4. नायक यदुनाथ सिंह

 

नायक यदुनाथ सिंह

(जम्मू-कश्मीर 6 फरबरी 1948)

देस तांईं जान देणे वाळे अमर होई जांदे हन। तिन्हां जो देस देयां दुस्मणा दे बम्ब-गोलियां नीं मारी सकदे, किंञा कि अमर तां कदी मरदे ही नीं हन। तिन्हां जो मारने वाळे तिन्हां दे अपणे मुल्खे दे वसिंदे ही होंदे हन।  जाह्लू सहीदां जो तिन्हां दे देसवासी भुली जांदे तां सैह् अपणे आप मरी-मिटी जांदे हन।

परमवीर नायक यदुनाथ सिंह होरां जो अज्ज सैय्द ही कोई याद करदा होए पर 4 गार्ड्स पलटण तिन्हां जो कदी नीं भुलदी। पहलें इसा पलटणा जो असां 1 राजपूत दे नांयें ते जाणदे थे। भले ही 6 फरबरी सन् 1948 जो नायक यदुनाथ सिंह दुस्मणा दियां कई गोळियां अपणे जिस्मे पर झेली करी सहीद होई गै थे पर 4 गार्ड दे अफसर, जेसीओ कनै जुआनां तांईं सैह् हुण भी जींदे हन। तिसा पलटणा दे गेटे पर लक्खोया 'परमवीर पलटन 4 गार्ड' कनै परेड ग्राउंडे दा नां 'यदुनाथ परेड ग्राउंड' हर वक़्त जुआनां जो नायक यदुनाथ सिंह दी याद करांदा रैंह्दा है। पलटण दे अफसर मेस दे साह्मणे लग्गियो तिस परमवीरे दी मूरत सब्भना जो मुस्कल हलातां च भी देस दी खातिर किच्छ खास करी गुजरने तांईं उकसांदी  रैंह्दी है। अज्ज भी नायक यदुनाथ सिंह दा नां मात्र ही जुआनां च अपणे देसे तांईं अपणा सब्भ किछ कुर्बान करी देणे दा जोस भरने तांईं काफी है।

अंग्रेज देस जो अजाद करदे वक़्त देस च मौजूद सारियां रियासतां जो भारत या पाकिस्तान कुसी भी पासें जाणे या फिरी आजाद रैह्णे  दी छूट देई गै थे। जम्मू-कश्मीर रियासत दे राजा हरी सिंहें आजाद रैह्णे दा फैसला कित्तेया था। पाकिस्तान दे लीडर जम्मू-कश्मीर रियासत जो अपणे पासें मिलाणा चांहदे थे। तिन्हां कबाइलियां जो जम्मू-कश्मीर  पर हमला करने तांईं उकसाया था। तिन्हां  जो लालच दित्ता गिया था कि लुटपाट दा माल कनै जणासां तिन्हां जो मिलगिह्यां। कबाइली बन्दूक-तलवार लई करी कश्मीर पर टुट्टी पै थे। रस्ते च जितणे भी गरां-सहर आए कबाइलियां तिन्हा जो खूब करी लुट्टेया था।  जिन्हां बरोध कित्ता था तिन्हां दी जानीं ते हत्थ धोणा पई गै थे। लक्खां जणासां दी इज्जत लुट्टी गई थी।  तिन्हां जो जेह्ड़ी कुड़ी-जणास बांकी लग्गी थी, तिसा जो पकड़ी करी पाकिस्तान लई गै थे।

हर पासें हाहाकार मच्ची गिया था। पाकिस्तानी फौज भी तिन्हां सोगी थी। 

राजा हरी सिंह होरां भारत ते मदद मंगी थी। भारत सरकारें तिन्हां जो दस्सेया था कि जाह्लू तिकर जम्मू-कश्मीर भारत कन्नै नीं मिलदा ताह्लू तिकर कोई मदद नीं दित्ती जाई सकदी थी।  राजा हरी सिंह होरां व्ह्ली होर कोई चारा नीं था। तिन्हां जम्मू-कश्मीर जो भारत कन्नै मिलाणे तांईं कागजां पर अपणे दस्तखत करी दित्ते थे। इसदे परंत भारत दियां फौजां जम्मू-कश्मीर च ताबड़तोड़ तौळियां ही दाखिल होई गइयां थियां।  कई जगहां पर भारत दियां फौजां बहादरिया नै लड़ी करी पकिस्तानियां जो पिच्छें धकेलेया था।  कुत्थी-कुत्थी म्हारियां फौजां जो पिच्छें भी हटणा पिया था।   नौशेरा सेक्टर च  झांगड इक एहो जेही ठाहर थी जिसा पर दुस्मणा अपणा कब्जा करी लिया था।

