8. सूबेदार जोगिंदर सिंह

 

सूबेदार जोगिंदर सिंह

(23 अक्तूबर 1962)

23 अक्टूबर सन् 2020 दा धियाड़ा था।  अरुणाचल प्रदेश दे बुमला बिच बड़ी चहळ-पहळ थी। तिस दिन तिसा ठाहरी इक वार मेमोरियल (जुद्ध यादगार) दा उदघाटन हौआ दा था।  तिस दिनै सरकारी अमले समेत अरुणाचल प्रदेश दे मुखमंत्री (पेमा खाँडू) होराँ कनै फौज दे बड्डे अफसर तित्थू थे।  जुद्ध यादगार दा उदघाटन जिन्हाँ हत्थाॅऺ कित्ता था सैह् हत्थ थे―सन् 1962 दी भारत-चीन जंग दे सहीद सूरमे परमवीर सूबेदार जोगिंदर सिंह होराँ दी छोटी बिट्टी, श्रीमती कुलवंत कौर जी दे।  तिस दिन सन् 1962 बिच टोंगपेंगला (बुमला) दिया तिसा ठाहरी इक लड़ाई होई थी। तिसा लड़ाइया च भारत माता दे 30 सिक्ख सूरमेयाँ तकरीबन 600 चीनियाँ दा डटी नै मुकाबला कित्ता था।  तिन्हाँ बहादराँ दे कमाँडर थे सूबेदार जोगिंदर सिंह।

श्रीमती कुलवंत कौर तिस बग्त सिर्फ 8 महीने दी बच्ची थे जाह्लू तिन्हाँ दे बापू सूबेदार जोगिंदर सिंह होराँ नेफा दिया लड़ाइया ताँईं निकळे थे कनै फिरी मुड़ी करी कदी घरे जो नीं आए।  तिन्हाँ जो अपणे वचपण च अपणे बापुए दे पियारे दी छाँऊं ताँ नीं मिल्ली थी पर थोड़ा बड़े होई करी जाह्लू सैह् सूबेदार जोगिंदर सिंह होराँ दी बहादरी दी कहाणी पढ़दे कनै सुणदे थे ताँ तिन्हाँ जो अपणे बापुए पर बड़ा फक़र हौंदा।  तिन्हाँ जो फक़र कैंह् नीं हौंदा, सूबेदार जोगिंदर सिंह होराँ पर ताँ सारे देसवासियों जो फक़र है।

बुमला अरुणाचल प्रदेश दे तवाँग कसबे ते 37 किलोमीटर गाँह् 15200 फुट उच्चा दर्रा  है। तित्थू ते तिब्बत दा कसबा 'कोना' महज 43 किलोमीटर अग्गें पौंदा है। कुसी जमाने च भारत-तिब्बत दा व्यापार  इस दर्रे च हौई नै हौंदा था।  तिब्बत पर चीन दा कब्जा हौणे दे टैमें दलाई लामा होराँ इस रस्ते च हौई नै ही भारत च दाखल हौए थे।

अज्जकल अरुणाचल प्रदेशे च एल.ए.सी पर दो बॉर्डर पर्सनेल मीटिंग पोआइंट  हन्न जिन्हाँ च इक बुमला पर है। तित्थू बॉर्डर दे मसलेयाँ दा हल तोपणे ताँईं भारत कनै चीन दियाँ फ़ौजी अफसराँ दे बिच बैठकाँ हौंदियाँ रैंह्दियाँ हन्न। 

23 अक्तूबर सन् 1962 जो तित्थू भारत कनै चीन दियाँ फौजाँ च इक घणघोर जंग हौई थी।  

सन् 1962 दा सियाला नेफा (अरुणाचल प्रदेश) देयाँ उच्चेयाँ पहाडाँ गास बर्फे दी चिट्टी चादर औढ़ाणे दी तयारियाँ च था।  भारत-चीन दे रिस्तेयाँ दी कोड़तण इतणी बद्धी गइयो थी कि काह्लू किछ भी हौई सकदा था।  जाह्लू सब्भना जो एह् सुज्झी खड़ौता था कि भारत-चीन दी अप्पू च लड़ाई होई नै ही रैह्णी ताह्लू सिख रेजीमेंट दी पहली बटालियन जो जयपुर ते सद्देया गिया था।  जुआनाँ ताँईं एह् बड़ा करड़ा सफर था — टैंगा वैली दे घणे बण, बोमड़ीला दी टेढ़ी-मेढ़ी चढ़ाई फिरी दिराँग ताँईं उतराई, सेला दी उच्चाई दे बाद  जंग दी डुघाई कनै फिरी जाई नै तवाँग।

