12. लांस नायक अल्बर्ट एक्का

लांस नायक अल्बर्ट एक्का

(3 दिसंबर 1971)

गलाणे जो तां भारत देस बिच फौजियां दा बड़ा मान होंदा है खास करी नें सहीदां दा कनै तिन्हां दे परुआरां दा। पर पता नीं सैह् क्या बजह थी कि अपणे ही देसे च इक सहीद दी कब्र दे दरसण करने तांईं तिन्हां दिया घरेवाळिया जो 45 साल दी लम्मी निहाळ करनी पई गई थी। सैह् सहीद इक खास सहीद थे—इक परमवीर चक्र जितणे वाळे सहीद।

दिन सुआर (सोमबार) था, तारीख 11 जनवरी सन् 2016 थी। जगह भारत दे इक सूबे त्रिपुरा दी राजधानी अगरतला दे बाहरले इलाके बिच धूली नांएं दा इक ग्रां था। इक परमवीर चक्र  विजेता दी घरेवाळी कनै परुआर कब्रिस्तान ते सहीद परमवीर दी कब्रा दी 'पवित्र मिट्टी' लैणा आयो थे। सैह् सहीद परमवीर इक क्रिस्चियन थे।  कब्र दी पवितर चिक चुणदिया बेला सहीद परमवीर दिया उम्रदराज घरेवाळिया दा चेहरा सुन्नमसुन्ना कनै हाखीं डबडबाइयां थियां। पता नीं 45 साल परंत अपणे घरेवाळे कन्नै मिलणे दी खुसी थी कि बिछड़णे दा गम।  जाह्लू श्रीमती बलमड़ीना एक्का अपणे पति जो सरधांजली दित्ती थी ताहलू तित्थू असम राइफल्स देयां जुआनां परमवीर चक्र जित्तू लांस नायक अल्बर्ट एक्का जो गन सलूट भी दित्तेया था।

श्रीमती बलमड़ीना एक्का नै बांग्लादेश सरकारा दिया दरियादिलिया दिया बजह ते बांग्लादेश च पोणे वाली सैह् जगह तां अपणियां हाखीं कन्नै पहलें ही दिक्खी लइयो थी जित्थू लांस नायक अल्बर्ट एक्का होरां 3 दिसंबर सन् 1971 जो लड़दे-लड़दे सहीद होए थे। पर तिन्हां दी समाध भारत च थी जिसा तिकर पोंह्चणे तांईं श्रीमती एक्का जो देर लगी गई थी।

अक्तूबर सन् 2012 बिच श्रीमती एक्का बांग्लादेश सरकार दे सादे पर ढाका गै थे जित्थू तिन्हां जो प्रधानमंत्री शेख हसीना होरां 'फ्रेंड्स ऑफ बांग्लादेश' सन्मान दित्तेया था।  तिस वक्त एह् सन्मान  लैणे तंइएं बांग्लादेश सरकारा दे सादे पर कर्नल अशोक कुमार तारा (रटैर) भी ढाका गैयो थे। तिन्न दिसंबर सन् 1971  दियां तिहास रचणे वाळियां तिन्हां  घड़ियां च  लांस नायक अल्बर्ट एक्का होरां कन्नै मेजर (बाद च कर्नल) अशोक कुमार तारा भी थे।  तिन्हां जो भारत सरकारें बहादरी तांईं 'वीर चक्र' कन्नै नवाजेया था।  कर्नल अशोक कुमार तारा होरां बांग्लादेश पीएमओ ते गंगा सागर तिकर जाणे दी इजाजत मंगी थी। 21 अक्तूबर सन् 2012 दे दिन कर्नल तारा, तिन्हां दे घरेवाळी कनै श्रीमती बलमड़ीना एक्का अपणे पुत्र विनसेंट सोगी तित्थू गै थे।  तिन्हां कन्नै बांग्लादेश दी फौज दे लेफ्टिनेंट कर्नल सज्जाद ए जहीर कनै नौजुआन सिविलियन‌ गाइड ज़यान फिदा नूर भी थे। तिन्हां तित्थू अपणे परमवीर पति तंइएं प्रार्थना कित्ती थी।  

श्रीमती बलमड़ीना एक्का इक सिद्धी-सादी जणास थे। सैह् 89 साल दी लम्मी जिंदगी जी नै 16 अप्रैल सन् 2021 सुरगवास होई गै थे।