दुस्मण दी नजर हुण नौशेरा पर थी।  झांगड हत्थे ते निकळणे ते बाद भारत दियां फौजां होर चौकन्ना होई नौशेरा दी फ्हाजत तांईं जी-जान ते लड़ा दियां थियां। दुस्मणा दी नफरी कई गुणा ज्यादा थी।  इसते इलावा हथियार, रासन-पाणी कनै होर जरूरी साजो सामान दी घाट साह्मणे ओआ दी थी।  नौशेरा दी जंग च तकरीबन 1000 पाकिस्तानी मारे गै थे कनै इतणे ही जख्मी होए थे। इसा लडाइया च असां दियां फौजां दे 93 जुआन सहीद कनै 102 जख्मी होए थे।  दुस्मण भरपूर कोस्त करने दे बाबजूद नौशेरा पर कब्जा करने तांईं कामयाब नीं होई सकेया था। नौशेरा दी फ्हाजत दी जिम्मेदारी  50  पैराशूट ब्रिगेड़ दे कमांडर ब्रिगेडियर मोहम्मद उस्मान होरां गास थी।  सच्चे हिन्दोस्तानी ब्रिगेडियर मोहम्मद उस्मान इक चत्तर कनै माणदार अफसर थे।  तिन्हां जो 'नौशेरा दा शेर' करी भी जाणेया जांदा है। पकिस्तानियां तिन्हा दे सिरे पर 50,000 रूपेयां दा इनाम रक्खेया था।  मसहूरी कनै तरीफां दा ब्रिगेडियर उस्मान पर कदी कोई असर नीं होंदा था।  सैह् जमीना पर पंद (चटाई) बच्छाई नै सोंदे रैह् थे।  तिन्हां कसम थी खादिह्यो भई कि जाह्लू तिकर सैह् झांगड़ जो वापस नीं लेंगे, चारपाइया पर नीं सोंगे। (तिन्हां सैह् कसम तिन्न महीनेयां दे परंत अपणी जान दई करी नभाई थी।)

ब्रिगेडियर उस्मान होरां नौशेरा दे पासें औणे वाळे पाकिस्तानी फौजां दे सारे मुमकिन रस्तेयां पर अपणी टुकड़ियां तणात करी दित्तियां थियां।  एहो जेही इक टुकड़ी नौशेरा दे उत्तर च  टैनधार दे उच्चे इलाके च भी लगाइयो  थी।  इसा टुकड़िया च 1 राजपूत (4 गार्ड्स) दे जुआन थे। ये टुकड़ी जिसा ठाहरी पर थी ओत्थू पकिस्तानियां दे औणे दे रस्ते बक्खी उतराई थी कनै नौशेरा बक्खी चढ़ाई पोंदी थी। 

सबते अगलिया पोस्टा पर नायक यदुनाथ सिंह होरां अपणे 9 जुआनां सोगी तणात थे।  6 फरवरी सन् 1948 दी भ्यागा दे छे बजी करी चाळी मिंट थे होणा लग्गेयो। पाकिस्तानियां गोळाबारी सुरू करी दित्ती थी। सारी टैनधार धमाकेयां दे परसद्देयां नै गूंजणा लग्गी पई थी। चोंह पासें मसीनगनां ते निकळदियां गोळियां दियां बौछारां कनै मोर्टार बम्बां दियां छींगडां उड्डणा लग्गी पईयां थियां। तैह्ड़ी बड़ी भारी धूरी (धुंध) थी पईयो।  सामणे किच्छ नीं सुज्झा दा था। इसदा फैदा लई करी पाकिस्तानी लटेरे हिन्दोस्तानी फौजां दियां चौकियां दे बहोत नेडें आई धमकेयो थे।

राठौर राजपूत नायक यदुनाथ सिंह दा जन्म 21 नवंबर सन् 1916 जो शाहजहांपुर, उत्तरप्रदेश च होया था।  तिन्हां दे बापू बीरबल सिंह राठौर इक कसान थे। माँ जमुना कंवर घरे जो संभाळदे थे। अट्ठ भाऊ बैहणा च यदुनाथ सिंह तरीइये नंबरे च थे। यदुनाथ सिंह  चौथी जमात तिकर ही पढ़ाई करी सके थे। इसते परंत गरीबिया दिया बजह ते तिन्हां जो स्कूल छड्डणा पिया था। सैह् खेतरां च कम्म करदे थे।  हनुमान भगत यदुनाथ सिंह जो पहलवाणी करने दी बहोत सोकीनी था।  सैह् इक बद्धिया पहलवाण थे।

नायक यदुनाथ सिंह दा व्याह नीं था होया। सन् 1941 च  पंजिह्यां सालां दिया उमरा च सैह् फौजा च भर्ती होई करी 1 राजपूत रेजिमेंट च सामल होई गै थे।  यदुनाथ सिंह पहलवाण थे इस बजह ते तिन्हां जो अंग्रेज फौजी अफ़सरां मास खाणे दी सलाह दित्ती थी पर सैह् सुद्ध साकाहारी ही रैह् थे।

