13. फ्लाइंग अफसर निर्मलजीत सिंह सेखों

 फ्लाइंग अफसर निर्मलजीत सिंह सेखों

(14 दिसंबर 1971)

4 जून सन् 2017 जो तुआरे दा दिन था।  हैदराबाद दे नेडें एयर फोर्स अकादमी, डुंडीगुल च बड़ी चहल-पहल थी।  एयर फोर्स दे किछ पराणे अफसर अकादमी ते पासऑउट हौणे दी पंजाह्मीं सालगिरह मनाणे ताँईं कट्ठे होयो थे।  सैह् अफसर 97 जनरल ड्यूटी पायलट कोर्स कनै 36 जनरल ड्यूटी नेविगेटर कोर्स पूरा करी नै अकादमी ते 4 जून 1967 जो निकळे थे। तैह्डी 168 पायलट कनै 27 नेविगेटर अकादमी ते पासऑउट होए थे।  जिन्हाँ च 71 अफसर लड़ाइयाँ च कनैं ड्यूटी नभाँदे टैमें होए हौआई हादसेयां च सहीद होई गैह्यो थे।  सहीद होणे वाळे अफसरां च इक अफसर देहा भी था जिद्दो सारे बड़े फक्रे कन्नै याद करा दे थे।  सैह् अफसर अपणे नौखे कारनामे कन्नै अपणे आपे जो भारत दी एयर फोर्स कनै भारतवर्ष दे तिहासे च अमर करी गिह्या था।  

हर औणे जाणे वाळे जो पंजाब दे जिले लुधियाना दी जिला अदालत दे आहते च भारत दी एयरफोर्स दे इक अफसर दी मूर्त बड़े फक्रे कनै खड़ोतियो नजर औंदी है।  तिन्हां कन्नै इक नेट फाइटर प्लेन भी खड़ोतेया सुझदा है।  सैह् लम्मे-झम्मे जुआन फ्लाइंग अफसर निर्मलजीत सिंह सेखों हन्न। फ्लाइंग अफसर सेखों भारत दी एयरफोर्स दे परमवीर चक्र जितणे वाळे अज्ज तिकर इक मात्र किह्ले अफसर हन्न।  तिन्हाँ दा जन्म 17 जुलाई सन् 1945 बिच लुधियाना दे ग्राँ इस्सेवाल ढाका च होया था।  तिस ग्राँएं दे मर्दां दे मुख पेसे फौज कनै किसानी थे।  50 सालाँ ते ज्यादा बग्त बीती गिया, तिस ग्राँएं दे लोकाँ जो अपणी धरती दे लाल पर अज्हें भी बड़ा फक्र है।  ग्राँ दे लोक अपणा सीना चौड़ा करी नै गलांदे हन्न कि पंजाब च मिलिटेंसी दे दौर च तिन्हाँ दे ग्राँएं ते इक भी नौजुआन तिस अंदोलन च सामल नीं होया था।  परमवीर चक्र जित्तू फ्लाइंग अफसर निर्मलजीत सिंह सेखों अज्हें भी ग्राँ दे  नौजुआनाँ दे रोल मॉडल हन्न।

निर्मलजीत सिंह सेखों दे बापू त्रिलोक सिंह सेखों कनै अम्मा श्रीमती हरबंस कौर थे। निर्मलजीत सिंह सेखों अपणे बचपण ते ही फाइटर पायलट बणनें दे सुपनें बुणदे थे।  इस दियाँ दो बजहाँ थियाँ—पहली बजह ताँ एह् थी कि तिन्हाँ दे बापू  एयरफोर्स दे वारंट अफसर थे जह्ड़े आनरेरी फ्लाइट लेफ्टिनेंट ते रटैर होए थे कनैं दूजी बजह एह् थी कि तिन्हाँ दा ग्राँ हलवाड़ा एयरफोर्स स्टेसन दे नेड़ें पौंदा था। सैह् तकरीबन हर रोज बड़े चाए नै फाइटर प्लेनाँ जो उड़दा दिक्खदे थे कनै इक दिन अप्पू भी फाइटर पायलट बणी करी हौआ च उड़णे दे बारे च सोचदे थे।   

