15. मेजर होशियार सिंह

 

मेजर होशियार सिंह

(15-16 दिसम्बर 1971)

15 दिसम्बर सन् 1971 दी संझ, राती दिया दरेहली  पर खड़ोतियो थी।  3 ग्रेनेडियर्स दी 'सी' कंपणी दे सूरमे हथियारां नै लैस होई तियार थे।  निहाळ थी तां बस कूच करने दे हुक्म दी। तिन्हां दी नज़र साह्मणे खड़ोतेयो अपणे कंपणी कमांडरें पर थी।  

अपणे अगले टास्क दी जाणकारी तिन्हां जो पहलें ही मिली चुक्कियो थी। 'सी' कंपणी जो बसंतर नदी दे पारले पासें जरपाल नां दे पाकिस्तानी ग्रांएं पर खब्बे यनि के पूर्व दे पासे ते हमला करी नै राती साढ़े बारह बजे ते पहलें अपणे कब्जे च लैणा था।  बटालियन दी 'बी' कंपणी जो सज्जे मतलव पच्छमे दे पासे ते जरपाल गास अटैक करना था।   भारत दियां फौजां जो अग्गें बद्धणे तांईं बसंतर पर पुळ बणाणा जरूरी था।  एह् कम्म जरपाल पर कब्जा कित्ते बगैर नीं होई सकदा था।

कंपणी कमांडर होरां अपणिया घड़िया बक्खी नजर दित्ती थी फिरी जरा कि रुकी नै कंपणी जो अग्गें बद्धणे दा इसारा करी दित्ता था।  कंपणी अग्गें बद्धणा लगी पई थी।  कंपणी कमांडर सब्भ ते अग्गें थे। 

जरपाल पर कब्जा करना कोई सान कम्म नीं था। बसंतर नदी दे दूंहीं पासें दुस्मणा जमीनां च सुरंगां थियां बछाइयां कनै जरपाल ग्रां च तिन्हां दी बड़ी तगड़ी मोर्चेबंदी थी।  दुस्मणा दियां तोपां दी भारी गोळावारी होआ दी थी।  कंपणी चुपचाप बसंतर दे कंह्डे तिकर पुज्जी गई थी।  बसंतर च बगदा पाणी कुत्थी-कुत्थी जाह्नुआं ते ऊपरा तिकर डुग्घा था। दिसंबर दी ठंड कनै बसंतर दा बर्फ़े सांहीं ठंडा पाणी।  चानणी रात थी। बसंतर दा पाणी लिसका दा था। सारेयां ते पहलें कंपणी कमांडरें पाणिये च गाह्ण दित्ता था। थोडिया देरा बाद सारी कंपणी बसंतर दे पारले कंह्ड़े पर थी।   ठंडी रात उपरा ते ठंडे पाणिएं कनै गच्च कपड़े, पर कुसी भी जुआने दा बदन कम्बा दा नीं था। तिन्हां दे हौंसले बुलंद थे।  जितणा भरोसा  जुआनां जो अपणे कमांडरे पर था तिस ते ज्यादा भरोसा कमांडरे जो अपणे जुआनां पर था। ये भरोसा बड्डे-बड्डे जंग जित्ती लैंदा है।  

बसंतर नदी पार तकरीबन 1500 गज चौड़े इलाके च दुस्मणा सुरगां दा जाळ बछाई रक्खेया था। असां देयां जुआनां दे भाग खरे थे कि सैह् सुरगां ज्यादातर एन्टी टैंक सुरगां थियां। एन्टी टैंक सुरगां जुआनां दे भारे कन्नै नीं पड़कियां थियां। पर पारले पासे दा तोपखाना घणी बम्बारी करना लगी पिया था। साह्मणे वाळे डुग्घे खुणेयों मोर्चेयां ते दुस्मणा दी भारी गोळाबारी होणा लगी पई थी पर  ग्रेनेडियरां दा हमला नीं रुक्केया था।  हत्थापाइया दी नौवत आई गई थी।  ग्रेनेडियरां दे मज़बूत हमले अग्गें पाकिस्तानी फौज ज्यादा देर नीं टिकी सकी थी।  दुस्मणा च भगदड़ मची गई थी। किछ देरा परंत जरपाल भारत दे कब्जे 'च था। 

