9. मेजर शैतान सिंह

 

मेजर शैतान सिंह

(18 नवंबर 1962)

18 नवंबर सन् 1962 जो 16000 फुट ते उच्चे रेजांग ला पर जेह्ड़ा घटेया था तिस दा कुसी जो पता नीं था।  सारे देस दियां नजरां च तिसा जगह पर तनात कुमाऊं रेजिमेंट दी तेहरमीं बटालियन दी 'सी' कंपणी दे कमांडरे समेत 120 जुआन भगौड़े होई गैह्यो थे जां फिरी चीन दे जंगी कैदी होई गैह्यो थे।  सैह् इक अहीर कंपणी थी जिसा च सारे दे सारे जुआन अहीर थे बस इक कंपणी कमांडर ही राजस्थान दे भाटी रजपूत थे। 'सी' कंपणी दे अहीर रेवाड़ी कनै नारनौल दे अक्खे-बक्खे दे ही थे। अजके हरियाणा दा एह् अहीरवाल इलाका सर्मसार था। इंञा ता अहीर बहादुर कनै जबरजंग होंदे हन पर पता नीं 'सी' कंपणी दे अहीरां जो क्या होई गिह्या था?  

रेजांग ला च क्या होया था तिसा गल्ला जो सणाणे वाळे चार-पंज जुआन ही वापस आए थे पर तिन्हां पर जंग ते भगौड़ा होणे दा सक करी नै विसुआस नीं कित्ता गिया था।  तिन्हां दस्सेया था कि भारत माता दे 120 सपूतां तकरीबन 5000 चीनीं पी.एल.ए दे फौजियां दा 'खीरी गोळी खीरी जुआन' तिकर डटी नै मकाबला कित्ता था कनै तकरीबन हजार-बारह सो ते उप्पर चीनी महेसा तांईं सुआई दित्ते थे। ये गल्ल ही किछ अणहोणी जेही लगदी थी जिसा दा कोई सबूत नीं होणे दिया वजह ते जकीन नीं कित्ता गिया था।  पर 13 कुमाऊं दे कमांडिंग अफसर लेफ्टिनेंट कर्नल एच एस ढींगरा होरां जो जकीन था कि तिन्हां दी 'सी' कंपणी डरपोक नीं होई सकदी थी। तिन्हां जो याद था कि जाह्लू तिन्हां लड़ाई ते पहलैं कंपनी जो तिसा ठाहरी ते पिच्छें हटी करी मोर्चेबंदी करने दा ऑप्शन दित्ता था तां अहीर पिच्छें हटणे जो तयार नीं होए थे।

इक गल्ल तां सच है कि सच कदी छिपदा नीं।  देर-सबेर सच साह्मणे आई खडोंदा है। फिरी होया एह् था कि भारत-चीन जंग खत्म होणे ते तिन्न महीनें परंत फरवरी सन् 1963 च इक लद्दाखी गद्दी चुशूल ते भेड़-बकरियां चारदा-चारदा, भुलदा-भटकदा इक देहिया ठाहरी जाई पुज्जेया था, जित्थू तिद्दो फौज दे बंकर सुज्झे थे जेह्ड़े ढई-डुळी गैह्यो थे।  जरा कि गांह् जाणे पर तिद्दो गोळियां दे मते सारे खोखे मिल्ले थे। जाह्लू तिसजो अक्खें-बक्खें फौजी वर्दियां च मतियां-सारियां ल्हासां सुज्झियां तां सैह् डरी गिया था।तिन्नीं झटपट जाई करी नेड़े दिया फौजी चौकिया जो इसा गल्ला दी खबर दित्ती थी।

