिडल-ईस्ट च भेज्या गिया था।  भारत आजाद होया कनै  हैदराबाद दी रियासत भारत कन्नै मिलाई लई गई ताँ तिन्हाँ जो  1 अप्रैल सन् 1951 जो पूना हॉर्स च सामल कित्ता गिया।  सैह् मेहनती कनै लायक अफसर थे।  तिन्हाँ टैमे पर अपणे प्रमोशन लै कनै सन् 1965 दे भारत-पाकिस्तान जंग दे टैमें सैह् अपणी रेजीमेंट दे कमांडिंग अफसर थे।

भारत-पाकिस्तान दिया दुस्मणिया दी खास बजह म्हेसा जम्मू-कश्मीर दा मुद्दा  रिहा। दूंहीं मुलखाँ दे बिच 'सीज फैर' रिहा—पर  सिर्फ कागदाँ च।  तकरीबन हर रोज सरहदाँ पर बंदूकाँ अग्ग गुळदियाँ¹ रैंह्दियाँ हन् कनै साँत घाटियाँ च बम्बाँ दे टळाह्केयाँ² दे परसद्दे³ सुणोंह्दे रैंह्दे हन्न।

सन् 1947-48 च पाकिस्तानियाँ जम्मू-कश्मीर दा इक बड्डा हेस्सा अपणे कब्जे च लई लिया था कनै बाकी बचेह्या हेस्सा म्हेसा तिन्हाँ दियाँ हाखीं च रड़कदा रैंह्दा रिहा है।  सैह् तिस गास अपणा हक जताणे दा कोई भी मौका हत्थे ते नीं जाणा दिंदे हन्न।   इस ताँईं सैह् दलील दिंदे हन्न कि जम्मू-कश्मीर च मुसलमानाँ दी मेजोरिटी है तिसा बजह ते तिस पर पाकिस्तान दा हक बणदा है।

सन् 1965 च पाकिस्तान, फ़ौजी लिहाज ते, भारत ते जादा मज़बूत था। पाकिस्तानियाँ  व्ह्ली बेहतर हथियार, टैंक कनै हौआई जहाज थे। पाकिस्तान सीटो (SEATO) कनै सैंटो (CENTO) दा मेंबर था।  तिन्हाँ दिया पिट्ठी पर अमरीका कनै ब्रिटेन दे हत्थ थे।  दुएं पासें  1962 दे भारत-चीन जंग च भारत  दी करारी हार होइयो थी।  फ़ौज दा मोराल डाउन था। तदकणे⁴ भारत दी नॉन एलाइंड पॉलिसिया दिया बजह ते अमरीका कनै किछ पच्छमी देस भारत ते छंग्घोई⁵ बैठेयो थे।  भारत अपणी फ़ौज ताँईं नोंयें हथियाराँ दी  खरीदारी करा दा था कनै भारत दी फ़ौज नोंयें सिरे ते सिखलाई करने च लगिह्यो थी।  

एह् दिक्खी-सुणी करी तदकणे⁴ पाकिस्तानी हुक्मरानाँ, प्रेजीडेंट फील्ड मार्शल मुहम्मद अयूब खान कनै तिन्हाँ दे फॉरेन मिनिस्टर जुल्फिकार अली भुट्टो होराँ, सोचेया कि  तिन्हाँ ताँईं कश्मीर हथियाणे दा तिस बग्त ते बद्धिया मौका नीं मिलणा। अपर पाकिस्तानियाँ जो इक्की गल्ला दी खबर नीं थी — सैह् एह् कि भारत व्ह्ली भले ही बद्धिया हथियार नीं थे पर तिन्हाँ व्ह्ली अव्वल दरजे दे अफसर कनै जुआन थे।

आखिर पाकिस्तानी हुक्मरानाँ भारत पर हमला करी ही दित्ता। सन् 1965 दे भारत-पाकिस्तान जंग, जेह्डी 23 सितम्बर सन् 1965 जो खत्म होई थी, जो मोटे तौर पर तिन्न हेस्सेयाँ च बंडी सकदे हन्न।  पहले हेस्से च, जेह्डा 5 अगस्त ते सुरू होया था, पाकिस्तानी घुसपैठिए, जिन्हाँ च मुजाहिद कनै पाकिस्तानी फ़ौजी सामल थे, कश्मीर घाटी कनै राजौरी-पूंछ दे इलाके च घुसड़ी आए।  पाकिस्तानियाँ इस जो 'कश्मीर दी आजादी दी जंग' दा नाँ दित्ता था।  भारत सरकारें भी  27 अगस्त सन् 1965 जो जंग दा एलान करी दित्ता था।

