7. मेजर धन सिंह थापा

 

मेजर धन सिंह थापा

(20 अक्तूबर 1962)

1962 दी भारत-चीन जंग जो लड़णे तांईं भारत दिया फ़ौजा व्ह्ली अणथोहे होंसले ते इलावा होर किछ भी नीं था।  तदकणिया सरकारा दी ढुळमुळ पोळसी, दूरा तिकर सोचणे दी घाट कनै जनरैलां दी तैनाती फ़ौजी काबिलियत दे हसावें नीं होई करी पोलिटिकल पैमाने पर होणी — एहो जेहे किछ मसले थे जेह्ड़े तिसा लड़ाइया च भारत दी करारी हार दी वजह बणे थे।

भारत-चीन सरहद दा मसला म्हेसा ते अग्गी सांही बळ्दा रिहा जिस च समें-समें पर फौजियां दे प्राणा दियां औह्तां पोंदियां रहियां। सरहद दे बन्नें गांह-गांह खसकाणे दी चीनी हरकत जो दिक्खी करी भारत सरकारें सन् 1961 दे नवम्वर-दसम्बर महीनें  इक 'फॉरवर्ड पॉलिसी' बणाई थी।  तिसा पॉळसिया दे तहत चीन जो रोकणे दे मकसदे कन्नै भारत दिया फौजा जो, जितणा होई सके, अग्गें जाई करी पट्रोलिंग सुरू करनी थी कनै अपणियां चौकियां बणाणियां थियां। 

लद्दाख च तिब्बत दे पासे ते चीनियां जो अग्गें बद्धणे दे मुमकिन रस्तेयां जो  रोकणा  इसा  पॉळसिया दा इक खास मकसद था।  तिब्बत दे 'खुरनाक फोर्ट' बिच चीनी फौज दा इक बड्डा बेस था। तिस पासे ते लद्दाख दे थाकुंग कनै चुशुल च ओणे तांईं  पेंगोंग झील दे उत्तरी कनारे नेड़ें इक रस्ता ओंदा था।  'खुरनाक फोर्ट' दे पच्छमे पासें पेंगोंग झील दे उत्तरी कनारे पर 'सिरीजाप' नां दी इक जगह पोंदी है। तिसा जगह ते चीनियां दे ओणे दे रस्ते पर नज़र रक्खी जाई सकदी थी।  असां दे मुल्खें 'सिरीजाप' बिच चौकियां बणाणे दा फैसला लिया था।

पेंगोंग झील दे उत्तरी कनारे पासें 'चांग चेंमो' नां दे उच्चे पहाड़ खड़ोत्यो हन। इन्हां पहाड़ां ते पेंगोंग झील दे उत्तरी कंह्ड़े बक्खी सिद्धियां धारां लोंह्दियां हन।  म्हारी फौज इन्हां जो 'फिंगरज' करी नै बुलांदी है। एह् कुल मिलाई नै अट्ठ 'फिंगरज' हन। 'सिरीजाप' पोस्ट फिंगर 8 ते अग्गें पूर्व पासें चीन दे 'खुरनाक फोर्ट' बक्खी पोंदी है। म्हारे देसे दा मनणा है कि एल.ए.सी फिंगर 8 ते होई करी गुजरदी है कनै चीनी गलांदे कि एल.ए.सी फिंगर 2 ते होई करी जा जांदी है।  अजकल दून्हीं देसां दी अप्पू च गल-बात दा मामला सिरीजाप-1 पोस्ट ते 15 किलोमीटर पच्छमे वक्खी (भारत पासें) पोंदी फिंगर 4 पर आई नै अटकेया है।