लडाई ते परंत सैह् जगह 'नो मैन लैंड एरिआ' बणी गइयो थी। चीनी फौज जो खबरदार करी नै 114 इन्फेंट्री ब्रिगेड दे कमांडर ब्रिगेडियर टी एन रैना होरां (बाद च जनरल थलसेनाध्यक्ष)  अपणी फौज दी इक टुकड़ी लई करी तिसा जगह पर गै थे। तिन्हां सोगी इंटरनेशनल रेड क्रॉस कनै प्रेस इनफार्मेशन ब्यूरो दे आदमी भी थे।  तित्थू चोंह् पासें अहीरां दियां ल्हासां खिंडरियां पइयां थियां।  कुसी दे हत्थें रैफळ थी तां कुसी दी उंगळी एलएमजी दे घोड़े पर थी। कोई मोर्चे बिच पत्थरां हेठ दबोह्या था। कोई कुसी दी मदत करा दा था। नर्सिंग असिस्टेंट धर्म पाल धइया दे हत्थां च सिरिंज कनै पट्टी थे।  मोर्टार सेक्सन दे जुआन दे हत्थ च गोळा था जण्ता बुझिए तिन्नी तिसजो हुण लोड़ करी देणा।  कुसी दा जिस्म गोळियां कन्नै छलणी होई गिह्या था, कुसी पर संगीना दे डुग्घे जख्म थे तां कुसी दा बदन दुस्मण दे गोळेयां कन्नै चित्थड़े-चित्थड़े होई गिह्या था। 

पर इक गल्ल कॉमन थी ― सारेयां अहीरां जख्म छातियां पर झेलेयो थे, पिट्ठीं पर नीं।

कंपणी कमांडर मेजर शैतान सिंह होरां दी ल्हास इक   बड्डे पत्थरे पिच्छें मिल्ली थी।  तिन्हां दिया इकी बाहीं च पट्टी बन्हियो थी कनै तिन्हां दा पेट मसीन गन दे बर्स्ट कन्नै फटी गिह्या था। तिन्हां दे हत्थां च तिन्हां दा हथियार था। ब्रिगेडियर टी एन रैना होरां जेहे कट्टर फौजी, जिन्हां कई लड़ाइयां दिक्खियां थियां,  सैह् मंजर दिक्खी रोई पै थे।  अपणे ब्रिगेड दे हर जुआन जो खीरी गोळी तिकर लड़ने दा हुक्म तिन्हां ही दित्तेया था जेह्ड़ा 13 कुमाऊं दी 'सी' कंपणिएं निभाई करी दस्सेया था।  120 जुआनां ते 114 सहीद होई गै थे।  बाकी बचेयां च पंज जख्मी थे जेह्ड़े चीनियां जंगी कैदी बणाई लै थे पर सैह् चीनियां दे सकंजे ते कुसी तरीके नै छुटी करी नहस्सी आए थे। इक सिपाही जो मेजर शैतान सिंह होरां पिच्छें जाणे दा हुक्म दित्ता था तां कि सैह् बटालियन हेडकुआटर जाई करी 'सी' कंपणी दी कहाणी सुणाई सके।

लद्दाख दी चुशूल घाटी च दक्खण-पूर्व दे पासे ते ओणे ताईं रेजांग ला तकरीबन 16000 फुट उच्चा इक दर्रा है। एह् दर्रा तकरीबन 3 किलोमीटर लम्मा कनै 2 किलोमीटर चौड़ा है।  चीनी चुशूल पर कब्जा करी नै तित्थू ते लेह दे पासें जाणे वाळियां सड़कां दा इस्तेमाल करना चांह्दे थे।

लड़ाई सुरू होणे ते पहलें 13 कुमाऊं कश्मीर दे बारामूला च थी। एह् इक प्योर अहीर जाति दी बटालियन थी।  चुशूल दी फ्हाजत तांईं तैनात 114 इन्फेंट्री ब्रिगेड जो मजबूत करने वास्ते बटालियन जो  चाणचक चुशूल जाणे दे ऑडर दित्ते गै थे।  टैम घट था।  तोळतणी च बटालियन दी 'सी' कंपणी जो रेजांगला दी रच्छा दी जिम्मेदारी दित्ती गई थी।  कई अहीरां बर्फ पहली बरी दिक्खी थी।  तिन्हां जो बर्फानी पहाड़ां गास कम्म करने दा तजुर्बा नीं था। तिन्हां व्ह्ली ठंडी दे कपड़े भी नीं थे। तिन्हां दे हथियार दूजी आलमी जंग दे जमाने दे थे।  लड़ाइया च मुसीबता दे टैमे तोपखाना बड़े कम्म ओंदा है।   तिन्हां अहीरां दे नसीब च तोपखाने दी मदत भी नीं थी।  तिन्हां कनै तोपखाने दे बिच पहाड़ दा इक क्रेस्ट ओआ दा था जिस दी बजह ते सही जगह पर गोळाबारी नीं होई सकदी थी।  दरअसल  तिन्हां व्ह्ली सिवा होंसले ते हरेक चीज दी कमी थी।