पाकिस्तान जो मीद थी कश्मीरियाँ तिन्हाँ दा साथ देणा है। अपर जाह्लू तिन्हाँ दा सोचेया सही नीं होया था ताँ, जंग दे दूजे मरहले च, तिन्हाँ 1 सितम्बर जो छम्ब सेक्टर च भारत दे राजौरी पासें, टैंकाँ कनै हौआई जहाजाँ दी मदत कन्ने, फ़ौज दा इक बड्डा हमला करी दित्ता।  तिस जंग दा तीजा कनै खीरी हेस्सा ताह्लू सुरू होया जाह्लू भारत दी फ़ौज इंटरनेशनल बॉर्डर टप्पी करी 6 सितम्बर जो, पाकिस्तान दे दूजे बड्डे सहर लाहौर बक्खी अग्गें बद्धी गई थी। नतीजा एह् होया कि जंग बॉर्डर दे सारेयाँ सेक्टराँ च राजस्थान दे रेगिस्तान तिकर फैली गई थी।

खेमकरण सेक्टर च भारत जो तोड़ने दी पाकिस्तान दी इक बड्डी कोसस नाकाम रही। सियालकोट सेक्टर च भारत दा जवाबी हमला किच्छ किलोमीटर पाकिस्तान दे अन्दर जाई नै रुकी गिया।

सियालकोट सेक्टर च भारत दे इक परमवीर सपूतें पाकिस्तानी फ़ौज जो बग्त पाई दित्ता था—सैह् थे मसहूर  टैंक कमांडर लेफ्टिनेंट कर्नल ए.बी. तारापोर।

साँबा ते अग्गें इक्की ग्राँएं बक्खें  ठहरियो पूना हॉर्स बड्डिया बेसब्रिया कन्नै  अगले हुक्म दी निहाळ करा  दी थी। आखिर  इक राती तिन्हाँ जो बॉर्डर पार करने दा हुक्म मिली गिया।  पूना हॉर्स दे टैंक पाकिस्तान दे सियालकोट पासें  निकली पै।  पाकिस्तानी ग्राँ दे लोक, इक दे पिच्छें इक लैण लाई जाँदेयाँ 45 टैंकाँ जो, बड्डे अचरजे कन्नै दिक्खा दे थे।  तिन्हाँ जो पता नीं था कि सैह् भारत दे टैंक थे।  तारापोर होराँ  वायरलेस पर सारेयाँ टैंकाँ जो हिदायत दित्ती थी, 'असाँ दी लड़ाई पाकिस्तानी फ़ौज कन्नै है।  असाँ बेगुनाह मर्द, जणासाँ कनै बच्चेयाँ कन्नै नीं छोह्णा है।'   

सियालकोट पाकिस्तान दा मजबूत गढ़ था।  तिस पर कब्जा करने ते पहलें चाविंडा जो जित्तणा ज़रूरी था।  चाविंडा दी लड़ाई दा पहला दिन था। लेफ्टिनेंट कर्नल तारापोर होराँ अपणे नंबर दो, मेजर निरंजन सिंह चीमा, जो बुलाबा भेज्या। मेजर चीमा होराँ जो लगेया कि  कमांडिंग अफसर होराँ तिन्हाँ जो रणनीति पर चर्चा करने तांईं सद्देया होंगा पर मेजर चीमा अपणे सीओ दे बोल सुणी करी हैरान रही गै थे।  लेफ्टिनेंट कर्नल तारापोर होराँ तिन्हाँ जो दस्सेया था कि जेकर सैह् जंग दे मैदान च मारे जाह्ण ताँ क्या-क्या करना है — 'मेरा खीरी संस्कार जंग दे मैदान च ही करना।  मेरी परेयर बुक मेरिया अम्मा जो देणी, मेरी चैन मेरिया लाड़िया जो देणी,  अंगूठी  मेरिया बिटिया जो देणी कनै मेरी ब्रेसलेट कनै पेन मेरे पुत्रे जो देणे।'  तिन्हाँ गाँह् ग्लाया था, 'कनै निरंजन मेरे पुत्रे जो ग्लाणा कि सैह् फौज च भर्ती होए।'  तिस्ते ठीक पंज दिन परंत, 16 सितंबर सन् 1965 जो, लेफ्टिनेंट कर्नल तारापोर होराँ जंग दे मैदान च  दुश्मण दे तोपखाने दा गोळा लगणे पर सहीद होई गै थे।