 

निर्मलजीत सिंह सेखों होराँ अपणी पढ़ाई लुधियाणे दे नेडें खालसा हाई स्कूल अजितसर मोहे च कित्ती थी। तिसते परंत सैह् सन् 1962 च दयालबाग इंजीनियरिंग कॉलेज, आगरा च पढ़ाई करना चली गै थे।  इंजीनियरिंग दी पढ़ाई दे दौरान तिन्हाँ यू.पी.एस.सी दा मतिहान कनै एस.एस.बी दा इंटरव्यू पास करी नै नेशनल डिफेंस अकादमी, पुणे च दाखला लई लिया।  आखिर 4 जून सन् 1967 जो सेखों होरां दा सुपना पूरा होया। तैह्डी तिन्हाँ जो इंडियन एयर फोर्स च कमीशन मिल्लेया था कनै सैह् फाइटर पायलट बणी गै थे।

सेखों इक मेहनती, घुन दे पक्के कनै मिळणसार नौजुआन थे। तिन्हाँ दे नंबर वन, गुरू कनै खीरी घड़ियाँ दे साथी, फ्लाइट लेफ्टिनेंट बाद च एयर कोमोडोर (रटैर) बलधीर सिंह घुमन होराँ 'दी क्विंट' जो दित्ते इक इन्टरव्यू च दस्सेया था, "सैह् सारेयाँ (अपणे साथियाँ) जो 'ब्रदर' करी नै बुलाँदे थे तिस बजह ते तिन्हाँ दा एह् निकनेम पई गिह्या था। सैह् सिद्धे-सादे कनै जोशीले थे। तिन्हाँ व्ह्ली भारी 'जावा' मोटर साइकिल थी...जेह्डी तिन्हाँ दी पर्सनैलिटी जो दसदी थी" 

तिस वक्त एयर कोमोडोर (रटैर) बलधीर सिंह घुमन होराँ जो तिन्हाँ दे साथी 'जी-मैन' करी नै बुलाँदे थे।  तिन्हाँ 'दी क्विंट' जो दस्सेया था, 'मैं तिन्हाँ (सेखों) दा  फ्लाइंग इंस्ट्रक्टर था।  तिन्हाँ जो हौआ च उड़णे दा शौक था कनै सैह् मिंजो सोगी उड्डी करी बड़े खुस हौंदे थे। तिन्हाँ बहोत पहलैं मिंजो ग्लाया था—'जी-मेन' मैं तुसाँ दा परमानेंट नंबर टू बणना चाँहदा।'  

सन् 1971 दा साल पूर्वी पाकिस्तान दे बंगाली लोकाँ ताँईं इक बुरा बग्त था।  पाकिस्तान दी फौज तिन्हाँ दा कत्लेआम करा दी थी।  तिन्हाँ जो जिन्दा जळाया जाह्दा था। औरताँ कन्नै जबरदस्ती हौआ दी थी। पूरी दी पूरी कौम दा बजूद खतरे च था।  लक्खाँ दे हिसाबें लोक रिफ्यूजी बणी करी  भारत दे पूर्वी राज्याँ च दाखल हौआ दे थे।  तदकणिएं भारत सरकारें इन्सानियत दे तौर पर रिफ्यूजियाँ दी मदद करनें कनै बंगालियाँ दा कत्लेआम रोकणे ताँईं अपणी फौज पूर्वी पाकिस्तान च भेजणे दा फैसला कित्ता। तिसते पाकिस्तानी हुक्मरानाँ नराज होई  करी  3 दिसम्बर सन् 1971 जो भारत दी पच्छमी सरहद दे नेडें पौंदे हौआई अड्डेयाँ पर हौआई हमला करी दित्ता।  जिसते भारत-पाकिस्तान दे बिच खुल्लम खुल्ला जंग छिड़ी गई थी।  