सेरदिल, धीर-गंभीर कनै तजरुबेकार कंपणी कंमाडर मेजर शैतान सिंह होरां साह्मणे वाळे इलाके च बड़ी चतर मोर्चेबंदी रचाई थी।   साह्मणे दिया ढलाना च दर्रे ते तिन्न किलोमीटर उत्तरे पासें जमादार (सूबेदार) सुरजा राम साहब होरां दी नंबर 7 प्लाटून थी।  दर्रे दे इलाके दी जिम्मेदारी जमादार हरि राम साहब होरां दिया नंबर 8 प्लाटून दी थी।  नंबर 9 प्लाटून दी कमाण जमादार राम चंदर साहब होरां संभाळा दे थे।  9 प्लाटून 7 प्लाटून ते इक किलोमीटर पिच्छें दक्खणे बक्खी थी। कंपणी हेडकुआटर 9 प्लाटून दे पिच्छें था।  कंपणी हेडकुआटरे ते तकरीबन डिढ़ सो मीटर पच्छमे पासें नायक राम कुमार यादव होरां दी तिन्न इंच मोर्टार सेक्सन थी।  एह् मोर्चेबंदी इस सहाबे कन्नै कित्तियो थी कि जरूरत पोणे पर तिन्हों प्लाटूनां इक दूजे दी मदत करी सकदियां थियां।

17 नवंबर जो तित्थू बर्फीला झक्खड़ झुल्लेया था। उप्परा ते चीनियां तोपखाने दी घणी गोळाबारी भी कित्ती थी।  कंपणी दा लाइन कम्यूनिकेशन टुटी गिया था। कंपणी बटालियन हेडकुआटर ते कटोई गई थी।  मदता दी कोई मेद नीं थी।  कंपनी कमांडर होरां व्ह्ली पिच्छें हटणे दा ऑप्सन था पर तिन्हां  डट्टी रैह्णे दा फैसला लिया था। प्लाटून कमांडर कनै कंपणी टूआइसी जमादार राम चंदर साहब होरां भी अपणे कंपणी कमांडरे जो गलाया था, 'साहब जी, विदड्रा करन दी कती मत सोचियो, एक भी अहीर कहा नहीं मानेगा।'

सिपाही (बाद च ऑनरेरी कप्तान) राम चंदर यादव, रेजांग ला दी लड़ाई च मेजर शैतान सिंह होरां दे साथी कनै रेड़ियो ऑपरेटर थे।  तिन्हां रेजांगला च होई लड़ाई दा हाखीं दिक्खेया हाल सणाया था।

18 नवंबर जो भ्यागा तड़कें झुळमुळें साढ़े तिन्न बजे टररर… दी छेड़ सुणी करी सब्भ चक्कने होई गै थे।  एह् एलएमजी दे बर्स्ट दी अवाज थी जेह्ड़ी 8 प्लाटून दे पासे ते आई थी।  मेजर शैतान सिंह होरां राम चंदर यादव जो रेडियो पर पता करने तांईं बोलेया था।  8 प्लाटून ते जमादार हरि राम साहब दा जवाब आया था कि तिन्हां दिया लिस्निंग पोस्टा (सुणगुण चौकिया) गास तकरीबन 10 चीनियां दा  हमला आया था।  तिन्हां नाळे च होई उप्पर चढ़दे चीनियां पर एलएमजी दा फैर करी 5-6 जो मारी ता था कनै बाकी नह्ठी गै थे।  'साबास! चौकस रहिए' मेजर साहब होरां तिन्हां जो गलाया था।  