अक्टूबर सन् 1962 तिकर चुशुल हवाई अड्डा बणीं करी तियार होई गिया था। चंडीगढ़ ते तिस इलाके तिकर ज़रूरी साजोसमान पजाणे तांईं चुशूल हवाई अड्डे दी फ्हाजत करना बड़ा जरूरी था। जंग  छिड़ने ते पहलें चुशूल जो लेह कन्नै सड़का नै जोड़ी दित्ता गिया था। हालांकि एह् सड़क मात्र जीप जितणीं चौड़ी ही थी। चुशूल कनै लेह जो बचाणे तांईं भारत जो 'खुरनाक फोर्ट' ते 'थाकुंग' तिकर दे रस्ते जो अपणियां नज़रां च रखणा बड़ा जरूरी था। इस तांईं  असां दिएं फौजे 'सिरीजाप' इलाके च तिन्न चौकियां बणाइयां थियां। सिरीजाप, सिरीजाप-1 कनै सिरीजाप-2 तिन्हां चौकियां दे नां थे। भारत दी फौज तिस इलाके जो 'सिरीजाप कॉम्प्लेक्स' करी बुलांदी थी।

सन् 1962 दे अक्तूबर महीने दे दूजे हप्तें सिरीजाप कॉम्प्लेक्स दियां तिन्हों पोस्टां पर 1/8 गोरखा राइफल्स दी डी कंपनी दे जुआन तैनात करी दित्ते गै थे। म्हारिया फौजा दा बेस पेंगोंग झील दे पूर्वी पासें था। तिन्हां पोस्टां दा फौजी बेस कन्नै कोई जमीनीं जोड़ नीं था।  तिन्हां पोस्टां तिकर जुआनां दा ओण-जाण कनैं साजोसमान दी सप्लाई झील दे पारले पासे ते किस्तियां कन्नै होंदी थी।  

सिरीजाप काम्प्लेक्स दे उत्तर कनै पूर्व, दोन्हीं पासें, चीनी फौज दियां इक-इक पोस्टां थियां। सैह् दोयो पोस्टां खुरनाक फोर्ट 'च चीनी हैडकुआटर कन्नै सड़का दे जरिए जुडियां थियां।  एल.ए.सी पर  दोन्हीं देसां दियां फौजां बिच तणोतणी दा महौळ था।  चीनी फौज यनि के पी.एल.ए बुआळ खाह् दी थी। कुसी भी टैमे किछ भी होई सकदा था।

सिरीजाप-1 पोस्ट इक पहाड़िया पर थी जित्थू ते पेंगोंग झील नज़र ओंदी थी। तिसा पोस्टा बिच गोरखा कम्पणी दे तकरीबन 28 जुआन कनै इक जेसीओ कंपनी कमांडर मेजर धन सिंह थापा दिया कमाणा हेठ तैनात थे।

मेजर धन सिंह थापा होरां दा जन्म 28 अप्रैल सन् 1928 जो शिमला, हिमाचल प्रदेश 'च होया था। सैह् 28 अगस्त सन् 1949  जो 8 गोरखा राइफल्स 'च अफसर बणी करी सामल होए थे। थापा होरां बड़े सांत सभाओ दे अफसर थे।  तिन्हां जो अपणे परुआर कनै मतैह्त जुआनां कन्नै बड़ा पियार था। सैह् फुटबाल दे बद्धिया खलाड़ी थे।

मेजर धन सिंह थापा होरां दी बेटी हाल ही च गुजरी गइयो थी।  अपणी औलाद खोणे ते बाद दुक्खी गर्भवती घरेवाळिया जो दम-दलासा देणे तांईं थापा होरां जो किछ दिनां दी छुट्टी मंजूर होइयो थी। तिन्हां दिया जगह सिरीजाप-1 चौकी दी कमाण संभाळने वाला अफसर भी लेह पोंह्ची चुकेह्या था। पोस्ट छड़णे दे आर्डर मिलणे दे  बाबजूद मेजर थापा तिस अफसरे दे सिरीजाप-1 पोस्ट तिकर ओणे जो निहाळा दे थे। सैह् अपणी कम्पणी जो कमांडरे बगैर नीं छड़णा चांहदे थे।

