17. मेजर रामास्वामी परमेश्वरन

मेजर रामास्वामी परमेश्वरन

(25 नवंबर 1 9 87)

सच गलाइए तां कसूर होंदे सरकारां दे कनै सजा भुगतदे फौजी जुआन। जंग कदी भी फौजी नीं छेड़दे किंञा कि जुआनां जो पता होंदा कि भई जंग होंदा क्या है।  जंग तां सरकारां छेड़दियां हन। अधेड़ उमरा वाळे ही जंग भड़कांदे हन कनै जुआन अपणा खून बगांदे हन। श्रीलंका दे घरेलू जंग दे टैमें भारत सरकारें अपणी फौज तित्थू भेजी थी। मते सारे फौजी बहादरिया नै लड़दे-लड़दे सहीद होई गै थे।  तिन्हां च इक सहीद देहे भी थे जेह्ड़े अणथोही बहादरिया नै लड़े थे कनै  भारत सरकारें तिन्हां जो परमवीर चक्र दित्ता था।  तिसा लड़ाइया च इक मात्र परमवीर चक्र तिन्हां जो ही मिल्लेया था।  पर तिन्हां दिएं राज सरकारें, होरना राज सरकारां सांहीं, तिन्हां जो सैह् मान-सन्मान नीं दित्ता था जिसदे सैह् हकदार थे।  भारत दे इक सूरमे दिया बहादरिया पर राजनीति भारी पई गई थी।

मंगलवार 16 जनवरी सन् 2018 दा धियाड़ा था।  ऑफिसर्स ट्रेनिंग अकैडमी (ओटीए) चेन्नई ते पास ऑउट होंणे ते तकरीबन पंजताळी बरहियां परंत सैंती रटैर आर्मी अफसरां दियां कोस्तां रंग लाइयां थियां।   तैह्ड़ी तिन्हां ओटीए चेन्नई बिच तिन्हां दे प्यारे बैचमेट मेजर रामास्वामी परमेश्वरन दी आदमकद कांसे दिया मूर्तिया ते पर्दा टाह्या था। मेजर रामास्वामी परमेश्वरन होरां दे साथी कनै जुआन तिन्हां जो मेजर 'पेरी' कनै 'पेरी साहब' दे नां ते बुलांदे थे।  सैह् सन् 1987 च श्रीलंका बिच एलटीटीई कन्नै लड़दे-लड़दे सहीद होई गै थे।  मूर्तिया पर कुल अठ लख  रुपेइए खर्च होए थे। तिन्हां सैंती रटैर अफसरां मिली नै सत लख रुपेइए अप्पू ते पाए थे कनै इक लख मेजर 'पैरी' दी महार रेजिमेंट ते आए थे।  एह् मूर्ति लगाणे दी स्कीम, तिस ते इक साल पहलें, कर्नल के जी नायर (रटैर) दी बुलाई बैचमेटां दी मीटिंग च बणाई गई थी।  मूर्ति लगाणे दा कम्म, तिस वैच दे सब्भते सीनियर अफसर लेफ्टिनेंट जनरल राम प्रताप (रटैर) होरां दिया छतरछाऊंआ हेठ होया था।

मेजर रामास्वामी परमेश्वरन होरां दे दोस्त कनै बैचमेट रैह्यो कर्नल रामा कृष्णन होरां टाइम्स ऑफ इंडिया जो दस्सेया था कि किंञा परमवीर चक्र पाणे वाळेयां दा मान-सन्मान होंदा था कनै तिन्हां दे परुआरां जो मदत कनै आदर मिलदा था।  पर मेजर रामास्वामी परमेश्वरन होरां जो किछ भी नीं मिल्लेया था। बजह एह् थी कि श्रीलंका च हिन्दोस्तानी फौज दा जाणा इक नाजुक मसला था। तमिलनाडु च सारियां पॉलिटिकल पार्टियां तिस ते बरखिलाफ थियां।  मेजर रामास्वामी परमेश्वरन होरां दे बैचमेट इसा गल्ला ते दुक्खी थे कि राजनीति दे चलदेयां देस दे इक होणहार सूरमे कन्नै नियां नीं होया था। पर भारत दी फौज कनै 'पैरी' दे दोस्त तिन्हां जो नीं भुल्लेयो थे।   ओटीए, चेन्नई  ते निकळनें वाळे सैह् इक मातर परमवीर चक्र विजेता हन।  ओटीए दे ड्रिल ग्राउंड  दा नां तिन्हां दे नांएं पर है। कोडंबक्कम दे आर्मी वेलफेयर हाउसिंग बोर्ड दे कॉम्प्लेक्स दा नां 'परमेश्वरन विहार' भी तिन्हां दे नां पर है।