चीनी कुतह्की होर पासे ते हमला करना नीं ओआ दे होण एह् पता करनें तांईं प्लाटून 7 कनै 9 दे बिच पोंदे नाळेयां जो चेक करने तांईं मेजर शैतान सिंह होरां इक पेट्रोलिंग पार्टी भेजी थी।

पेट्रोलिंग पार्टी नै आई करी रपोट दित्ती थी कि सारे  नाळेयां च चीनियां दियां लहरां पर लहरां उप्परा पासें चढ़दियां सुज्झियां थियां।  लाइट मसीन गनां कनै मोर्टारां ओंदेयां चीनियां गास सिस्त लगाई दित्ती थी।  ताह्लू 7 प्लाटून ते जमादार सुरजा राम होरां दस्सेया था कि तिन्हां दे पासें तकरीबन 400 चीनीं चढ़ा दे थे।  मेजर साहब  होरां तिन्हां जो गलाया था कि रेंज च ओंदेयां ही दुस्मणा गास फैर खोली दित्ता जाए। चीनियां दे अग्गें ओंदे ही 7 प्लाटून दियां तिन्नों एलएमजियां तिन्हां गास अग्ग उगळणा लगी पइयां थियां।

तिस वक्त ही 8 प्लाटून ते खबर आई थी कि तिन्हां पासें भी तकरीबन 800 चीनी छिड़ा च होई करी उप्परा जो गोह्णा लगेयो थे। 'आप वीर अहीर हैं, पूरे जोश के साथ लड़िए'  कंपणी कमांडर होरां प्लाटून कमांडर जमादार हरि राम साहब जो गलाया था।  'आप चिंता ही मत करिए साहब हम लड़ेंगे,' हरी राम साहब होरां दा जवाब था।  8 प्लाटूनें फैर खोली दित्ता था।  हमला नाकाम होई गिया था।  मेजर शैतान सिंह होरां मोर्टार  सेक्सन जो तिस नाळे पासें गोळे दागणे दा हुक्म दित्तेया था। तिस पर जमादार  हरि राम साहब होरां सलाह दित्ती थी, 'साहब उस नाले की तरफ फायर मत कीजिए वो चीनियों की लाशों से भरा पड़ा है।'

जाह्लू साह्मणे ते कित्ते गै सारे हमले नकाम होई गै तां चीनियां अपणी जुध्द नीत बदळी दित्ती थी।  तकरीबन 4.30 बजे तिन्हां इक सार असां दियां सारियां पोस्टां गास बम्बारी सुरू करी दित्ती थी। बाद च अणफटे गोळेयां दिक्खी पता चलेया था कि चीनियां तिन्न किस्म दे मार्टार इस्तेमाल कित्तेयो थे—120 एमएम, 81 एमएम कनै 60 एमएम।  म्हारे बंकरां जो तोड़णे तांईं तिन्हा 75 एमएम कनै 57 एमएम आरसीएल तोपां दा इस्तेमाल कित्ता था।  सैह आरसीएल तोपां जो ठेला गड्डियां पर लद्दी करी लई आयो थे।  निग्गर चट्टानां पर चार फुट गड्ढे इसा गल्ला दे सबूत थे कि तैह्डी चीनियां 132 एमएम रोकेट भी चलाए थे। सैह् इतणा घणघोर हमला था कि कोई भी अहीर कुसी दी मदत नीं करी सकेया था। 15 मिंटां च सब्भ किच्छ तबाह होई गिया था।   हर पासें मौत अपणा  नाच नच्चा दी थी।

जाह्लू बम्बारी रुकी तां जेह्ड़े जींदे बचेयो थे, तिन्हां दिक्खेया कि रिज लाइन पर खच्चरां कनै याकां दा काफला ओआ दा था।  कंपणी हवलदार मेजर हरफूल सिंह बड़े खुस होए थे।  तिन्हां जो लग्गेया था कि 'ए' कंपणी तिन्हां दिया मदता तांईं ओआ दी थी। पर  जाह्लू तिन्हां दूरबीणा कन्नै दिक्खेया तां तिन्हां जो चीनी ओंदे सुज्झे थे।  सैह् 8 प्लाटून पर हमला करने जो ओआ दे थे।  दुये बक्खे ते 7 प्लाटून ते खबर आई थी कि तिन्हां पासें होर तकरीबन 700 चीनी उप्परे जो ओआ दे थे।  