15 अगस्त 1947 जो अंग्रेजां ते अजादी मिलणे ते परंत देस भारत कनै पाकिस्तान च बंड़ोई गिया था।  पाकिस्तान दो हेस्सेयां च था — पूर्वी पाकिस्तान कनै पच्छमी पाकिस्तान।  सन् 1971 च पूर्वी पाकिस्तान बांग्लादेश बणी गिया था कनै पच्छमी पाकिस्तान हुणकणा पाकिस्तान है।  

बोलणे तांईं पूर्वी पाकिस्तान कनै पच्छमी पाकिस्तान इको ही देस थे पर दूंही च फरक बड़ा था। दूंहीं हेस्सयां दे लोकां दे कद-काठी, रैह्ण-सैह्ण, खाण-पीण कनै रीत-रुआजां च जमीन-असमाण दा फरक था।  पच्छमी पाकिस्तानी अपणे आपे जो पूर्वी पाकिस्तानियां ते बेहतर समझदे थे।  सत्ता दी बागड़ोर पच्छमी पाकिस्तानियां दे हत्थें थी।  पूर्वी पाकिस्तानी दूजे दर्जे दे सहरी मन्नै जांदे थे।

पूर्वी पाकिस्तानी हर मामले च पच्छमी पाकिस्तानियां नै बरोबरी दा हक चांहदे थे।  तिन्हां च तिस भेदभाव दे खलाफ इक बुआळ था।  सैह्  बुआल दिसम्बर सन् 1970 च बद्धी गिया जाह्लू पूर्वी पाकिस्तान दे शेख मुजीबुर रहमान दी अवामी लीग पार्टी कौमी चुनावां च बहुमत पाई गई पर पच्छमी पाकिस्तान दी पाकिस्तान  पीपुल्स पार्टी सत्ता देणे ते मुकरी गई थी।  बंगालियां कनै बिहारियां च टेन्सन इतणा बद्धी गिया था कि सैह् इक दूजे गास हमले करना लगी पै थे।  उर्दू बोलणे वाले लोक  जेह्ड़े  भारत ते पूर्वी पाकिस्तान जो गै थे तिन्हां जो  तित्थू 'बिहारी' करी नै बुलाया जांदा है।  एह् बिहारी पच्छमी पाकिस्तान दी तरफदारी करने वाळे मन्नै जांदे थे।

मार्च सन् 1971 च बंगालियां-बिहारियां दे बिच होणे दंगे फसादां दे बहानें पाकिस्तानी फौजें बंगालियां जो दबाणा सुरू करी दित्ता था। खून खराबा होणा लग्गा था।  तिस खून खराबे च  तकरीबन तिन्न लक्ख लोकां दी जान गई थी।  लक्खां दिया गिणतिया च जनानियां कन्नै जबरदस्ती होई थी। तिस  बिच बहोत सारे रफ्यूजी भारत च आई गै थे।  जिन्हां दा ज्यादा देर तिकर खर्च उठाणा भारत दे वसे ते बाहर था।  तिस बजह ते भारत दियां फौजां जो सन् 1971 दे दिसम्बर महीने दे सुरू च पूर्वी पाकिस्तान च दखल देणा पई गिया था।

भारत दा सूबा त्रिपुरा तिन्नां पासेयां ते पूर्वी पाकिस्तान कन्नै घिरेया था। पूर्वी पाकिस्तान दे गंगासागर कॉम्प्लेक्स च पाकिस्तानी फौज दी मजबूत किलेबंदी थी।  तित्थू ते त्रिपुरा दी राजधानी अगरतला महज साढ़े छे किलोमीटर दूर पोंदी है। तिस पासें भारत दिया फौजा दा मकसद त्रिपुरा जो भारत ते कटोणे ते बचाणा कनै पाकिस्तान दे अखौरा पर कब्जा करना था।  अखौरा पर कब्जा करी नै पूर्वी पाकिस्तान दी राजधानी ढाका जो घेरनें तंइएं असानी होणी थी। भारत दिया फौजा जो  गंगासागर कॉम्प्लेक्स ते पाकिस्तानियां दा सफाया कित्ते बगैर अखौरा पर अपणा कब्जा करना मुमकिन नीं था।

गंगासागर  अखौरा ते दक्खणे पासें  तकरीबन 4 किलो मीटर दूर पोंदा है। गंगासागर पर अपणा कब्जा होणे ते भारत दिया फौजा दा  ब्रह्मानबाड़िया—कोमिल्ला रोड पर कंट्रोल होई जाणा था।  तिसते पाकिस्तानियां पर भारत दी फौजें हावी होई जाणा था।