कंपनी कमांडरें बड़े फक्रे कनै अपणे कमांडिंग अफसरे जो रेड़ियो पर खबर दित्ती थी, 'सर, मबारकां होण, असां दित्तेयो टैमे ते पहलें ही जरपाल पर कब्जा करी लिया।'    'शाबाश! बहोत अच्छे'  सीओ दा जवाब था, "दुस्मणा जरपाल बापस लैणे दी कोस्त करनी है। तुसां जमी रिहा।'   'सर, दुस्मण चाहे जितणा भी ज़ोर लगाए असां हुण जरपाल नीं छड्डणा,'  कंपणी कमांडरें दा जवाब था।  कंपणी कमांडर होरां जो पता था कि तिन्हां दा असली मतिहान होणा अज्हें बाकी है।

एह् कंपणी कमांडर मेजर होशियार सिंह थे। मेजर होशियार सिंह दा जन्म सोनीपत ते 25 किलोमीटर दूर, सोनीपत-रोहतक रोड़ दे कनारे पर बस्सेयो, सिसाना नां दे  ग्रांएं च इक खरे खांदे-पींदे टब्बरे 'च 5 मई 1936 दे ध्याड़ें होया था। तिन्हां दे बापू चौधरी हीरा सिंह इक मन्नेयों-तन्नेयों जिमींदार थे। अम्मा मथुरी देवी इक दयालु औरत थी। मेजर होशियार सिंह दा व्याह छोटिया उम्रा च ही धन्नो देवी कन्नै होई गिया था। व्याह दे वक़्त सैह् सतमीं जमात च पढ़ा दे थे। तिन्हां दे तिन्न पुत्र होए थे।

मेजर होशियार सिंह होरां अपणी सुरू दी पढ़ाई ग्रांएं दे स्कूले च पूरी कित्ती थी। फिरी इक साल जाट कॉलेज, रोहतक 'च भी पढ़े थे। सैह् इक बद्धिया स्पोर्ट्समैन कनै बॉलीबॉल दे नेसनल लेवल दे खलाड़ी थे। जाट रेजिमेंट दे ट्रेनिंग सेंटर दे इक सीनियर अफसरें तिन्हां जो इक बॉलीबॉल दा मैच खेलदेयां दिक्खेया था। तिन्हां दे खेल जो दिक्खी सैह् बड़े खुस होए थे। तिन्हां होशियार सिंह होरां जो जाट रेजिमेंट च सिपाही भर्ती करी लिया था। होशियार सिंह होरां मेहनत करी नै 30 जून 1963 जो कमीसन लिया कनै सैह् अफसर बणी ग्रेनेडियर्स रेजिमेंट दी तीजी बटालियन च सामल होई गै थे।

1965 दे भारत-पाकिस्तान जंग च 3 ग्रेनेडियर्स जो बीकानेर सेक्टर च इक पाकिस्तानी ग्रांएं पर हमला करी दुस्मणा जो पिच्छें खदेड़ना था।  मेजर (उस मौकें लेफ्टिनेंट) होशियार सिंह जो दुस्मण दी टोह लैणे तांईं भेजेया गिया था। होशियार सिंह होरां तित्थू दे लोकां सांहीं अपणा भेष बणाया था कनै ऊंटे पर सुआर होई पाकिस्तानी सरहद पार करी पकिस्तानियां कन्नै रली-मिली गै थे। तिन्हां बापस आई करी अपणे कमांडिंग अफसरे जो पाकिस्तानी मोर्चेबंदी दा अपणियां हाखीं दिक्खेया ब्यौरा दित्तेया था जेह्ड़ा कारगर हमला करने तांईं बड़ा कम्में आया था। इस तांईं तिन्हां जो 'मैन्शन इन डिस्पैच'  मिलेया था।