मेजर रामास्वामी परमेश्वरन होरां दा जन्म 13 सितंबर सन् 1946 जो बंबई महाराष्ट्र च होया था। तिन्हां दे बापुए दा नां  के.एस. रामास्वामी कनै अम्मा दा नां जानकी था। मेजर परमेश्वरन होरां दिया घरेवाळिया दा नां श्रीमती उमा था। सैह् इक कवि कनै लिखारी थी। तिन्हां दी स्कूली पढ़ाई एस.आई.ई.एस (साउथ इंडियन एजुकेशन सोसायटी) हाई स्कूल, मुंबई ते सन् 1963 च पूरी कित्ती थी।  तिस दे परंत तिन्हां सन् 1968 च एस.आई.ई.एस कॉलेज ते सांइस च ग्रैजुएशन कित्ती थी।

फौजियां दियां बहादरियां दियां कहाणियां पढ़ी-सुणी करी नै मेजर रामास्वामी परमेश्वरन होरां भी फौज च जाणे दा मन बणाई लिया था।  तिन्हां सन् 1971 च ऑफिसर्स ट्रेनिंग अकैडमी (ओटीए) च दाखला लई लिया था।  तित्थू ते सैह् 16 जून 1972 जो कमिशंड अफसर बणी नै 15 महार च सामल होए थे।  अठ साल तिकर 15 महार कन्नै  रैह्णे दे बाद तिन्हां जो 5 महार च भेजया गिया था।

15 महार कनै 5 महार  कन्नै सर्विस दे दौरान तिन्हां उत्तर-पूर्व च उग्रवादियां दे खिलाफ कई कारबाइयां च हेस्सा लिया था। सैह् अपणे होंसले, मजबूत इरादे कनै मुस्कल घड़ियां च अपणे जुआनां जो ठंड़े दमाके कनै लीड़ करने तांईं मसहूर थे। सैह् अपणे हर मिसन च सब्भते अग्गें रैंह्दे थे।

श्रीलंका च अमन चैन भंग होणे दी जड़ तित्थू दे सिंघली कनै तमिलां दे बिच कसमकस थी। तित्थू तमिल कुल आबादी दा तकरीबन 18 प्रतिसत थे। श्रीलंका दी सरकार च सिंघलियां दा बहुमत रैंह्दा आया था इस करी नै तमिलां दे हितां दी अणदिक्खी होंदी रैंह्दी थी।   जिस ते तमिलां च इक बुआळ भरदा रिहा था कनै सैह् बुआळ इक विद्रोह बणी नै फुट्टेया था।  तमिल अप्पू तांईं इक बक्खरा देस 'तमिल ईलम' मंगणा लग्गी पै थे।  श्रीलंका दियें  सरकारें इसदा सख्त बरोध कित्ता था कनै तमिलां जो दबाणा सुरू करी दित्ता था। तिस दा नतीजा एह् होया था कि श्रीलंका ते मते सारे तमिल रिफ्यूजी बणी करी भारत दे तमिलनाडु सूबे च आई गै थे। सैह् हालात भारत तांईं मुफीद नीं थे।  29 जुलाई सन् 1987 जो भारत कनै श्रीलंका दे बिच इक समझोता होया था जिस च श्रीलंका दे कई तमिल आगू भी सामल होए थे। तिस समझोते दे मुताबक भारत सरकारें श्रीलंका च इक शांति सेना (इंडियन पीस कीपिंग फोर्स— आई.पी.के.एफ) भेजणी थी जिसा तित्थू अमन कायम करी नै तमिल रिफ्यूजियां दा भारत च ओणा रोकणा था।