मेजर शैतान सिंह होरां जो इक गोळे दा टुकड़ा आई बज्जेया था।  तिन्हां दिया खब्बिया बांहीं च पट्टी बन्हियो थी।  सैह् हर मोर्चे च जाई नै जुआनां दा होंसला बद्धा दे थे।  मेजर साहब होरां जख्मी जुआनां जो अपणी मलहम-पट्टी करुआई नै फिरी लड़ने दी हिम्मत करने जो बोला दे थे।  सारे बंकर तबाह होई गैह्यो थे। जुआन या तां सहीद होई गैह्यो थे या जख्मी थे।  गोळा-बरूद खत्म होणे जो था। हत्थापाइया दी नौबत आई गई थी। संगीनां दे वार होआ दे थे।  घोर ठंडी नै सुन्न  उंगळियां .303 रैफळ जो कोक नीं करी सका दियां थियां। इतणा होई जाणे पर भी मेजर साहब ठंडे दमागे नै अपणा कम्म करा दे थे।  सैह् जुआनां जो होंसला दई जाह्दे थे।

निहाल सिंह कंपणी हेडकुआटर दिया लाइट मसीन गना पर थे। तिन्हां दे साथी राम मेहर सिंह जाह्लू गोळा लगणे पर ढई पै थे तां सैह् खंदक च किह्ले रही गै थे।   सैह् मसीन गन जो चलांदे रैह् थे जाह्लू तिकर तिन्हां दियां दूंहीं बांही च दुस्मण दा बर्स्ट आई नीं लग्गा था। निहाल सिंह होरां एलएमजी दा ब्रिज ब्लॉक नकाळी करी सट्टी दित्ता था ता कि एलएमजी दुस्मणा दे कम्मे दी नीं रैहे।  चीनी तिन्हां जो मोर्चे ते कड्ढी करी पकड़ी नै लई गै थे।

मेजर शैतान सिंह रिज पर थे जाह्लू मिडियम मसीन गन दा बर्स्ट तिन्हां दे पेटे च आई लग्गेया था।  रेडियो सेट जो अग्ग लग्गी गई थी।  तिस दे परंत कुसी दा भी कुसी कन्नै कम्युनिकेशन नीं रिहा था।  कंपनी हवलदार मेजर हरफूल सिंह होरां इक एलएमजी चुक्की नै तिस चीनिएं जो मारी दित्ता था जिन्नीं मेजर होरां जो बर्स्ट मारेया था।  सीएचएम हरफूल सिंह होरां जो आरसीएल दा इक गोळा आई बज्जेया था कनै सैह् ढई पै थे। तिन्हां अपणे साह टुटणे ते पहलें गलाया था, ''रामचंदर, देखना मेजर साहब की बॉडी को चीनी हाथ न लगा पाएं।' मेजर शैतान सिंह होरां कंपणी दी सान थे।

मेजर शैतान सिंह होरां दे पेट ते लोहू दे फुआरे फुट्टा दे थे।   तिन्हां जो पेटें बड़ी भारी पीड़ होआ दी थी। सैह् बार-बार रामचंदर जो तिन्हां दी  बेल्ट खोलणे जो गला दे थे।  राम चंदर होरां तिन्हां दिया कमीजा अन्दर हत्थ पाई दिक्खेया था तिन्हां दियां आंतड़ियां बाहर आई गइयां थियां।  राम चंदर होरां तिन्हां दी बेल्ट नीं खोली थी।  तिन्हां जो बेहोसिया दे दौरे पोणा लगी पै थे। राम चंदरें तिन्हां जो कस्सी करी झप्फी पाई थी कनै अपणे मुल्खे दे पासें खाईया बक्खी लुढ़कणा लग्गी पै थे।  फिरी सैह् अपणे कंपणी कमांडरे जो अपणियां पिट्ठी पर चुक्की नै तकरीबन 800 मीटर चल्ले थे।  तिन्हां मेजर होरां जो  इक बड्डे पत्थरे दिया ढफेला बठाळी दित्ता था।  तित्थू तिन्हां जो अपणा इक होर जुआन मिलेया था जेह्ड़ा जख्मी था।  तित्थू तिन्हां गास दुस्मण दा फैर ओणा लगी पिया था।

