10. सी.क्यू.एम.एच. अब्दुल हमीद

कम्पनी क्वार्टर मास्टर हवलदार अब्दुल हमीद

(10 सितम्बर 1965)

भारत कनै पाकिस्ताने दे बिच होयो सन् 1965 दी जंग दे दौरान 'असल उत्तर' दी लड़ाई घणी घमसाण टैंक लड़ाइयाँ च इक गिणी जाँदी है। इन्फेंट्री कनै तोपखाने दे इलावा इसा लड़ाइया च इक्की बक्खें पाकिस्तान दियाँ पंज पैटन टैंक रेजीमेंटाँ सौगी इक चैफी टैंक रेजीमेंट थी।  दूये पासें भारत दियाँ सिर्फ तिन्न टैंक रेजीमेंटाँ थियाँ। इक रेजीमेंट च सेंचुरियन टैंक थे जेह्ड़े पैटन टैंकाँ दी बरोबरी करी सकदे थे। दूजिया रेजमेंटा व्ह्ली शरमन टैंक थे जेह्ड़े पाकिस्तानी पैटन टैंकाँ नै दो-दो हत्थ करने जोगी नीं थे कनै तीजी रेजिमेंटा सौगी हल्के ए.एम.एक्स-13 टैंक थे जेह्ड़े पैटनाँ अग्गें किच्छ भी नीं थे।

खेमकरण सेक्टर च पाकिस्तान दा ताकतवर फर्स्ट आर्म्ड डिवीजन, जिसजो सैह् तुफान डिव बोलदे थे, भारत दे अंदर पंज किलोमीटर तिकर घुसड़ी आया था। पाकिस्तानी फौज दा मनसूबा हरिके कनै व्यास पुळ पर कब्जा करी नै अमृतसर समेत अद्धे पंजाब जो हथियाई करी जीटी रोड दे रस्ते अम्बाला च होंदे होयाँ, दिल्ली फतेह करने दा था।

खेमकरण भारत दे हत्थाँ ते निकळी गिया था।  पाकिस्तानियाँ जो रोकणे ताँईं भारत दे फौजी कमाँडराँ खेमकरण दे पिच्छें 'असल उत्तर' कनै 'चीमा' नाँ दिया जगहाँ च मोर्चेबन्दी कित्ती थी।  असल उत्तर कनै चीमा दी लड़ाई सन् पैंह्ट च अट्ठ सितम्बर ते दस सितम्बर दे बिच लड़ी गई थी। भारत देयाँ फौजी कमाँडराँ दी अब्बल दर्जे दी रणनीतियें, मोर्चेबन्दियें कनै जुआनाँ दियें अणथोही बहादुरियें अपणा रंग दस्सेया था।  भारत दी फौज लड़ाई खत्म होणे तिकर खेमकरण वापस ताँ नीं लई सकी थी पर भारत देयाँ सूरमेयाँ पाकिस्तानी फौज दी कमर तोड़ी दित्ती थी। पाकिस्तानी तूफान डिव तहस-नहस करी छड्डेया था। दुस्मण दी फौज  होर  अग्गें बद्धणे दे काबल ही नीं रही थी। तिन्हाँ दे तकरीबन सतानूंयें टैंक बरबाद होई गै थे जिन्हाँ च जादातर पैटन टैंक थे।  जित्थू सैह् बरबाद पैटन टैंक कठेरी रक्खे थे तिसा ठाहरी जो अज्ज 'पैटन नगर' दे नाँयें ते जाणेयाँ जाँदा है। 

तिन्हाँ बरबाद सो पैटन टैंकाँ च सैह् सत्त टैंक भी सामल थे जेह्ड़े भारत माँ दे इक दिलेर सपूतें अपणिया आर.सी.एल तोपा कन्नै फाड़ी सट्टे थे।