तिस वक़्त भारत सरकार चीन दे पासे ते बेफिकर थी। सोच एह् थी कि चीनी फौज हमला करने वाळी नीं थी। इसा गलतफहमिया दी बजह गलवान नदी दिया घाटिया बिच म्हारिया फौजा दी इक निक्की जेही पोस्ट थी जिसा जो चीनियां कई महीनेंयां ते घेरी रक्खेया था पर हमला नीं करा दे थे।  मेजर धन सिंह थापा जो चीनी फ़ौज दे तजे-नजे भले नीं लग्गा दे थे। तिन्हां जो सिरीजाप कॉम्प्लेक्स पर चीनी हमले दे असार साफ नज़र ओआ दे थे।

19 अक्टूबर सन् 1962 दे धिआडें जाह्लू चीन दे पासें हलचल बद्धी गई तां मेजर थापा पहले ते होर चक्कने होई गै थे। तिन्हां अपणेयां जुआनां जो अपणे-अपणे मोर्चे  होर डुग्घे खुणनें दा हुक्म दित्ता था।  मेजर थापा सोगी तिन्हां दे जुआन तियार थे। मेजर थापा होरां दा अनुमान सही था। 20 अक्टूबर दिया भ्यागा तकरीबन 6 बजे चीनियां सिरीजाप कॉम्प्लेक्स पर हमला करी दित्ता था। सिरीजाप-1 पर चीनी तोपां कनै मोर्टारां दा बड़ा भारी फैर लगी पिया था ओणा।  ढाई घण्टे तिकर चलणे वालिया इसा गोलाबारिया कन्नै हिन्दोस्तानी चौकिया दी मोर्चेबंदी खिंडरी गई थी। रेड़ियो सेट बरबाद होई गिया था। पोस्ट दा अपणी बाकी फौज ते कम्युनिकेशन टुटी गिया था।  'न तां मैं पिच्छे हटणा है नांहीं तां मैं सरेंडर करना है'  अपणे बटालियन हेडकुआटर जो मेजर थापा दा रेडियो पर खीरी स्नेहा था।

तोपखाने कनै मोर्टारां दे फैर दी कवर हेठ चीनी फौज सिरीजाप-1 जो घेरदी होई पोस्ट ते तकरीबन 150 गज तिकर आई गइयो थी।  चीनी फौज दिया गोळाबारिया ते सिर्फ पोस्ट दिया मोर्चेबंदिया जो ही नुकसान नीं पुज्जेया था बल्कि मते सारे जुआन जख्मी होई गै थे कनै कई शहीद हाई गै थे।

जाह्लू रौळा पांदे कनै चींगदे चीनियां सिरीजाप-1 चौकिया पर धावा बोलेया था ताह्लू असां देयां जुआनां बड़े जोसे कन्नै हमले दा जवाब दित्तेया था। होर तां होर असां दे जख्मी जुआनां भी हमले जो रोकणे तांईं अपणे पासे ते कोई कसर नीं छड्डी थी। तिन्हां बिच इक सेक्सन कमांडर नायक कृष्ण बहादुर थापा भी थे। तिन्हां दी जंघ गोळे दी छींगड़ लगणे ते जख्मी होई गइयो थी पर तिन्हां इक सहीद जुआने दी लाइट मशीन गन संभाळी करी अग्गें बद्धदे दुस्मणा गास खूब कहर ढाया था।

मेजर थापा होरां अपणी मोर्चेबन्दी सुधारी करी बड़े हौसले कन्नै चीनियां दा मुकाबला कित्तेया था। सैह् गोळियां दिया झड़िया बीच इक मोर्चे ते दूजे मोर्चे तिकर जाई करी जुआनां दी हिम्मत बद्धांदे रैह् थे। 'जेकर असां जो मरना पिया तां असां सारेयां कट्ठे ही मरना है पर असां किछ जो मारी करी मरना है। डरपोक कहाणे ते मरेयो भले', तिन्हां  अपणेयां जुआनां जो दस्सेया था। भारत दे सूरमे जी जान लगाई करी लड़े थे। मते सारे चीनी मारे गै थे। चौकिया ते सो गज दूरा ते चीनियां जो वापस जाणा पिया था।