परले पासे ते चीनियाँ जो तवाँग तिकर औणे ताँईं बुमला पार करना पौणा था।  बुमला च चीनियाँ जो रोकणे दी जिम्मेदारी 1 सिख दी 'डी' कंपणी जो दित्ती गइयो थी। तिस बग्त बुमला बिच तिन्हाँ दे 30 बहादर जुआन चट्टान बणी नै डट्टेयो थे। तिन्हाँ दी कमाण शेरदिल सूबेदार जोगिंदर सिंह होराँ दे हत्थ च थी।  सूबेदार जोगिंदर सिंह होराँ दी प्लाटूना दी लोकेसन बुमला एक्सिस पर टोंगपेंगला च आईबी रिज नाँएं दे इक रिह्ड़ुए गास थी।

सूबेदार जोगिंदर सिंह होराँ पक्के इरादे दे तगड़े जुआन थे।  तिन्हाँ जो लड़ाई दा खूब सारा तजरबा था।  सैह् अंग्रेजां दिया फ़ौजा सौगी दूजी आलमी जंग च दुस्मणा कन्नै लड़े थे। अजादी मिलणे परंत तिन्हाँ जम्मू-कश्मीर च पाकिस्तानियाँ कन्नै भी लोहा लिया था।  सैह् जुद्ध दे दाओ-पेचाँ दे बड्डे माहिर मन्ने जाँदे थे।  सारी बटालियन  तिन्हाँ दा मान करदी थी।  तिन्हाँ दा जन्म 26 सितम्बर सन् 1921 जो पंजाब दे मोगा नेड़ें  महला कलाँ ग्राँएं च इक सैनी सिख परुआरे च होया था।  बापुए दा नाँ सरदार शेर सिंह कनै अम्मा बीबी कृष्णा कौर जी थे।  सूबेदार जोगिंदर सिंह होराँ ग्राँएं दे स्कूले च पंजमीं जमात तिकर ही पढ़े थे।  गरीबिया दी बजह ते अम्मा-बापू तिन्हाँ जो अग्गें नी पढ़ाई पाए।  फौज दे प्रमोसनाँ ताँईं जरूरी पढ़ाई तिन्हाँ फौज च भर्ती होणे दे परंत कित्ती थी। 

सूबेदार जोगिंदर सिंह होराँ 28 सितम्बर सन् 1936 जो अंग्रेजाँ दी फौजा च भरती होई करी नै मसहूर सिख रेजीमेंट दी मसहूर पहली बटालियन, 1 सिख च सामल होए थे।  फर्स्ट सिख बटालियन अपणे सूरमे जुआनाँ कनै बहोत सारे जुद्ध इनाम पाणे ताँईं जाणी जाँदी है।  सन् 1947-48 दे जम्मू-कश्मीर च होए भारत-पाकिस्तान दे जंग च परमवीर चक्र पाणे वाले लाँस नायक (बाद च ऑनरेरी कप्तान) कर्म सिंह होराँ तिसा बटालियना दे ही थे।

20 अक्तूबर सन् 1962 जो चीनियाँ 'नामका चू' सेक्टर च भारत दियाँ 'धौला' कनै 'थागला' चौकियाँ पर कब्जा करी लिया था। तिन्हाँ व्ह्ली भारत दियाँ फौजाँ ते कई गुणा बद्धिया हथियार थे कनै सैह् कई सालाँ ते जंग दी तयारी करा दे थे।  म्हारिया फौजा व्ह्ली न ताँ ढंगे दे हथियार थे, न कपड़े, न रासन, न कोई तयारी। असाँ दी फौज चीनियाँ साह्मणे टिकी नीं पाई थी। ‌ चीनी फौजाँ दा मेन मकसद तवाँग जो अपणे कब्जे च लैणा था।

 