जिंञा थोड़ी देही धूरी छंटी थी असां दे जुआनां जो सामणे ते हजारां पाकिस्तानी ओंदे सुज्झे थे। म्हारेयां जुआनां फायर खोली दित्ता था।  असां दियां ब्रेन गनां दियां शुरुआती बछारां कई पाकिस्तानी लम्मे पाई दित्ते थे। पर दुस्मण तौले ही संभळी गै थे। जिन्हां जो गोलियां नीं लगियां सैह् अग्गें बद्धदे रैह् थे।  नायक यदुनाथ सिंह  दुस्मणा गास ग्रेनेडों दा हमला करदे जाह्दे थे कनै गुस्से च आई करी गाळीं भी देई जाह्दे थे।  तिन्हां बड़ी चतराइया नै अपणे जुआनां सौगी मिली करी पकिस्तानियां दा मकाबला कित्ता था। पकिस्तानियां जो पता ही नीं चलेया था कि तिन्हां दा साह्मणा कितणे कि हिन्दोस्तानी फौजियां कन्नै होआ दा था। सैह्  डरी करी पिच्छें  हटी गै थे। पहला हमला टळी गिया था पर नायक यदुनाथ सिंह होरां दे भी चार जुआन जख्मी होई गै थे। 

नायक यदुनाथ सिंह होरां इक चतुर नायक होणे दे अपणे गुणा दा इस्तेमाल कित्ता था। तिन्हां तिसा घड़िया अपणा ठंडा दमाग कनै मजबूत होंसला दस्सी नै अपणे जुआनां जो दुस्मण दे अगले हमले दा मुकाबला करने तांईं फिरी तियार करी लिया था। जुआन जख्मी थे पर तिन्हां जो अपणे कमांडरें पर विसुआस था। सबना दे होंसले बुलंद थे।

थोड़िया कि देरा परंत अगला हमला होया था। इसा बारिया दुस्मण पहले ते ज्यादा थे। सैह् पहले ते होर पक्का  इरादा करी नै आयो लग्गा दे थे। घमासाण लड़ाई होई थी। नायक यदुनाथ सिंह कनै तिन्हां दे जुआनां तिसा बारिया भी डटी करी मुकाबला कित्ता था। तिन्हां दे कारगर फायर दे अग्गें बहोत सारे पकिस्तानियां दियां ल्हासां पई गइयां थियां। नायक यदुनाथ सिंह अप्पू भी जख्मी होई गै थे। तिन्हां दिया सज्जिया  बांहीं च गोळी लग्गी गइयो थी। सारे दे सारे जुआन जख्मी थे। नायक यदुनाथ सिंह होरां जाह्लू दिक्खेया कि तिन्हां दा ब्रेन गनर बहोत जख्मी होई गिया था तां तिन्हां ब्रेन गन अप्पू संभाळी लई थी कनै फैर जारी रक्खेया था। इसा बारिया पाकिस्तानी पोस्टा दे बहोत नेडें आई गैह्यो थे। नायक यदुनाथ सिंह होरां अपणे जुआनां दा होंसला नीं टुटणा दित्ता था।  दुस्मण तिन्हां अग्गें नीं टिक्की सके थे कनै इसा बारिया भी नकाम होई करी वापस मुड़ी गै थे।

तिस वक्त नायक यदुनाथ सिंह होरां दे सारे जुआन जख्मी या सहीद होई चुक्केह्यो थे। सैह् अप्पू भी बुरें हालें जख्मी थे पर तिन्हां हर हालत  च अपणी चौकी बचाणे दा फैसला करी लिह्या था।  दुस्मणा दा त्रीया हमला पिच्छलेयां हमलेयां ते ज्यादा निग्गर था। इसा बारिया नायक यदुनाथ सिंह होरां किह्लेयां ही पाकिस्तानियां जो रोकणे दा फैसला करी लिह्या था। जिंञा ही दुस्मण नेड़ें ढुक्के थे नायक यदुनाथ सिंह होरां कुद्दी करी मोर्चे ते बाहर आई गै थे।  हत्थां च स्टेन गन थी। सैह् दुस्मणा पर टुट्टी करी पई गै थे। जाह्लू स्टेन गन दियां गोळियां मुक्की गइयां ताह्लू सैह् इक हमलावर दे हत्थ ते तलवार खोही करी दुस्मणा दा मुकाबला करदे रैह् थे। दुस्मण हैराण होई नै थथळोई-बकळोई गै थे। तिन्हां च खळबळी मची गई थी। यदुनाथ सिंह दुस्मणा गास काल बणी करी टुट्टी पै थे। पाकिस्तानियां दा नौशेरे पर एह् हमला भी नकाम रिहा था। सैह् पिच्छें हटी गै थे। पर दुस्मणा दे दंद खट्टे करने वाळा भारत माँ दा सपूत नायक यदुनाथ सिंह म्हेसा तांईं सोई गिया था। तिन्हां जो दो गोळियां खास जगह पर लगिह्यां थियां—इक सिरे पर कनै दूजी छातिया च।

अणथोही बहादुरी दस्सी करी देश तांईं अपणे प्राण देणे वाळे इस सपूते जो भारत सरकारें बहादुरी दे सब्भते उंच्चे इनाम 'परमवीर चक्र' कनै नवाजेया था।

― भगत राम मंडोत्रा

(References― Paramvir Chakra citation of Naik Yadunath Singh and 'The Brave' by Rachna Bisht Rawat.)