तिस टैमें फ्लाइंग अफसर निर्मलजीत सिंह सेखों इंडियन  एयर फोर्स दे नम्बर 18 स्क्वाड्रन (द फ्लाइंग बुलेट्स) दे अपणे साथियाँ सोगी श्रीनगर हौआई अड्डे पर तैनात थे। सैह् फॉलैंड नेट फाइटर (Folland Gnat Fighter) हौआई जहाज दे इक माहिर फाइटर पायलट थे। फॉलैंड नेट फाइटर इक निक्का जेहा अपर फुर्तीला हौआई जहाज हौंदा था जेह्डा सन् 1965 दी भारत-पाकिस्तान जंग च पाकिस्तान दे एफ-86 सैबर जेट फाइटर हौआई जहाजाँ ते कमजोर होंदा होया भी तिन्हाँ पर भारी पिया था।  इस करी नै नेट फाइटर हौआई जहाज दा नाँ 'सैबर सलेयर' पई गिह्या था।

14 दिसम्बर सन् 1971 जो तिसा लड़ाइया दा तेहरुआँ दिन था जिसा ते बांग्लादेश देस दा जन्म होया था।  भारत दी फौज पूर्वी पाकिस्तान च बड़ी तेजिया कन्नै अग्गें बद्धा दी थी।  लड़ाई दा फैसला होणे वाळा था। सारेयाँ दियाँ नजराँ ढाका दे पासें थियाँ पर पच्छमी बाॅर्डर पर भी मता किछ हौआ दा था।  

सुणनें च औआ दा था कि अपणी फौज दी फर्स्ट कोर दी नाकामयाबियाँ दे परंत पाकिस्तान दी सेकंड कोर हमला करने जो तयार हौआ दी थी।   भारत दे हौआई अड्डेयाँ गास पाकिस्तानी एयर फोर्स दे हमले जोराँ पर थे।  खास करी नै अमृतसर, पठानकोट कनै श्रीनगर दे हौआई अड्डे तिन्हाँ दे नसाणे पर थे।  शक्करगढ़ सेक्टर च भारत दी फ़ौज पाकिस्तानी फ़ौज पर भारी पौआ दी थी। भारत दी हौआई फ़ौज अमृतसर, पठानकोट कनै श्रीनगर दे हौआई अड्डेयाँ ते डुआराँ भरी करी शक्करगढ़ बल्ज दे इलाके च लड़ा दी पैदल फ़ौज दा भरपूर साथ नभा दी थी।  इस बजह ते पाकिस्तानी एयर फोर्स भारत दे इन्हाँ हौआई अड्डेयाँ जो नकारा करने पर तुळिह्यो थी।  

श्रीनगर एयरपोर्ट पाकिस्तानी एयर फोर्स ताँईं इक असान टारगेट था। सन् 1947-48 दी भारत-पाकिस्तान दी जंग दे सीज फायर दे टैमें होए इक समझौते दे मुताबक भारत साँतिया दे बग्त श्रीनगर दे हौआई अड्डे च फाइटर प्लेन नीं रक्खी सकदा था न ही जम्मू-कश्मीर च रड़ार लगाई सकदा था। इस बजह ते तित्थू भारत दा अरली वार्निंग सिस्टम कारगर नीं था।  पीर पंचाल दे पहाडाँ पर बणिह्याँ निगरानी चौकियाँ च  किछ जुआन दूरबीणा लई बैठी रैंह्दे थे।  जाह्लू पाकिस्तानी फाइटर प्लेन पीर पंजाल जो पार करदे सुज्ञदे थे ताँ श्रीनगर जो खबरदार कित्तेया जाँदा था। पाकिस्तानी फाइटर प्लेन अमूमन भ्यागा दे टैमें धुन्ध-धूरिया च लुकदे-छुपदे, तिन्हाँ निगरानी चौकियाँ दियाँ नजराँ बचाई निकळी औंदे थे कनै श्रीनगर पर बेरोकटोक बम्बारी करी नै चली जांदे थे।