गंगासागर कॉम्प्लेक्स च गंगासागर रेलवे टेसन, मोगरा, गंगासागर, गोल गंगेल कनै ट्रायंगल एरिया सामल थे। तित्थू पाकिस्तानी फौज दी नफरी दी सही खबर नीं थी मिलिट्री इंटेलीजेंस दे मुताबक गंगासागर कॉम्पलेक्स च तिन्हां दी सिर्फ इक कंपणी थी। मुक्ति वाहिनी दे मुताबक तित्थू इक बटालियन दी नफरी थी। पर असल बिच तित्थू मजबूत किलेबंदी दे अंदर पाकिस्तान दी 12 फ्रंटियर फ़ोर्स दियां तिन्न  कंपणियां, 12 अजाद कश्मीर दी इक कंपणी कनै रजाकारां दी इक कंपणी  थी।

दुस्मण दी मेन मोर्चेबंदी रेलवे टेसन दे चोंह् पासें उच्चियां ठाहरीं गास थी।  तिन्हां अक्खे-बक्खे दा दलदली कनै बाकी बचेह्या इलाका एन्टी टैंक कनै एन्टी पर्सनल सुंरगां नै खरा कि भरी छड्डेया था। मेन मोर्चेबंदिया दे चोंह् पासें कांटेदार तारां दी घणी बाड़ बिच्छियो थी।  पाकिस्तानियां अपणा टैम लगाई नै गंगासागर दी मोर्चेबंदी इक मजबूत किले सांहीं कित्तियो थी।  गंगासागर ते दुस्मणा जो टाह्णा कोई असान कम्म नीं था।

लांस नायक अल्बर्ट एक्का होरां दा जन्म अज्जकणे झारखंड दे गुमला जिले दे जरी ग्रांएं बिच जूलियस.  एक्का कनै मरियम एक्का दे घरें 27 दिसंबर सन् 1942 जो होया था।  सैह् ओरान आदिवासी ट्राइबल ईसाई परुआर था।  गलांदे कि अल्बर्ट एक्का अपणे वचपण ते ही सिकार करने दे सोकीन थे।  सैह् सिकारे जो तोपणे कनै तिस पर नजर रखणे च बड़े माहिर थे।  सैह् तीर कमाण चलाणे च भी बड़े चतर थे।  अल्बर्ट एक्का कुदरती तौर पर इक बद्धिया खिलाड़ी थे। सैह् हॉकी खरी खेलदे थे।  तिन्हां जो सैह् कम्म पसंद थे जिन्हां जो करने तांईं होंसले दी जरूरत होंदी थी कनै जोखम उठाणा पोंदा था।  कुस जो पता था तिन्हां दा एह् हुनर जंग दे मदान च कम्म ओणे वाळा था कनै तिन्हां जो अमर करी देणे वाळा था।

20 सालां दिया उमरा बिच अल्बर्ट एक्का होरां सन् 1962 च बिहार रेजिमेंट च भरती होई गै थे।  सन् 1968 च सैह् बिहार रेजिमेंट ते 14 गार्डस च बदलिया च चली गै थे।  दरअसल 14 गार्डस 13 जनवरी सन् 1968 जो 32 गार्डस दे नांएं ते देस दे उत्तर-पूर्व च बगावत करने वाळेयां नै लड़ने तांईं खड़ी कित्ती गई थी। बाद च अप्रैल सन् 1971 च इसा बटालियना जो 14 गार्डस दा नां देई करी इक इन्फेंट्री यूनिट बणाया गिया था।

ऑपरेशनल प्लान दे मुताबक 14 गार्ड्स जो 3 दिसंबर सन् 1971 जो गंगा सागर कॉम्प्लेक्स पर कब्जा करना था।  14 गार्ड्स दे जुआन 2 / 3 दिसंबर दिया राती पंज घंटे उब्बड़-खब्बड़ धरती पर पैदल चली करी गंगासागर दे दक्खणे पासे तिकर आई गै थे। तिन्हां जो एह् दिक्खणे च आया था कि पाकिस्तान दे फौजी रेल लैणी कन्नै-कन्नै नधड़क होई नै ओआ-जाह्दे दे थे जिसदा मतलव था कि पाकिस्तानियां रेल लैणी दे अक्खें-बक्खें सुंरगां नीं थियां बछाइयां।