सूबेदार जोगिंदर सिंह होराँ, तिस इलाके दे जियोग्राफिए जो समझी करी, आईबी रिज पर बड़ी चतर मोर्चेबंदी जमाई लई थी।  तिस इलाके च पाई जाणे वाळियाँ चीजाँ दा इस्तेमाल करी नै बंकर कनै खाइयाँ तयार करी लै थे। अपर तिन्हाँ व्ह्ली सिरफ चौंह् दिनाँ दा ही रासन था।  जुआनाँ दे जुत्ते कनै कपड़े तिस इलाके तंइएं माफक नीं थे।  नेफा दी ठंड़ रीड़ च सिहरण दड़ाणे वाळी थी पर सूबेदार साहब होराँ अपणे जुआनाँ दा होंसला टुटणा नीं दित्ता।  तिन्हाँ अपणे जुआनाँ जो  मजबूत कनै तजरबेकार पीपल्स लिबरेशन आर्मी दे फौजियाँ जो यादगार टक्कर  देणे ताँईं तयार करी लिह्या था।

सैह् 20 अक्तूबर सन् 1962 दी भ्याग थी। ताह्लू असम राइफल्स दी  बुमला आउटपोस्ट दे कमांडर जेसीओ नै दिक्खेया कि बुमला दे साह्मणे नाळे पार सैंकड़ेयाँ दे हिसाबें चीनी फौज कट्ठा हौआ दी थी कनै मोर्चेबंदी करना लगिह्यो थी। तिन्हाँ 1 सिख दी प्लाटून जो हुसियार करी दित्ता।  सूबेदार जोगिंदर सिंह होराँ तुरंत हवलदार सुचा सिंह दी कमांड च इक सेक्सन बुमला आउटपोस्ट पर भेजी कनै तिन्हाँ अपणे  कंपणी हेडकुआटर जो फौरन 'सेकंड लाइन' गोळा-बरूद भेजणे ताँईं स्नेहा भी घली दित्ता। सूबेदार जोगिंदर सिंह होराँ दिया पोस्टा पर काह्लू भी हमला हौई सकदा था।   सूबेदार साहब होराँ अपणे 29 जुआनाँ सौगी चीनियाँ दा मकाबला करने जो तयार थे। अपर तिन्हाँ व्ह्ली एम्युनिसन दी घाट थी।  एम्युनिसन बचाणे ताँईं तिन्हाँ अपणे जुआनाँ जो समझाया था कि जाह्लू  दुस्मण रेंज च औंण तिन्हाँ गास सिर्फ़ ताह्लू ही फैर कित्ता जाए, अंधाधुंध गोळीबारी दे बजाय कारगर फैर कित्ता जाए।

23 अक्तूबर दे तड़कें भ्यागा 4.30 बजे सिख प्लाटून दे लंगरे बिच चाह् बणाणे दी तयारी हौआ दी थी। ठीक तिस बग्त सिखाँ देयाँ बंकराँ जो तबाह करने तंइएं चीनियाँ अपणियाँ मोर्टाराँ कनै एंटी टैंक तोपाँ दे मुंह खोली दित्ते। 6 बजे दे आसपास तिन्हाँ असम राइफल्स दिया पोस्टा गास हमला करी दित्ता।  हवलदार सुचा सिंह होराँ किछ देर तिन्हाँ दा मुकाबला कित्ता पर फिरी सैह् अपणिया सेक्सना सौगी आईबी रिज पर प्लाटूना कन्नै आई मिल्ले थे।  सीरदें धियाड़ें चीनी फौजें आईबी रिज पर तनात सूबेदार जोगिंदर सिंह होराँ दी प्लाटूना गास धावा बोली दित्ता था।

पहले हमले च तकरीबन 200 चीनी फौजी साह्मणे आए। जोगिंदर सिंह होराँ कनै तिन्हाँ दे जुआनाँ चीनियाँ जो करारी टक्कर दित्ती कनै बहोत सारे चीनी बुरे हालैं फट्टड़ करी दित्ते।  चीनियाँ जो छुपणा पिया कनै फिरी सैह् पिच्छें हटी गै थे। सूबेदार जोगिंदर सिंह होराँ दिया प्लाटूना जो भी भारी नुकसान झलणा पिया था।  तिन्हाँ दे बंकर टुटी गै कनै कई जुआन जख्मी होई गै थे। इस दे परंत जोगिंदर सिंह होराँ इक बरी फिरी अपणे कंपणी हेडकुआटर ते गोळा-बरूद भेजणे दी गुहार लगाई थी। 