समझोते दे अगले दिन मतलव 30 जुलाई सन् 1987 जो, ऑपेरशन पवन दे तहत, भारत दी शांति सेना श्रीलंका बक्खी कूच करी गई थी।  भारत दी फौज दा 54 इन्फेंट्री डिवीजन तिस ऑपरेशन च सामल था।  तिस इन्फेंट्री डिवीजन दे 91 इन्फेंट्री ब्रिगेड दे अंडर 8 महार भारत दी फौज दियां उन्हां बटालियनां च सामल थी जेह्ड़ियां सब्भ ते पैहलें श्रीलंका च गइयां थियां।  मेजर परमेश्वरन जो 5 महार ते बदळी नै 8 महार च भेजया गिया था। तिन्हां जो 8 महार च भेजणे दी पहली खास बजह एह् थी कि सैह् तमिल जाणदे थे कनै दूजी बजह एह् थी कि तिन्हां जो उग्रवादियां कनै लड़नें दा मता सारा तजर्बा था।

भारत दी शांति सेना नै श्री लंका जाई करी सारेयां उग्रवादियां गास हथियार डालणे तांईं दबाओ बणाया था।  इस मामले च शांति सेना किछ हद तिकर कामयाव भी रही थी पर तमिल ईलम दा उग्रवादी संगठन लिबरेशन टाइगर्स ऑफ तमिल ईलम (एलटीटीई) हथियार डाळणे दे मामले च कपट खेली गिया था।  तिन्हां अपणे सारे हथियार शांति सेना दे हवाले नीं कित्ते थे कनै आत्मघाती दस्ते बणाई नै गुरिल्ला जंग छेड़ी दित्ती थी। इस बजह ते शांति सेना जो अपणे तौर तरीके बदलणे पई गै थे।  शांति सेना तित्थू  उग्रवादियां कन्ने लड़ाइया च उळझी गई थी।

शांति सेना जो कई जगहां पर उग्रवादी संगठन एलटीटीई दा सामणा करना पिया था, जिन्हां च मरुथनामादास कनै कंथारोदाई  दियां झड़पां खास थियां।

8 महार बटालियन दी अल्फा कंपणी दा ठकाणा श्रीलंका दे जाफना सहर ते तकरीबन साढ़े अठ किलोमीटर उत्तरे पासें उडुविल गर्ल्स कॉलेज च था।  24 नवंबर सन् 1987 दिया संझा खबर मिल्ली थी कि कंथारोदाई ग्रांएं दे हेडमेन दे घरें उग्रवादियां दे हथियारां कनै गोळा बरूद दी इक खेप उतरा दी थी। कंपणी दे उप-कमांडर कैप्टन डी.आर. शर्मा 10 जुआनां दी पट्रोल पार्टी लई करी तित्थू जो चली पै थे।  अम्बरे च घणे बद्दळ थे। नेहरा पोणा लगी पिया था।  पट्रोल पार्टी गुमसुम अप्पू कन्नै ऑटोमैटिक हथियार लई करी अग्गें बद्धदी जाह्दी थी। कंथारोदाई ग्रां च इक्के दुक्के छितरेयो घर थे कनै सारा ग्रां  नरेळां दे झिंडां कन्नै घिरेया था। 

पट्रोल पार्टी अज्हें अद्ध रस्ते च ही थी।  कैप्टन शर्मा होरां अपणे कंपणी कमांडर 'पेरी साहब' (मेजर रामास्वामी परमेश्वरन) जो रेडियो पर खबर दित्ती थी कि तिन्हां गास इक मंदरे दे पासे ते फैर ओआ दा था कनै लग्गा दा था कि उन्हां दी नफरी तिन्हां दे अंदाजे ते मती भारी थी। 'पेरी साहब' 20 जुआनां दी इक होर पेट्रोल लई करी तिसा ठाहरी बक्खी चली पै थे। सूबेदार सम्पत सावले भी तिसा पार्टिया च सामल थे। राती धरातें कुल मिलाई करी 30 जुआनां दी पेट्रोल कंथारोदाई ग्रां पासें चली पई थी।  बरखा किणी-किणी पोणा लगी पई थी। 'पेरी साहब' घुप नेहरे च अग्गें बद्धदे जाह्दे थे। 