1971 दी जंग सुरू होणे ते पहलें श्रीनगर च असाँ दे लड़ाकू हौआई जहाज थे ही नीं। लड़ाई दे असार होणे पर  अंवाला एयर बेस दे नम्बर 18 स्क्वाड्रन (द फ्लाइंग बुलेट्स) ते लड़ाकू हौआई जहाज कनै पायलट श्रीनगर भेजे गै।  तिन्हाँ च फ्लाइंग अफसर निर्मलजीत सिंह सेखों भी सामल थे।  भारत दी एयर फोर्स देयाँ फाइटर पायलटाँ  जो श्रीनगर दे इलाके च स्याळे दिया ठंडी कनै धूरिया च  उड़णे दा कतई भ्यास नीं था।

14 दिसम्बर सन् 1971 दिया भ्यागा 'ब्राॅदर' सेखों कनै 'जी-मैन' श्रीनगर हौआई अड्डे पर 'दो मिन्ट' दिया तियारिया पर तैनात थे। इसदा मतलब एह् था कि जरूरत पौणे पर तिन्हाँ जो दो मिन्ट दे अन्दर हौआ च होणा चाहीदा था।  

दुस्मण दे फाइटर हौआई जहाज जाह्लू भी हमला करना औंदे सुज्झदे हन् ताह्लू अपणे फाइटर हौआई जहाजाँ जो 'स्क्रैम्बल' करने दा हुक्म दित्तेया जाँदा है। इस दा मोटा-मोटा मतलव एह् है कि तिन्हाँ जो उड्डी करी दुस्मण दे हौआई जहाजाँ जो अपणे मकसद तिकर पूजणे दे पहलें ही रोकणा-टोकणा हौंदा है।  अपर जेकर दुस्मण दे हौआई जहाज अपणे हौआई अड्डे गास आई रैहण ताँ अपणे  हौआई जहाज डुआर नीं भरदे हन्न।  किंञा कि तिस वक्त अपणे फाइटराँ जो डुआर मारना मुस्कल कनै खतरनाक हौंदा है। इक तां दुस्मण दे फाइटर हौआई जहाज सिरे गास हौंदे हन्न कनै दूजे तिस वक्त अपणी एयर डिफेंस बैटरियां गोळेयाँ कनै मिसाइलाँ जो दागणा लगी पौंदियाँ हन् जिन्हाँ दा सिकार अपणे फाइटर जहाज भी बणी सकदे हन्न।

14 दिसंबर सन् 1971 दिया भ्यागा तड़कें पाकिस्तान दे पेशावर एयर बेस ते 6 एफ-86 सैबर जेट उड्डे। तिन्हाँ दा मकसद था श्रीनगर एयरबेस उप्पर बम्बारी करना।  विंग कमाँडर चंगेजी तिन्हाँ जो कमाँड करा दे थे।  तिन्हाँ दे पायलटाँ च फ्लाइट लेफ्टिनेंट सलीम बेग मिर्जा भी सामल थे।

पहाडाँ गास बिछिया स्याळे दिया धूरिया दी चादरा च लपटोई करी पाकिस्तानी फाइटर, नजराँ च आए बगैर, श्रीनगर पासें लपह्की आए।  अपर जिंञा ही श्रीनगर दे किछ दरेडें इक ऑब्जरवेशन पोस्टा दी तिन्हाँ पर नजर पई ताँ खबर मिलदेयाँ ही श्रीनगर एयर बेस च 'स्क्रैम्बल' करने दा हुक्म होई गिया था।