चीनियां फिरी तोपखाने कनै मोर्टारां दे गोळे दागणा सुरू करी दित्ते थे।  तिसा बारिया पहले ते जादा। तिसा गोळाबारिया दी कवर लई करी चीनी रगडोंदे-रगडोंदे सिरीजाप-1 पोस्ट ते तकरीबन 50 गज नेडें आई  गै थे। चीनियां असां दिया चौकिया कनै जुआनां जो जलाणे तांईं अग्ग लगाणे वाळे बम्ब सट्टे थे।  गोरखेयां अपणा जवाब हत्थ गोलेयां कनै छोटे हथियारां कन्नै दित्तेया था। असां दियां .303 रैफळां कनै लाइट मसीन गनां चीनी हथियारां दे मकावलें किछ भी नीं थियां।  चीनी तिसा बारिया हैवी मशीन गन कनै बज़ूका लई करी आयो थे। तिन्हां सोगी पेंगोंग झील च चार गन बोटां भी थियां।

पोस्ट दे उप-कमाण अफसर सूबेदार मिन बहादुर गुरंग होरां गास तिन्हां दा बंकर ढई गिया था।  जख्मी कनै लोहूलुहान सूबेदार साहब अपणे हत्थां च अपणी एलएमजी पकड़ेयो  मलवे ते बाहर निकळी करी जींदे दम तिकर दुस्मणा पर फैर करदे रैह् थे।

गोरखेयां दी गिणती घटदी जाह्दी थी। चीनी नेडें ओंदे जाह्दे थे। जींदे गोरखे 9 ते भी घट बचेयो थे। मेजर थापा डटेयो थे।

पेंगोंग झील दे दक्खनी कंह्ड़े पर थाकुंग दी निगरानी चौकी ही इक देही ठाहर थी जित्थू ते सिरीजाप-1 पोस्ट नज़र ओंदी थी।  तिसा जगह पत्तण था जित्थू ते पेंगोंग झील बिच किस्तियां चलदियां थियां। तिन्हां किस्तियां कन्नै पेंगोंग झील दे उत्तरी कंह्ड़े पर बणियां पोस्टां जो रसद जांदी थी। तेह्ड़ी तित्थू ते देहा सुज्झा था जिंञा सिरीजाप-1 पोस्ट बिच अग्ग लग्गियो होए। 

पोस्ट दा बटालियन हेड़कुआटर कन्नै कोई राब्ता तां था ही नीं।  तित्थू क्या घटा दा था एह् जाणनें तांईं दो स्टॉर्म बोटां बिच इक टुकड़ी भेजी गई।  नायक रबिलाल थापा तिसा टुकड़िया दे कमांडर थे।  जिंञा ही सैह् किस्तियां सिरीजाप-1 पोस्ट ते तकरीबन 1000 गज नेडें आइयां तिन्हां पर चीनियां तिन्ना पासेयां ते फैर खोली दित्ता था।  इक किस्ती जुआना समेत झीला च डुबी गई थी।  नायक रबिलाल थापा वाळी किस्ती वाळ-वाळ बची नै सही सलामत बापस गई थी।  नायक थापें जाई नै रपोट दित्ती थी कि सिरीजाप पोस्ट च अग्ग लगियो थी कनै धूं निकळा दा था। पोस्टा पर चीनियां दा कब्जा होई गिया था।  कम्पनी कमांडर मेजर धन सिंह थापा समेत सारे जुआन सहीद होई गैयो थे। 

पर हकीकत एह् थी कि तिसा घड़िया सिरीजाप-1 पोस्ट भारत दे कब्जे थी कनै मेजर धन सिंह थापा सोगी किछ गोरखे अतिह्यें तिसा जो बचाणे तांईं लड़ा दे थे। तिस वक्त तिकर मुट्ठी भर गोरखे चीनियां जो दो बरी पिच्छें धकेली चुक्केह्यो थे।  चीनियां दा बेथाह जानी नुकसान होई चुक्केह्या था। 