राती दे तकरीबन डिढ़ बजे सैह हेडमेन दे घरे नेड़ें पूज्जी गै थे।  देहा लग्गा था कि तिस घरे दे सारे लोक सुत्तेयो थे।  ताह्लू बरखा दा बड्डा तराड़ पई गिया था। सारे जुआन बुरे हालें सिज्जी गैयो थे।  बूटां दे सोळां कन्नै चिक चिपकी गइयो थी।  पाणियें नै भरोयो बूट भारी होई गैयो थे।  

'पेरी साहब' होरां दस-दस जुआनां दियां तिन्न छुंडियां बणाइयां थियां कनै तिस घरे जो तकरीबन 800 मीटर दूरा ते घेरा पाई दित्ता था।  घरे दिया गैरजा व्ह्ली इक ट्रक खड़ोतेया सुज्झा दा था जिसते लग्गा दा था कि तित्थू असले दी खेप उतरियो थी।  'पेरी साहब' होरां नेहरे च हमला करने दा खतरा नीं लैणा चांह्दे थे।  तिन्हां फैसला लिया था कि  भ्याग होणे तिकर निहाळ कित्ती जाए। मुसलाधार बरखा च जुआन घाए पर चुपचाप बैठेयो थे। कुसी जो छिकणे-खंगणे हिलणे-डुलणे दी इजाजत नीं थी। भ्यागा साढ़े पंज बजे तिस घरे दा कुत्ता भोंकणा लगी पिया था।  मेजर परमेश्वरन होरां घरे दी तलासी लई थी पर किछ भी नीं मिल्लेया था। तिन्हां वापस जाणे दी सोची लई थी।  सोची समझी करी अफसरां फैसला लिया था कि वापसी कंथारोदाई-उड़ुविल दे पक्के रोड च होई नै कित्ती जाए।

तिस रस्ते च वापस जाणा तिन्हां दे माड़े भाग थे। रस्ते च इक तळा था कनै तिन्न मंदर।  तित्थू एलटीटीई दे मिलीटेंट लुक्केयो थे।  सैह् 'पेरी साहब' दिया पार्टिया जो चुपचाप दिक्खा दे थे कनै तिन्हां पर हमले दिया ताड़ा च थे।

पेट्रोल पार्टी तिन्न छुंड़ियां च चलियो थी। सूबेदार सम्पत साहब 10 जुआनां कन्नै अग्गें-अग्गें थे। तिन्हां ते पिच्छें कैप्टन शर्मा 10 जुआनां सोगी थे। सब्भते पिच्छें मेजर परमेश्वरन होरां 10 जुआन लई करी चलेयो थे।

25 नवंबर सन् 1987 भ्यागा दे साढ़े छे बजणा लगेयो थे। थक्केयो, सिज्जेयो कनै निंदरे जुआन तळा दे नेड़े ते होई लंग्घा दे ही थे कि हैवी मसीन गन इक बर्स्ट सिपाही जीवन अथावले पर आया था कनै सैह् धरती पर पई गै थे।  पिच्छें सिपाही जगन लाल थे तिन्हां इक मिलीटेंट मारी ता था पर तिन्हां जो भी एलएमजी दा इक बर्स्ट आई बज्जेया था।  तिस वक्त  तिन्नों मंदरां ते मिलीटेंट फैर करना लगी पै थे। चोंह पासें होआ च गोळियां ही गोळियां थियां।  सारी पट्रोल पार्टी बिखरी गई थी।

जुआन अपणे बचाओ तंई धरती पर लेटी गै थे।  मेजर साहब होरां तिन्हां जो तुरंत सड़क ते दूजे पासें जाई करी कवर लैणे तांईं हुक्म दित्ता था। जुआन अपणे हथियारां कनै जख्मियां जो खिंजीं करी सड़का दे दुयें पासें बणे च तकरीबन 5 मीटर अंदर चली गै थे। तित्थू ते तिन्हां जवाबी फैर देणे दी कोस्त कित्ती थी पर कोई फायदा नीं होया था किंञा कि मिलीटेंट तिन्हां जो जंगल दे रुक्ख-बूटेयां दिया बजह ते नजर नीं ओआ दे थे।  दूंन्हीं अफसरां मिली करी इक फैसला लिया था जिसदे मुताबक 'पेरी साहब' होरां जो पूर्व दे पासे ते अग्गें बद्धणा था कनै कैप्टन शर्मा जो पच्छम कनै उत्तर दे पासे ते जवाबी हमला करना था।