लेफ्टिनेंट कर्नल तारापोर होराँ नेपोलियन जो बड़ा मनदे थे।  तिन्हाँ नेपोलियन दे बारे च मतियाँ सारियाँ किताबाँ पढ़ी छड्डियां थियाँ।  अपणे अफसराँ कनै जुआनाँ कन्नै गल्लबात करदिया बेला सैह् मती बरी नेपोलियन दी मसाल दिंदे थे।

सन् 1965 दे भारत-पाकिस्तान जंग दी सब्भ ते घमसाण टैंक लड़ाई सियालकोट सैक्टर दे फिल्लोरा च लड़ी गई थी।  फिल्लोरा दी लड़ाई 10 सितंबर जो सुरू होई थी।  11 सितंबर दे दिन 17 हॉर्स जो फिल्लोरा पर कब्जा करने तांईं टैंकाँ दा हमला करने दा हुक्म मिल्लेया।  लेफ्टिनेंट कर्नल तारापोर होराँ फिल्लोरा दे पिच्छले पासे ते चाणचक  टैंक हमला करने दी स्कीम बणाई थी।

तिस सेक्टर च भारत दा फर्स्ट आर्म्ड डिवीजन अपणियाँ चार आर्म्ड रेजिमेंटाँ कन्नै हमलावर था।  भारत दे टैंक बगैर रोकटोक ते पाकिस्तान दे अंदर बद्धदे जाह्दे थे।  11 सितंबर दे तकरीबन 11 बजे  भारत दी अग्गें बद्धती फ़ौजा गास पाकिस्तानी एयरफोर्स दा  पहला हमला होया।  ताह्लू तिकर पाकिस्तानियां जो पता ही नीं था कि भारत दी फ़ौज तिन्हाँ दे मुल्खे च तितणा अंदर आई गइयो थी।  पाकिस्तानियाँ भारत दी अग्गें बद्धदी फ़ौजा गास चाणचक होआई हमला कित्ता।  भारत दी टैंक टुकड़ियाँ दे बनिस्बत इन्फेंट्री कनै लॉरी टुकड़ियाँ जो बहोत भारी नुकसान झेलणा पिया।  भारत दी दो टैंक रेजीमेंटाँ 16 कैवलरी कनै हॉडसन हॉर्स दा कत्लेआम होइया।  अपणे टैंकाँ दे  कुपोलेयाँ पर खड़ोत्यो कई भारत माँ दे लालाँ जो बंम-गोळियाँ लगियाँ कनै सैह् तित्थू ही सहीद होई गै जाँ फिरी ज़ख़्मी होई गै। खळबळी मची गई थी।

पाकिस्तानी पैटन टैंकाँ दा सामणा करा दियाँ भारत दियाँ  आर्म्ड रेजिमेंटाँ 16 कैवलरी कनै हॉडसन हॉर्स दे टैंक घमसाण होआई हमलेयाँ दिया बजह ते पिच्छें मुड़दे सुज्झणा लग्गे।  जुआनाँ दे होंसले डगमगाणा लग्गी पै थे। जाह्लू तारापोर होराँ एह् हालात दिक्खे ताँ तिन्हाँ, अपणे कमांडर दे हुक्म बगैर,  पूना हॉर्स दे टैंक इक घणघोर डरौणे तुफानें सांह्ईं गाँह् लई अंदे कनै सैह् पाकिस्तानियाँ पर कहर बणी करी टुट्टी पै थे।  बड़ा खुंखार अटैक था। चोंह् पासें धूं ही धूं सुज्झा दा था।  पहलैं ही घस्सें पाकिस्तान दे 13 टैंक तबाह करी दित्ते गै। इक घणघोर जंग चलदी रही।  आख़िर पाकिस्तानी फ़ौज जो चाविंडा पासें पिच्छें हटणा पिया कनै 11 सितंबर दिया संझा तकरीबन साढ़े तिन्न बजे  फिलौरा  पर भारत दा कब्जा होई गिया था।  पाकिस्तान दी 11 कैवलरी दे टैंकाँ  भारत दी 17 हॉर्स जो करारी टक्कर दित्ती थी अपर तिन्हाँ दे इतणे जादा टैंक बर्बाद होई गै थे कि तिसदे बाद सैह् मुकम्मल रेजिमेंट दे तौर पर लड़णे काबल ही नीं रैह् थे।