मेजर होशियार सिंह सिद्धे-सादे फौजी अफसर थे।  अपणे जुआनां कन्नै रळी-मिळी करी रैंह्दे थे कनै तिन्हां दा खास ख्याल रखदे थे।  तिन्हां दे सुख-दुख बंडदे थे। जुआन भी अपणे कंपणी कमांडरे दा बड़ा आदर करदे थे।  कंपणी कमांडर दे इक इसारे पर जान देणे जो तियार रैंह्दे थे।

1971 दे भारत-पाकिस्तान जंग च, 5 दिसम्बर जो भारत दे 54 इन्फेंट्री डिवीजन नै पठानकोट-जम्मू हाईवे दी फ्हाजत तांईं शक्करगढ़ सेक्टर च हमला करी पाकिस्तानी फौजां जो पिच्छें धकेलणा सुरू करी दित्तेया था।  ग्रेनेडियर्स रेजिमेंट दी तीजी बटालियन शक्करगढ़ सेक्टर 'च, अग्गें बद्धदे 54 इन्फेंट्री डिवीज़न दी आगू बटालियन थी। तिस मौकें इस  बटालियन दी कमान लेफ्टिनेंट कर्नल वेद प्रकाश ऐरी दे हत्थ 'च थी। 15 दिसम्बर तिकर इस सेक्टर च भारत दियां फौजां पाकिस्तान च 15 किलोमीटर ते जादा अंदर चली गइयां थियां। 15 दिसंबर जो राती दे धराते तिकर 3 ग्रेनेडियर्स दा जरपाल ग्रांएं पर कब्जा होई गिया था।  बसंतर पर असां दे फौजी इंजीनियर पुळ बणाणे 'च कामयाब होई गै थे।

होशियार सिंह होरां जाणदे थे पकिस्तानियां हर कीमता पर बसंतर ब्रिज हेड जो तोड़ने तांईं जवाबी हमले करने थे।  जरपाल पर कब्जा बणाई रखणा बड़ा करड़ा कम्म था।  पाकिस्तानी फौज दे जवाबी हमले दिया निहाळा च ग्रेनेडियर जैले होई बैठेयो थे।  16-17 दिसंबर सन् 1971 जो पकिस्तानियां छे जवाबी हमले कित्ते थे पर म्हारेयां जुआनां अग्गें तिन्हां दी इक भी नीं चली थी। 

पाकिस्तानी फौज दे जवाबी हमले दियां लहरां पर लहरां ओंदियां गइयां थियां। सब्भ ते पहलैं 16 दिसंबर दिया भ्यागा तड़कें 3.30 बजे पैदल फौज दा हमला होया था जिसजो असां देयां सूरमेयां तोड़ी दित्ता था।  तिसदे परंत 8-9 बजे दुस्मण टैंक लई करी चढ़ी आए थे सैह् हमला भी नाकाम करी दित्ता गिया था।  तकरीबन 12 बजे फिरी टैंकां कन्नै हमला होया था पर पाकिस्तानी अपणे मकसद च कामयाब नीं होई सके थे।  संझा तकरीबन 4 बजे दुस्मणा जी जान लगाई करी नै  इक बड्डा टैंक हमला कित्ता था पर भारत माता दे सूरमे डटी रैह् थे।

जुआन थकी गैह्यो थे पर तिन्हां दा जोस बरकरार था। जाह्लू जुआनां जो दुस्मण दे हमलेयां ते बेह्ल मिलदी थी तां सैह् अपणे सोगी रक्खेयो फील्ड़ रास्न ते किछ मुंहएं पाई लैंदे थे कनै मोर्चेयां च चाह् बणाई पी लैंदे थे।  मेजर साहब, अपणी जान दी परुआह् कित्ते बगैर, इक मोर्चे दे दूजे मोर्चे पर जाई करी जुआनां दी हिम्मत बद्धांदे रैह् थे।  तिन्हां अपणेयां जुआनां दा होंसला  टुटणा नीं दित्ता था। 