कैप्टन शर्मा कनै सिपाही जरनैल सिंह मंदरे च छिपेयां मिलीटेंटां पर रोकेट चलानें तांईं तळाए बिच उतरे थे किंञा कि रोकेट लांचर दा इस्तेमाल करनै तांईं खुल्ली जगह दी जरूरत होंदी हे।  तिन्हां मंदरे पासें रोकेट दागे थे पर कोई फायदा नीं होया था।  सैह् गोळियां दियां बछारां हेठ तळाए च ज्यादा देर तिकर नीं टिकी सके थे। सैह् मुड़ी आए थे। तिस वक्त सिपाही जरनैल सिंह दिया जंघा च एलएमजी दा बर्स्ट आई बज्जेया था। सैह् घसटोंदे-घसटोंदे इक अद्ध-बणे  मकाने  च जाई बड़े थे। कैप्टन शर्मा होरां तित्थू रूकणे दी गल्ल सोची थी। तिसा जगह च दो घर होर भी थे।  अणजाणे च जुआन मिलीटेंटां दी एम्बुश च खुदबखुद जाई फसे थे। जाह्लू नायक अप्पन्ना सर्जे फैर करने तंई अद्ध-बणे  मकाने ते बाहर आए थे तां सैह् दो मिलीटेंटां कन्नै टकराई गै थे। तिन्हां इक्की जो मारी दित्ता था कनै दूजा नह्ठी गिया था।  सैह् नह्ठदे मिलीटेंटे गास नसाणा लगा दे ही थे कि तिन्हां जो कई गोळियां आई लगियां थियां। सैह् सहीद होई गै थे।  कैप्टन शर्मा होरां सिपाही जरनैल सिंह जो मिलीटेंटां दे मकाने पर रोकेट चलाणे तांईं गलाया था।  तिन्हां रोकेट चलाया था पर सैह मिसफायर होई गिया था।  कैप्टन शर्मा होरां दे रेडियो सैट दा एन्टीना भज्जी गिया था। बटालियन हेडकुआटर कन्नै तिन्हां दा कम्युनिकेशन कटोई गिया था।  सैह् तित्थू खिंडरियां तारां दा एन्टीना बणाणे दा जुगाड़ करा दे ही थे कि इक ग्रनेड अंदर आई पिया था।  पहले ही ते जख्मी सिपाही जरनैल सिंह होरां ग्रनेड जो चुक्की करी बाहर सटणे दी कोस्त कित्ती थी पर ग्रनेड फटी गिया था कनै सैह् होर बुरी तरहां जख्मी होई गै थे। कैप्टन शर्मा होरां मिलीटेंटां पर ग्रनेड सट्टे थे।  दो मिलीटेंट पई गै थे।  जुआनां दिक्खेया था कि तिन्हां जो दूजे मिलीटेंट खिंजी लई गै थे।

मिलीटेंट चोंह पासेयां ते गोळाबारी करा दे थे। किछ छतां गास थे कनै किछ नरेलां दे रुक्खां गास बैठेयो थे।  कैप्टन शर्मा कनै सूबेदार सम्पत साहब अणजाणे च अपणे जुआनां समेत मिलीटेंटां दे गुप्त ठकाणे आई फस्सेयो थे।  मिलीटेंट एके-47, ग्रनेड, बरूद कनै खतरनाक हैवी मसीन गनां दा इस्तेमाल करा दे थे।  तिन्हां दा बचणा मुस्कल था। 