लड़ाई शुरू होणे ते पहलें 4 ग्रनेडियर पलटण अंबाला च 4 माउंटेन डिवीज़न दा हेस्सा थी। तिन्हाँ व्ह्ली मैदानी इलाके दे बड्डे हथियार नीं थे।  खेमकरण सेक्टर च औंदिया बेला तिन्हाँ जो रस्ते च इक आर्डिनेंस डिपो ते  चार 106 एम.एम. जीप माउंटेड आर.सी.एल तोपाँ मिलियाँ थियाँ। बटालियन दी हर कंपणी दे हेस्सें इक-इक तोप आई थी। एह् तोप टैंकाँ दे ख़िलाफ़ बड़ी कारगर होंदी है।  जे इक बरी इसा दा गोळा टैंके जो लगी जाए ताँ फिरी टैंक नीं बचदा है। गोळा लगदेयाँ ही टैंक अग्ग पकड़ी लैंदा है कनै जळी करी बरबाद होई जाँदा है।  पर इसा तोपा च इक काण भी है। जाह्लू एह् तोप फैर करदी तिस वक़्त अग्ग कनै धूंयें दी इक लपट तकरीबन 45 मीटर तिकर पिच्छे बक्खी जाँदी है। इसा बजह ते एह् टैंकाँ दिया नज़री च पई जाँदी है।  इसा तोपा जो दुस्मण दे टैंकाँ ते छुपाणा कनै बचाणा बड़ा मुस्कल कम्म हौंदा है।  लड़ाइया च इसा तोपा दी औसत उम्र  तिन्न-चार राउंड मातर ही हौंदी है। 

4  ग्रेनेडियर्स दी चार्ली कंपणी दे कंपणी क्वार्टर मास्टर हवलदार अब्दुल हमीद 106 एम.एम. जीप माउंटेड आर.सी.एल तोप दे माहिर तोपची थे। सैह् इस गन दे उस्ताद भी थे। इस गन दे मिलणे दी तिन्हाँ जो बड़ी खुसी होई थी।  अपणी कंपणी दी गन दे सैह् कमाँडर थे।

अब्दुल हमीद होराँ 1 जुलाई 1933 जो उत्तर प्रदेश दे जिला गाजीपुर दे धामूपुर नाँ दे ग्राँयें च सकीना बेगम कनै मोहम्मद उस्मान दे घरें जन्म लिया था। तिन्हाँ दे तिन्न भाऊ कनै दो बैह्णी थियाँ। अब्दुल हमीद दे बापू दर्जी थे।  फौज च भर्ती होणे ते पहलें  सैह् कपड़े सीणे च अपणे बापुये दी मदत करदे थे।  तिन्हाँ दा व्याह चौदह सालां दिया उमरा च रसूलन बीबी कन्नै फौज च भर्ती होणे ते पहलें ही होई गिह्या था।  तिन्हाँ दे बच्चेयाँ च चार मूंडू कनै इक कुड़ी थी।

अब्दुल हमीद 20 साल दे थे जाह्लू सैह वाराणसी आई करी फौज च भर्ती होई गै थे। ग्रेनेडियर्स रेजिमेंटल सेंटर नसीराबाद च अपणी सिखळाई पूरी करी नै सैह् सन् 1955 च 4 ग्रेनेडियर्स च सामल होए थे। तिन्हाँ सन् 1962 दी भारत-चीन जंग अरुणाचल प्रदेश (नेफा) दे थागला  च लड़ी थी।   अरुणाचल प्रदेश ते जाह्लू पलटण अंबालें आई  ताँ तिन्हाँ जो कम्पनी कुआटर मास्टर हवलदार दी जिम्मेदारी दित्ती गई थी।

पाकिस्तानी एडवाँस जो रोकणे ताँईं कित्ती गई भारत दिया मोर्चेबंदिया च 4 ग्रेनेडियर्स पलटण भी सामल थी। एह् पलटण चीमा ग्राँयें दे अक्खें-बक्खें तैनात थी। तिस बग्त खेतराँ च गान्ने कनै कपाह दियाँ उच्चियाँ फसलाँ ल्हारेयाँ मारा दियाँ थियाँ।

  