मेजर शैतान सिंह अपणे दूंहीं जुआनां दी जान खतरे च नीं पाणा चांहदे थे।  मेजर होरां तिन्हां जो उखड़देयां साहां नै गलाया था, ' आप दोनों जाओ।  मुझे यहीं छोड़ दो।  जाकर उन्हें बताना हम कैसे अंत समय तक लड़े थे।  ये मेरी कंपनी है।  मैं यहीं मरूंगा।  ये मेरा आदेश है।'

तिस वक्त भयागा दे सवा अट्ठ बज्जा दे थे। बर्फ पोआ दी थी।  जुआन नीं चांह्दे होए भी मेजर शैतान सिंह होरां जो तित्थू छड्डी गै थे।

आनरेरी कप्तान राम चंदर यादव होरां मेजर शैतान सिंह होरां जो याद करदे गलांदे हन, 'नाम उनका भले ही शैतान सिंह था पर वो देवता थे।'  

मेजर शैतान सिंह होरां रेजांगला दिया लड़ाइया च बड़े कमाल दी लीड़रसिप दस्सी थी। देही लीड़रसिप कि सारे दे सारे जुआन अपणी जान देणे जो तयार होई गै थे।  रेजांगला दी लड़ाई अज तिकर दुनिया दी गिणियां-चुणियां लड़ाइयां च इक मनीं जांदी है।  मेजर शैतान सिंह होरां जो मरणेपरंत बहादरी दा सब्भ ते बड्डा इनाम परमवीर चक्र दित्ता गिया था। 'सी' कंपणी जो कुल मिलाई नै इक परमवीर चक्र, अट्ठ वीर चक्र कनै चार सेना मैड़ल मिल्ले थे। 13 कुमाऊं दी 'सी' कंपणी जो 'रेजांगला कंपणी' दा नां दित्ता गिया था।  13 कुमाऊं जो बैटल ऑनर 'रेजांगला' कनै थिएटर ऑनर 'लद्दाख' मिल्लेया था।

चुशूल दे इलाके च जित्थू तिस वक्त बटालियन हेडकुआटर था ओत्थू रेजांगला दे सहीदां दी यादगार बणिह्यो है।  सहीद होणे वाळे तकरीबन सारे जुआन हरियाणा दे अहीरवाल इलाके दे थे।  रिवाड़ी च भी तिन्हां‌ दी इक यादगार है जेह्ड़ी नोइयां नस्लां च देस भक्ति दी लौ जगांदी है।

मेजर शैतान सिंह होरां दा जन्म 1 दिसंबर सन् 1924 जो राजस्थान दे जोधपुर जिले दे बानासर नां दे ग्रांएं बिच इक भाटी राजपूत परुआर च होया था।  तिन्हां दे पिता लेफ्टिनेंट कर्नल हेम सिंह थे, जेह्ड़े पहली आलमी जंग च फ्रांस च लड़े थे। तिन्हां जो ऑर्डर ऑफ द ब्रिटिश एम्पायर (ओबीई) मिल्लेया था। मेजर शैतान सिंह होरां ग्रेजुएशन करी नै 1 अगस्त सन् 1949 जो जोधपुर रियासत दी फौज च अफसर बणी नै सामल होए थे। जाह्लू जोधपुर दी रियासत भारत च सामल होई तां तिन्हां जो कुमाऊं रेजिमेंट च भेजेया गिया था। सैह् 11 जून सन् 1962 च मेजर प्रमोट होए थे।

18 नवंबर सन् 1962 जो देस दी खातिर  सहीद होणे वाळा सैह् परमवीर अमर है। 

― भगत राम मंडोत्रा

–-–––––––––––––––––––––––-–––––––––

References :  'The Brave'  by Rachna Bisht Rawat  and interviews of  Hony Capt Ram Chander Yadav and Hav Nihal Singh available on YouTube.

–-–––––––––––––––––––––––-–––––––––