लेफ्टिनेंट कर्नल तारापोर होराँ तित्थू ज़ख़्मी होई गै थे। बम्ब दी इक छींगड़ तिन्हाँ दिया खब्बिया बाहीं च आई बज्जी जिसते इक डुग्घा घाओ होई गिया था।  सैह् अपणी बाँह् ल्हाई नीं सकदे थे।  बाँह् सलिंग च पाणा पई गई थी।

फिलौरा जित्तणे परंत तित्थू ब्रिगेड कमांडर कनै जीओसी, 17 हॉर्स जो मुबारकबाद देणा आए। तिन्हाँ तारापोर होराँ जो साबासी दित्ती।  रेजिमेंट दे बहादुराँ जो नाँम देणे दी गल्ल चल्ली ताँ तारापोर होराँ जवाब दित्ता था कि सैह् ताँ अपणा फ़र्ज़ नभा दे  थे, नाँम  लैंणे ताँईं नीं लड़ा दे थे।  जाह्लू तिन्हाँ जो ज़ख़्मी होणे दी बजह ते पिच्छें जाणे जो बोल्या गिया ताँ तिन्हाँ नांह् करी दित्ती थी।  तिन्हाँ ग्लाया था कि अज्हें तिन्हाँ ताँईं चाविंडा दी लड़ाई लड़णी बाकी थी।

लेफ्टिनेंट कर्नल तारापोर दी अगुआई च 17 हॉर्स नै दुस्मण दे टैंकाँ  जो करारी हार देई कर 14 सितंबर जो वज़ीरवाली पर कब्जा करी लिया था। 

इक रणनीति दे तहत भारत दिएं फ़ौजें चाबिंडा पर  इन्फेंट्री अटैक करना था कनै 17 हॉर्स नै चाबिंडा जो घेरा पाणा था। तारापोर होराँ घेरा पाणे दा कम्म अपणे 'सी' स्क्वाड्रन  जो दित्ता था जिस जो मेजर (बाद च लेफ्टिनेंट जनरल कनै असम दे राज्यपाल)  अजय सिंह कमाँड करा दे थे।  मेजर अजय सिंह  9 गढ़वाल दी मदत ताँईं अपणा स्क्वाड्रन लई करी चली पै थे।  भारत दी फ़ौज जो इस गल्ला दा इल्म ही नीं था कि रस्ते च पोणे वाळे बुत्तर डोगराँडी दे बणे बिच छुपी नै दड़ेह्यो पाकिस्तानी टैंक तिन्हाँ जो निहाळा दे थे। जाह्लू मेजर अजय सिंह होराँ बुत्तर डोगराँडी दे नेडैं आए तिन्हाँ गास पाकिस्तानी टैकाँ अग्ग बरसाणा सुरू करी दित्ती थी।   पाकिस्तानी पैटन टैंक अंडर कवर थे कनै भारत दे टैंक खुल्लिया जमीना पर थे।  किछ ही पलाँ च मेजर अजय सिंह दे 10 सैंचूरियन टैंकाँ च 6 टैंकाँ जो पाकिस्तानी गोळे आई बज्जे थे। 