3 दिसंबर दे तड़कें 4 बजे गार्ड्स दा हमला सुरू होई गिया था।  अल्फा कनै ब्रेबो कंपणियां जो गंगासागर रेलवे टेसन पर कब्जा करना था कनै चार्ली कनै डेल्टा कंपणियां जो मोगरा, गंगासागर, गोल गंगेल कनै ट्रायंगल एरिया जो अपणे कब्जे च लैणा था।  अल्फा कनै ब्रेबो कंपणियां रेल लैणी कन्नै-कन्नै रेलवे टेसने पासें अग्गें बद्धियां थियां।  जाह्लू गार्ड्स दुस्मण देयां मोर्चेयां ते 100 गज दूर थे तिन्हां गास दुस्मण दा घणा ऑटोमैटिक फैर ओणा लगी पिया था।  जेकर सैह रेल लैणी कन्नै ही रैंह्दे जां पिच्छें हटदे तां तिन्हां दा बड़ा भारी जानीं नुकसान होई जाणा था।  पर बहादर गार्डां जो तां कुसी भी कीमता पर अपणा टास्क पूरा करना ही था।  वक्त दी नजाकत समझी करी तिन्हां तिसा घड़िया पाकिस्तानी मोर्चेयां पर जाई कुद्दणे दा फैसला करी लिया था।   सुरगां कन्नै कंडेयां वाळियां तारां दिया बजह ते कई जानीं गइयां थियां कनै मते सारे जुआन जख्मी हो गै थे।  सलामत बचेह्यो जुआन आमणे-सामणे हत्थापाई दी लड़ाई च सामल होई गै थे।

लांस नायक अल्बर्ट एक्का होरां भी इक फॉरवर्ड कंपणिया च सामल थे।  तिसा मुस्कल घड़िया तिन्हां अग्गें आई करी अपणा नां अपणी रेजिमेंट कनै देस दे इतिहास च सूनें दे हरफां च दर्ज कराई दित्ता था।  दुस्मण तारां देयां बाडां अंदर कंक्रीट दे बणेयां बंकरां च छुपी करी नै बार करा दे थे।  तिन्हां ते पार पाणे दा इक ही तरीका था—छींडेयां च ग्रनेड भसकाई करी संगीनां कन्नै तिन्हां जो बिन्हीं करी मुकाणा।  इक खास जगह पर लगाइयो पाकिस्तानी लाइट मसीन गन (एलएमजी) कंपणी जो अग्गें बद्धणे ते रोका दी थी।लांस नायक अल्बर्ट एक्का होरां तिसा लाइट मसीन गना जो चुप कराणे दी जरुरत महसूस कित्ती थी कनै सैह् फुर्तिया नै दुस्मण दे बंकरे च जाई कुद्दे थे।  तिन्हां जो पेटे च गोळियां लगी गइयां थियां पर तिन्हां हमला जारी रक्खेया था। तिन्हां अपणे बैनट कन्नै दूंहीं पाकिस्तानियां जो मारी ता था कनै एलएमजी अपणे कब्जे च करी लई थी।

बुरे हालें जख्मी लांस नायक अल्बर्ट एक्का होरां पिच्छें हटणे जो नांह् करी दित्ती थी।  तिन्हां हमला जारी रक्खेया था।  कंपणी दा एडवांस इक बरी फिरी रुकी गिया था।  इसा बारिया रेलवे टेसन दे सिगनल टावरे पर लग्गियो दुस्मण दी मिडियम मसीन गन बहादुर गार्डां गास कारगर फैर करी नै कहर ढाह् दी थी।  लांस नायक अल्बर्ट एक्का टावर दिया कंधा दे सहारे उप्पर चढ़ी गै थे। तिन्हां इक्की छींड़े च गर्नेड पाया कनै अंदर जाई करी  गनरां जो बैनट मारी करी एमएमजी जो खमोस करी दित्ता था।  तिन्हां अपणी कंपणी जो अपणा टास्क पूरा करनें तांईं रस्ता बणाई दित्तेह्या था।  पर तिन्हां दे जख्म तिन्हां देयां प्राणा पर भारी पै थे।  सैह् जुद्ध भूमि च सहीद होई गै थे।  गंगासागर कॉम्प्लेक्स पर भारत दा कब्जा 3 दिसंबर सन् 1971 जो भ्यागा 10 बजे तिकर   होई गिया था।  लांस नायक अल्बर्ट एक्का होरां जो बहादरी दा सब्भते बड्डा इनाम 'परमवीर चक्र' दित्ता गिया था।  इसा लड़ाइया च  14 गार्ड्स दे 10 जुआन कनै 3 जेसीओ सहीद जबकि 55 जुआन जख्मी होए थे।

―भगत राम मंडोत्रा

(References― The Paramvir Chakra citation of Lance Naik Albert Ekka; Scholar Warrior Spring 2016-Lance Naik Albert Ekka, PVC (Pages 125-132) by V Ganapathy and the article 'Balamdina Ekka, wife of 1971 war hero Albert Ekka, dies in Jharkhand'  by Amrita Nayak Dutta published in The Print  dated 17.04.2021.)