तीजी बरी चीनी हलके टैंक लई  चड्ढी आए थे, जिन्हां दा गोरखेयां व्ह्ली कोई जवाब नीं था। पोस्ट धूं कनै मांजण (राख) कन्नै ढकोई गइयो थी।  गोळियां मुक्की थियां गइयां। खीर च मेजर थापा सोगी तिन्न गोरखे अपणियां-अपणियां खुखरियां लई चीनियां गास टुट्टी पै थे।  मेजर थापा दे चेहरे पर इक चीनी फौजियें रैफळ दा वट देई मारेया था जिसते थापा होरां दे दो दंद भजी गै थे।  तिन्हां जो कई चीनियां कस्सी करी पकड़ी नै काबू करी लिया था।  पोस्ट असां दे हत्थां ते निकळी गई थी। चीनी मेजर थापा जो जंगी कैदी बणाई करी सिंजियांग लई गै थे।

नायक रबिलाल थापा दी रपोट दे मुताबिक मेजर धन सिंह थापा होरां जो सहीद होया मन्नी लिया गिया था। तिन्हां जो भारत सरकारें मरणेपरंत परमवीर चक्र दित्ता था।

भारत दी फौज दे भेत न देणे पर चीनियां मेजर थापा पर बड़े जुल्म ढाए थे। तिन्हां गास चीनी इलाके च कब्जा करने कनै चीनी फौजियां जो मारने दा इलजाम था।

मेजर थापा दे परुआर वाले  तिन्हां दे सहीद होणे दी खबर सुणी नै दुक्खी थे। तिन्हां दी घरेवाळी, जिन्हां दा नां श्रीमती शुक्ला था, इक विधमा दा जीण जींणां लगी पै थे।

मई सन् 1963 बिच चीन दी सरकारें भारत दिया सरकारा जो जंगी कैदियां दी इक लिस्ट भेजी थी जिस 'च मेजर धन सिंह थापा दा नां भी था। मेजर थापा दे जिंदा होणे दी खबर सारे देसे 'च फैली गई थी।  तिन्हां दे परुआरे 'च  खुसियां दी लहर छाई गई थी।  मेजर थापा चीन ते छुटी करी मई  सन् 1963 'च दिल्ली आई गै थे। जिन्दा वापस ओणें पर मेजर थापा दे परमवीर चक्र दी साईटेसन 'च सुधार कित्ता गिया था।

जाह्लू मेजर थापा अपणे घरें पूज्जे तां धर्म देयां रीत-रुआजां दे मुताबक मुंडन करी नै तिन्हां दा नौंआं जन्म मनाया गिया था। श्रीमती शुक्ला थापा कन्नै तिन्हां दा व्याह दोबारा होया था। 

मेजर धन सिंह थापा फौज ते लेफ्टिनेंट कर्नल दे रैंक ते रटैर होए थे।  रटैर होणे  ते पहलें तिन्हां इक इन्फेंट्री टी.ए. बटालियन दी कमाण भी संभाळी थी।

सन् 2005 दी 26 जनवरी दी परेड़़ तिन्हां दी खीरी परेड़ थी। तिसते परंत लेफ्टिनेंट कर्नल धन सिंह थापा होरां 5 सितम्बर 2005 जो 77 साल दी उमरा 'च सुरगवास होई गै थे।

—भगत राम मंडोत्रा

(References―'The Brave' by Rachna Bisht Rawat, 'Our Heros In Battle' by Major General Ian Cardozo, 'Swarajyamag.com' June 7, 2020  by Prakhar Gupta and Paramvir Chakra citation of Major Dhan Singh Thapa.)

(लेफ्टिनेंट कर्नल धन सिंह थापा, परमवीर चक्र के साथ लेखक एक पार्टी में)

भगत राम मंडोत्रा