मेजर अजय सिंह होराँ वायरलैस पर अपणे कमांडिंग अफसर होराँ जो जंग दी हालत सणाई थी कनै मदद भेजणे ताँईं अरज़ कित्ती थी। सुनेहा सुणदेयाँ ही तारापोर होराँ रेडियो पर अपणे इक होर स्क्वाड्रन जो मेजर अजय सिंह दी मदत ताँईं जाणे दा हुक्म दित्ता था कनै अपणा टैंक लई करी अप्पू भी लड़णा चली पै थे। तिन्हाँ दा हुक्म जंग दी हबड़ा-तबड़ी च अग्गें पास होया था या नीं कुसी जो पता नीं पर कमाँडिंग अफसर दे टैंक जो बुत्तर डोगराँडी बक्खी जाँदे दिक्खी आसे-पासे दे किच्छ टैंक तिन्हाँ पिच्छें होई लै थे।

मेजर अजय सिंह होराँ व्ह्ली लड़नें काबल 5 टैंक थे।  तिन्हाँ कन्नै सीओ दा इक होर टैंक आई मिल्लेया था कनै सोओ सोगी आयो 'ए' स्क्वाड्रन दे  तिन्न टैंक जोड़ी करी नौ टैंक होई गै थे।  तिन्हाँ मिली करी पाकिस्तान दे छिपी करी बार करा दे छे दे छे पैटन टैंक बरबाद करी दित्ते थे। 16 सितंबर दे दिन जस्सोरन कनै  बुत्तर डोगराँडी पर भारत दा कब्जा होई गिया था।

लेफ्टिनेंट कर्नल तारापोर होराँ इक नड़र टैंक कमाँडर थे। सैह् बेधड़क होई अपणे टैंके दा कुपोला खोली करी खड़ोई नै जंग लड़दे थे। सैह् दुस्मण दे घणघोर हमलेयाँ दे दौरान ठंडे दमाके कन्नै अपणा कम्म करदे रैंह्दे थे।  लड़ाई दे हर मरहले च सैह् अग्गें रही करी अपणी रेजीमेंट जो कमाँड करदे थे। जुआन तिन्हाँ जो प्यार करदे थे कनै अपणे जुआनाँ दा सैह् भी बड़ा ख्याल रखदे थे।   जंग दे मैदान च तिन्हाँ दे टैंके जो  कई बरी गोळे आई बज्जे थे।  सैह् कई बरी ज़ख़्मी भी होए थे पर तिन्हाँ 6 दिन तिकर डटी करी दुस्मणा दा सामह्णा कित्ता था कनै तिन्हाँ जो पिच्छें मोड़ेया था।  तिन्हाँ दी कमाँड च 17 हॉर्स नै दुस्मण दे 60 टैंक तोड़े थे जबकि तिन्हाँ दे कुल 9 टैंक बरबाद होए थे।

16 सितंबर 1965 दी संझ ढळणा लगियो थी। बुत्तर डोगराँडी जित्तणे दे परंत  लेफ्टिनेंट कर्नल तारापोर होराँ पूजा-पाठ करी नै अपणे टैंके पर खड़ोई करी अपणे इंटेलिजेंस अफसर कप्तान जसबीर सिंह होराँ कन्नै सलाह-मसवरा करा दे थे कनै जंग दे हालात दा जायज़ा लै दे थे।।  तिन्हाँ दे सज्जे हत्थें चाही दा कप था।  ताह्लू पाकिस्तानी तोपखाने दा इक गोळा सिद्धा आई करी तिन्हाँ जो  लग्गेया था।  टैंके जो अग्ग लगी गई थी।  तारापोर होराँ कनै तिन्हाँ दे इंटेलिजेंस अफसर सहीद होई गै थे। तैह्डी संझा 6 बजे इक लिसकदा सूरज ढळी गिया था।

भारत सरकारें लेफ्टिनेंट कर्नल अर्देशिर बर्जोरजी तारापोर होराँ जो  तिन्हाँ दी अणथोही बहादरी ताँईं मरणेपरंत बहादरी दा सब्भते बड्डा नाँम परमवीर चक्र दित्तेया था।

―भगत राम मंडोत्रा

(References― The Brave_Param Vir Chakra Stories by Rachna Bisht Rawat;  My father,  the Param Vir Chakra Hero by Archana Masih, Rediff.Com September 14, 2015 and the  Citation of Lt Col A.B. Tarapore Poona Horse (17 Horse).