तैहड़ी तित्थू दूजी आलमी जंग ते बाद दी सब्भ ते बड्डी टैंकां दी लड़ाई होई थी। पाकिस्तानी फौज दे तकरीबन 45 टैंक बरबाद होई गै थे।  तिसा टैंक लड़ाइया च सेकंड लेफ्टिनेंट अरुण खेतरपाल  होरां अपणी अणथोही बहादुरी दस्सी थी जिस तांईं तिन्हां जो मरणेपरंत परमवीर चक्र दित्ता गिया था।  तिन्हां मते सारे  टैंक तोड़ी करी पाकिस्तानियां जो पिच्छें मुड़णे जो मजबूर करी दित्ता था।

मेजर होशियार सिंह होरां अपणे मोर्चेयां ते तकरीबन 400 मीटर दूर जरपाल दे दक्खणे बक्खी गाजीपुर रिजर्व फोरेस्ट बिच इक लिसनिंग पोस्ट (सुणगुण चौकी) बणाइयो थी।  तिसा पोस्टा ते रेडियो पर रपोट मिल्ली थी कि गाजीपुर दे बणे च दुस्मणा दी हरकत होआ दी थी कनै ये पक्का था कि तिस पासे ते हमला होणे वाळा था।  मेजर होरां पोस्ट देयां जुआनां जो चुपचाप बापस कंपणियां नै आई मिलणे दा हुक्म दित्तेया था।  तिन्हां अपणे कमाडिंग अफसर जो रेडियो सैट पर दुस्मण दे ओणे वाळे हमले दी खबर दित्ती थी कनै तोपखाने दी मदद लैणे तांईं गलाया था।

17 दिसंबर दिया भ्यागा तड़कें 4 बजे पाकिस्तानी फौज दा इक घणघोर अटैक आया था।  पाकिस्तानी अपणे पिच्छे ते मती सारी फौज लई आए थे।  तिन्हां दा एह् असां गास दो तरफा हमला था ― इक्की पासे ते टैंकां दा कनै दुये पासे ते इन्फेंट्री दा।  मेजर होशियार सिंह होरां अपणे जुआनां जो तियार रैह्णे जो गलाया था कनै जाह्लू तिकर सैह् नीं गलाण  ताह्लू तिकर फैर नीं खोलणे दा हुक्म दित्ता था।  तिन्हां दुस्मण जो खरा कि गांह् ओणा दित्ता था। जाह्लू हमलावर 100-150 गज दूर थे तिन्हां जोरे नै बोलया था 'फायररर..'।  दुस्मणा पर सारियां रैफळां, एलएमजियां, एमएमजियां कनै मोर्टारां ते अग्ग बरसणा लगी पई थी। उपरा ते तोपखाना कनै टैंक कहर ढाह् दे थे।  दुस्मण नटट् रही गै थे। तिन्हां जो कोई रैह्-फैह् नीं रही थी। हर पासें मौत तांडव नच्चा दी थी।  

इस हमले च भी तिन्हां दे बहोत सारे टैंक तबाह होए थे कनै 350 दे आसपास जुआन मारे गै थे।  तिन्हां मरणे वाळेयां च पकिस्तानी फौज दे पंज अफसर भी थे। जिन्हां च पाकिस्तान दी 35 फ्रंटियर फोर्स दे बहादर कमांडिंग अफसर लेफ्टिनेंट कर्नल मोहम्मद अकरम रज़ा भी थे जिसदी ल्हास  मेजर होशियार सिंह होरां दी 'सी' कंपणी दे मोर्चेयां ते महज पच्ची गज दूर मिल्ली थी।लेफ्टिनेंट कर्नल वेद प्रकाश ऐरी होरां लेफ्टिनेंट कर्नल मोहम्मद अकरम रज़ा दी बहादरी दिक्खी नै तिन्हां जो सरधांजली लिक्खी थी जिस जो पढ़ी करी  पाकिस्तानी सरकारें लेफ्टिनेंट कर्नल मोहम्मद अकरम रज़ा जो बहादुरी तांईं  'निशान-ए-हैदर' इनाम दित्ता था।