जाह्लू एह् हौआ दा ही था ताह्लू 200 दी नफरी च होर चीनी फौजी फिरी तिन्हाँ दिया चौकिया बक्खी चढ़ी आए थे।  चीनियाँ दी इक छोटी टुकड़ी तिन्हाँ दियाँ नजराँ ते बची करी तिन्हाँ दिया पोस्टा दे बहोत नेड़ें औणे च कामयाब हौई गई। घमसाण गोळाबारी हौई।  अपणियां जंघा च मसीन गन दी इक गोळी आई बजणे दे परंत जोगिंदर साहब होराँ इक बंकरे अंदर जाई करी अपणियाँ जंघा च पट्टी बन्ही नै फिरी अपणे जुआनाँ जो होंसला देणा लगी पै।  अपणे मोर्टार गनर दे सहीद हौई जाणे ते परंत तिन्हाँ मोर्टार जो अप्पू संभाळी नै गोले दागणे सुरू करी दित्ते।  बहोत सारे चीनी मारे गै।  सूबेदार होराँ दे भी मते सारे जुआन जाँ ताँ सहीद होई गैह्यो थे जाँ फिरी जख्मी थे।

थोड़ी कि देरा परंत होर 200 चीनियाँ दी लहर आई गई।  इतिहासकार अनिल कुमार लिक्खदे हन्न कि औणे वाळे खतरे जो जाणदे होयाँ 'डी' कंपणी दे कमांडर लेफ्टिनेंट हरीपाल कौशिक होराँ रेडियो पर इक स्नेहा भेजेया था जिस्सेयो सुणनें परंत सूबेदार जोगिंदर सिंह होराँ जवाब दित्ता था 'जी साह्ब'। अपणे कंपणी कमांडरे कन्नै होई गल्लबात च एह्  तिन्हाँ दे खीरी बोल थे।

किछ देरा बाद तिन्हाँ व्ह्ली एम्युनिसन मुक्की गिया। तिन्हाँ अपणे बचे-खुचे जुआनाँ जो फिरी तयार कित्ता कनै बंदूकाँ पर संगीना चढ़ाई करी 'जो बोले सो निहाल, सत श्री अकाल' दा जुद्ध जैकारा लगाई करी दुस्मणा गास टुट्टी पै। मते सारे  चीनी म्हेसा ताँईं सुआई दित्ते। अपर चीनी औंदे ही रैह्। बुरे हालें जख्मी सूबेदार जोगिंदर सिंह साहब होराँ जो जंगी कैदी बणाई लिया गिया।  सिरफ तिन्न जुआन बची निकळे थे जिन्हाँ कई घंटेयाँ दिया तिसा लड़ाइया दी कहाणी होरना जो सुणाई थी।

किछ दिनाँ परंत सैह् चीन दी कैद च सुरगवास होई गै थे।तिन्हाँ जो बहादरी दा सब्भ ते बड्डा इनाम 'परमवीर चक्र' दित्ता गिया था।  

तिन्हाँ जो परमवीर चक्र मिलणे दी खबर सुणी नै दुस्मणा भी तिन्हाँ दा मान कित्ता था। चीनियाँ पूरे आदरे कनै तिन्हाँ दियाँ अस्थियाँ बटालियन दे सुपुर्द करी दित्तियाँ थियाँ।  अस्थि कलस जो  सिख रेजीमेंटल सेंटर मेरठ लियाया गिया था। गुरुद्वारा साहिब च तिन्हाँ तंईं श्रद्धांजलि सभा करने दे परंत सैह् कलस तिन्हाँ दी पत्नी श्रीमती गुरदयाल  कौर कनै बेटे जो देई दित्ता गिया था।

अज्ज भी बुमला पोस्ट पर जेह्ड़े भी जाँदे हन्न, सैह् तित्थू सरधा कन्नै अपणा सिर झुकाई करी छोटे गिट्टेयाँ दे ढेरे पर इक गिट्टा जरूर चढाँदे हन्न।

—भगत राम मंडोत्रा

(References― Paramvir Chakra citation of Subedar Joginder Singh and gajendra bhati@lallantop.com).