'पेरी साहब' होरां अपणी लोकेसन ते दिक्खेया था कि  तिन्हां दे अफसर जेसीओ समेत जुआन एम्बुश च फस्सी गैयो थे। तिन्हां अपणेयां जुआनां जो बचाणे तांईं पिच्छे ते जाई करी  काउंटर एम्बुश लगाणे दा फैसला लिया था।  सैह् अपणे 10 जुआन लई करी अग्गें बद्धे थे।  तिन्हां गास भी घणा फैर ओणा लगी पिया था। तिन्हां दी पार्टी खिंड़ी गई थी। तिन्हां इक एलएमजी  इक खास जगह पर लगाई करी  सिपाही राजकुमार जो फैर करनें तांईं गलाया था कनै तिन्हां तिस फैर दिया आड़ा च अग्गें बद्धणे दा फैसला कित्ता था।  राज कुमार होरां फैर करना सुरू कित्ता ही था कि तिन्हां पर इक नरेळा दे रूक्खे गासा ते एके-47 दा फैर आया था कनै सैह थल्लें पई गै थे।

मेजर 'पेरी साहब'' रति भी घबराए नीं थे। सैह् जमीना पर रगड़ोंदे-रगड़ोंदे नरेळां दे इक झिंड़े तिकर जाई रैह् थे।  तित्थू मते सारे नरेळां दे रुक्ख तकरीबन पंज फुट ते उप्पर कटोह्यो खड़ोतेयो थे। 'पेरी साहब' होरां तिन्हां ठिंड़ां दी आड़ लई करी मिलीटेंट एम्बुस  दे उप्पर फैर करना सुरू करी दित्ता था।  एलटीटीई दे मिलीटेंट हक्के-बक्के रही गै थे तिन्हां जो लग्गेया था कि सैह् घिरी गैयो थे।   ताह्लू इक्की रुक्खे गासा ते एचएमजी दा इक बर्स्ट तिन्हां दे खब्बे हत्थे दे मोनें  पर आई लग्गेया था।  तिन्हां दी घड़ी दूर जाई पई थी कनै हत्थ बेकार होई गिया था।  जुआनां दिक्खेया था कि तिन्हां द प्यारे 'पेरी साहब' नेड़े दे मिलीटेंटे गास टुटी पै थे कनै तिसदा हथियार खोही करी तिस कन्नै ही तिद्दो मारी दित्ता था। तिन्हां अपणे जुआनां जो अपणे पिच्छें ओंणे तांईं ओआज लगाई थी। तिसा घड़िया एचएमजी दा इक बर्स्ट तिन्हां दिया छातिया च आई लग्गा था।  बर्स्ट लगदेयां ही मेजर रामास्वामी परमेश्वरन मूंधे मुंह धरती पर पई गै थे।  तकरीबन इक घंटे परंत जाह्लू कैप्टन शर्मा अपणे कमांडर दी बोडी तोपणा आए थे तां तिन्हां जो सैह् घड़ी भी मिल्ली थी जेह्ड़ी भयागा दे अठ बजी नै दस मिंट पर रुकी गइयो थी।

अपणे कमांडरे जो पोंदा दिक्खी जुआन जी-जान लगाई करी लड़े थे। मिलीटेंटां दे पैर उखड़ी गै थे। जेकर 'पेरी साहब' तैह्ड़ी काउंटर एम्बुश नीं लगांदे तां 8 महार दा बड़ा भारी जानीं नुकसान होई जाणा था।  किछ देरा परंत फौज दियां होर टुकड़ियां आई गइयां थियां पर जाणे वाळे तां दूर चली गैयो थे जित्थू ते कोई मुड़ी नीं ओंदा।

6 मिलीटेंट मारे गै थे।  8 महार दे 'पेरी साहब', नायक अप्पन्ना सर्जे, राजन लाल कनै मिलिंद कोहले सहीद होई गै थे कनै 9 जुआन जख्मी होए थे। 25 नवंबर सन् 1987 जो मेजर 'पेरी' दी ल्हास तिन्हां दे परुआरे जो देणे तांईं होआ दे रस्तें चेन्नई भेजी दित्ती गई थी।

तिसा अणथोइया बहादरिया तांईं मेजर रामास्वामी परमेश्वरन होरां जो देस दा बहादरी दा सब्भ ते बड्डा इनाम परमवीर चक्र दित्ता गिया था।

―भगत राम मंडोत्रा

(Refrences― 'The Brave - Param Vir Chakra Stories by Rachna Bisht Rawat; Jovita Aranha - The Better India; The Times of India dated Jan 17, 2018 and 'Major Ramswamy Parameshwaran'  by Jai Hind dated Jun 15, 2019.)