तिस बग्त तित्थू फ्लाइंग अफसर जी एम डेविड (निकनेम 'हूच') कनै बाई सिंह (निकनेम 'योगी') कॉम्बैट एयर पैट्रॉल (CAP) कंट्रोल ड्यूटी पर थे। तिन्हाँ दा कम्म डुआर भरने दे परंत अपणे फाइटर पायलटाँ जो गाइड करना था।  रटैर होणे दे परंत विंग कमांडर 'योगी' होराँ 'दी क्विंट' जो दस्सेया था कि तिन्हाँ कनै 'हूच' होराँ पाकिस्तानी सैबर जेट सिरे गास औंदे दिक्खी लैह्यो थे कनै तिन्हाँ एयर ट्रैफिक कंट्रोलर (ATC) जो रेडियो पर दस्सी दित्ता था कि 'स्क्रैम्बल' दा आर्डर रद्द कित्ता जाए पर एयर ट्रैफिक कंट्रोलर दिया तरफा ते  'स्क्रैम्बल' दा आर्डर रद्द नीं होणे दिया बजह ते 'जी-मैन' कनै 'ब्रादर' सेखों रन वे पर निकळी आए थे।

एयर कोमोडोर (रटैर) बलधीर सिंह घुम्मन (जी-मैन) होराँ 'दी क्विंट' जो दस्सेया था, ''स्क्रैम्बल' दा आर्डर सुणदे ही असाँ अपणेयाँ 'नेटाँ' बक्खी दौड़ी पै थे…...सेखों जोरे ने चींगे थे 'मैं भी तुसाँ कन्नै है ब्रादर!'  मैं अपणा 'नेट' रन वे च पहलैं लई अंदा। तिन्हाँ भी मिंजो फोलो कित्ता।  असाँ जो पता नीं था कि 'सैबर' पहले ते ही अटैक ताँईं डाइव करना लगी पैह्यो थे।" 

'जी-मैन' होराँ एयर ट्रैफिक कंट्रोलर दी चुप्पी दिक्खी करी अपणे आप डुआर भरने दा फैसला लई लिया। सैह् हौआ च उड़ी गै थे। रन वे पर धूड़ उड़णे दिया बजह ते दो नेटाँ दी फार्मेशन च नंबर दो दिया जगह सेखों होराँ जो डुआर भरने ताँई  किछ पलाँ दी देरी होई गई। जाह्लू सैह् रन वे पर थे तिन्हाँ ते किछ पिच्छें दुस्मणा दे सट्टेह्यो बम्ब फटे पर तिन्हाँ दा कोई नुकसान नीं होया था।

'जी-मैन' होराँ काफी ऊंचाइया च चली गै कनै घणा कोहरा हौणे दिया बजह ते रस्ता भुली गै।  तिस दा नतीजा एह् हौया था कि सैह् अग्गें होणे  वाळी लड़ाइया च, जिसा जो हौआई लड़ाइयाँ दे तिहास च सब्भ ते डरौणी लड़ाइयाँ च गिणेयाँ जाँदा है, सामल नीं होई सके थे।  पाकिस्तान दे चार सैबर जेटाँ जो श्रीनगर एयरबेस पर बम्ब सटणे दा जिम्मा मिलेह्या था कनै बाकी दे दो तिन्हाँ दी फ्हाजत ताँईं उच्चाइया पर उड्डा दे थे।  