मेजर होशियार सिंह होरां दी जंघ दुस्मण दे गोळे दी इक छींगड़ लगणे ते जख्मी होई गई थी। इलाज तांईं पिच्छें हटणे दी कमांडिंग अफसर दी सलाह दे बावजूद तिन्हां जंग दे मैदान च ठहरने दा फैसला लिया था।  सैह् इक जुआने दा सहारा लई करी जुआनां देयां मोर्चेयां पर जाई करी तिन्हां जो साबासी दिंदे रैह् थे। मुसीबता दिया घड़िया होंसला रक्खणे दी अहमियता दा तिन्हां जो इल्म था।  तिस वक्त  गोळा आई करी असां दी इक एमएमजी पोस्टा गास फट्टेया था। जुआन जख्मी होई गिया था कनै एमएमजी चुप्प होई गई थी। मेजर होशियार सिंह होरां एमएमजी दी अहमियत जाणदे थे। जख्मी मेजर एमएमजी पोस्टा च कुद्दी गै थे कनै एमएमजी संभाळी लई थी। एमएमजी दुस्मणा पर अग्ग उगळना लगी पई थी।

दुस्मणा दा एह् हमला भी खिंड़री गिया था। सैह् कई ल्हासां छड्डी करी मुड़ी गै थे। जख्मी हालता च होंदे होंयां भी मेजर होशियार सिंह होरां जंग दा मैदान छड्डणे ते नांह् करी दित्ती थी। तिन्हां जो चलणा-फिरना मुसकल होआ दा था। अपणी कंपणी जो अपणियां नजरां च रखणे तांईं सैह् जुआनां दी मदद लई करी इक मकानें दिया छत्ती गास चड्ढी बैठे थे।

18 दिसंबर सन् 1971 दिया भ्यागा दूंहीं मुल्खां दे बिच  'सीज फायर'  होई गिया था।  ब्रिगेड कमांडर, डिव कमांडर कनै कोर कमांडर होरां जंग दी जगह दा जायजा लैणा आए थे।तिन्हां मकाने दिया छत्ती गास चड्ढी करी मेजर होशियार सिंह जो बहादुरी कनै लड़नें तांईं सावासी दित्ती थी।  तिन्हां मेजर होरां जो गलाया था कि भई  जंग तां खत्म होई गई थी सैह् ताह्ली मोर्चा छड्डी करी पिच्छें जाई नै अपणा इलाज करुआई सकदे थे।

मेजर होशियार सिंह एह् साबत करी दित्ता था कि इक देस परेमी अपणे देस दी खातर कुसी भी हद तिकर जाई सकदा है। तिन्हां जो जींदे जी बहादुरी दा सब्भते बड्डा इनाम 'परमवीर चक्र' दित्तेया गिया था।

इसते परंत मेजर होशियार सिंह दो सालां तांईं  'इंडियन मिलिट्री अकादमी' च उस्ताद बणी करी रैह् थे।  कर्नल बणी करी तिन्हां अपणी बटालियन 3 ग्रेनेडियर्स जो कमांड कित्ता था।   कर्नल होशियार सिंह मई सन 1988 जो फौज ते रटैर होई गै थे।

6 दिसंबर सन् 1998 जो महज 62 सालां दिया उमरा च एह् महाजोधा मौता कन्ने अपणी जंग हारी गिया था।

― भगत राम मंडोत्रा

(References― Paramvir Chakra citation of Major Hoshiyar Singh and the interview of Brigadier Hoshiyar Singh available on YouTube.)