जाह्लू सेखों होराँ डुआर भरी थी ताह्लू दो सैबर जेट सिद्धे तिन्हाँ दे गांह् थे कनै दो तिन्हाँ दा पिच्छा करा दे थे।  सेखों होराँ सैबर जेटाँ दे अगले जोड़े दे पिच्छें पई गै कनै तिन्हाँ अपणे नेट दियाँ अगलियाँ तोपाँ ते फैर करी नै इक सैबर जेट जो मारी टराया।  एह् दिक्खी नै नंबर दो सैबर जेट डरी करी पाकिस्ताने बक्खी नह्ठी गिया था।  तिसदे परंत सेखों जो बाकी दे दो सैबर जेटाँ कन्नै निपटणा था।  सैह् इक गोळदारे च इक दूजे पिच्छें उड्डा दे थे।  तिस वक्त सेखों रेडियो पर बोलदे सुणौहे थे, 'मैं इस बग्त 'सर्कल ऑफ जॉय' च है। मैं इक दे पिच्छें जाह्दा कनै दूजा मेरे पिच्छें लगेह्या'।  सेखों अपणे उड़णे दिया चतराइया कन्नै नंबर तिन्न सैबर जेट ते निकळदियाँ गोळियाँ जो चकमा दिंदे रैह्।  नंबर तिन्न सैबर जेट दियाँ गोळियाँ मुक्की गइयाँ थियाँ कनै सैह् लड़ाई बिचें ही छड्डी करी चली गिया।  तिसते परंत सेखों चौथे सैबर जेटे पिच्छें पूरे जोसे कन्नै पई गै।  सैह् सैबर जेटे गास अपणियाँ तोपाँ कन्नै भरपूर बार करदे गै।  सैबर जेट लीडर घबराई गिया।  तिसजो अपणी मौत नेडें औंदी सुज्ही। ठीक तिस बग्त तिन्नी उप्पर उड़दे अपणे दो फ्हाजती सैबर जेटाँ जो लड़ाई च सामल होणे तांईं सद्दी लिया।  सैह् चाणचक लड़ाई च आई धमके। सेखों तिन्हाँ दा साह्मणा करनें ताँईं तियार नीं थे।  तिन्हाँ दे नेट दे पिच्छले हेस्से च मती सारी गोळियाँ आई वज्जियाँ।  नेट डगमगाई गिया था। 

सेखों होराँ खीरी घड़ियाँ च अपणे नेट जो सिद्धा करने दी कोस्त कित्ती पर कामयाब नीं होए। रेडियो पर तिन्हां दे खीरी बोल थे, 'मिंजो लगदा मैं हिट होई गिह्या। जी-मैन हुण तुसाँ आई  जा कनै इन्हाँ कन्नै निपटी लिया'। तिन्हाँ खीरी घड़ियाँ च इजेक्ट हौणे दी कोसस भी कित्ती पर नेट दे निचाइया पर औणे दिया बजह ते सैह् अपणे आपे जो नीं बचाई सके थे।  तिन्हाँ दा नेट बड़गाम च इक खाइया च जाई नै क्रैस होई गिया था। संजोग दिक्खा एह् सैही जगह थी जित्थू सन् 1947 च भारत दे पहले परमवीर चक्र जित्तू  मेजर सोमनाथ शर्मा होरां श्रीनगर जो बचाणे तांईं पाकिस्तानियां कन्नै लड़दे-लड़दे सहीद होए थे।

सैह् खीरी साह तिकर लड़दे रैहे थे।  तिन्हाँ श्रीनगर एयरबेस जो बचाणे ताँईं अपणी जान दी वाजी लगाई दित्ती थी। तैह्डी श्रीनगर बची गिया था अपर श्रीनगर जो बचाणे वाळा नीं बचेया था। तिन्हाँ जो हिट करने वाला फ्लाइट लेफ्टिनेंट सलीम बेग मिर्जा था। बाद च सलीम बेग मिर्जें  सेखों दी बहादरी जो बड़ा सराहेया था।  इक जोधा ताँईं दुस्मण दी तरीफ ते बड्डा कोई इनाम नीं हौंदा है।  तिन्हाँ किह्लेयां छे सैबर जेटाँ कन्नै दो-दो हत्थ कित्ते थे। दुस्मणा अग्गें नौखी हिम्मत दसणे ताँईं भारत सरकारें तिन्हाँ जो बहादरी दा सब्भ ते बड्डा इनाम परमवीर चक्र देई नै सराह्या था।

—भगत राम मंडोत्रा

References― Paramvir chakra citation of Flying OffIcer Nirmaljit Singh Sekhon; Brother Sekhon: Retelling Last Battle of Air Force’s 1971 War Hero in thequint.com by Rohit Khanna; Remembering Nirmaljit Singh Sekhon: Saga of IAF’s first and only PVC by KS Nair in Indian Defence Review; Batchmates remember of IAF’s lone Param Vir Chakra awardee recall his valour by Man Aman Singh Chhina (The Indian Express June 5, 2017).