8 सितम्बर दिया भ्यागा पाकिस्तानी हमला हौणे दे असार नज़र औआ दे थे।  हवलदार अब्दुल हमीद होराँ दी आर.सी.एल गन माउंटड जीप इक गान्ने दे खेत च छुप्पी करी तियार खड़ोतिह्यो थी।  आर.सी.एल गन टुकड़ी दे सारे जुआन चक्कने थे।  खुल्लिह्या जीपा दिया पसेंजर सीटा पर बैठेह्यो अब्दुल हमीद होराँ पाकिस्तानी टैंकाँ जो निहाळा दे थे।  जाह्लू तिन्हाँ जो अग्गें बद्धदे पाकिस्तानी टैंकाँ दी छेड़ सुणोहणा लग्गी, तिन्हाँ अपणे जुआनाँ जो तियार रैह्णे दा इसारा करी दित्ता था। चंद सकिंट बाद  तिन्हाँ दिया दूरबीणा च दुस्मण दे टैंक नज़र औणा लगी पै थे।  तिन्न टैंक थे। इक गांह् कनै दो अक्खें-बक्खें तिसते पचांह्।  अब्दुल हमीद होराँ गाँह्-गाँह् चलदे टैंके जो तकरीबन 30 गज नेड्डे तिकर औणा दित्ता, फिरी तिस पर फैर करी दित्ता था।  गोळा लगदेयाँ ही इक धमाका होया कनै टैंके जो अग्ग लगी गई थी। टैंक बरबाद होई गिया था। हमीद होराँ अपणे डरैवरे जो तुरत जगह बदळणे दा इसारा करी  दित्ता था। तिन्हाँ दे चेहरे गास मुस्काण आई गी कनै तिन्हाँ खुस होई करी अपणेयाँ जुआनाँ जो साबासी दित्ती थी। बाकी बचेह्याँ दूंहीं टैंकाँ जो पाकिस्तानी फ़ौजी छड्डी करी नह्ट्ठी गै थे।  

तकरीबन साढ़े ग्यारह बजे तिन्हाँ गास दुस्मण दे तोपखाने दी गोळाबारी सुरू होई गई कनै तिस बग्त तिन्हाँ जो इक जाणी-पच्छाणी गड़गड़ाहट सुणोह्णा लगी पई थी। दूजा पाकिस्तानी टैंक हमला औआ दा था।हमीद होराँ अपणिया दूरबीना कन्नै दुस्मण दे टैंक अपणे पासें औंदे दिक्खी लै थे।  तिन्हाँ नज़र मारी करी इक बरी फिरी तस्सली करी लई कि तिन्हाँ दी जीप गान्नेयाँ पिच्छें ठीक ढंगे नै छिपिह्यो थी। तिन्हाँ इसा बारिया भी टैंक अपणिया तोपा दिया मारा च औणा दित्ते थे। पहले साँह्ईं तिन्न टैंक थे, इक अग्गें कनै दो पिच्छें।  अपणी गन दे रेंज च औंदेयाँ ही तिन्हाँ अगले टैंके पर फैर करी दित्ता था। धमाका होया कनै टैंक उड़ी गिया था।  पहले साँह्ईं बाकी  बचेयाँ दो टैंकाँ जो पाकिस्तानी छड्डी करी नह्स्सी गै थे। तैह्डी हमीद होराँ दो टैंक तोड़े थे कनै चार टैंक पाकिस्तानी छड्डी गै थे।

बाकी दियाँ आर.सी.एल तोपाँ भी अपणा कम्म करदियाँ रहियाँ थियाँ।  4 ग्रेनेडियर्स गास इक ब्रिगेड लेवल दा टैंक हमला हौआ दा था जिसजो रोकणे ताँईं तिन्हाँ व्ह्ली सिर्फ  चार आर.सी.एल तोपाँ कनै जुआनाँ दे होंसले थे जेह्ड़े शुरुआती जित्ताँ कनै होर बुलंद होई गैह्यो थे। 

फौज़ी इंजीनियराँ जो बटालियन दे साह्मणे वाळे इलाके च सुरगाँ बछाणे  ताँईं बोलेया गिया था। इंजीनियर आए कनै टैम घट होणे दिया बजह ते जिंञा-तिंञा एन्टी पर्सनल कनै एन्टी टैंक सुरगाँ बछाई करी चले गै थे।

अगले दिन भी अब्दुल हमीद होराँ गान्ने दे खेतराँ च छिपी करी नौंएं जोशे कन्नै दुस्मण देयाँ टैंकाँ जो निहागा दे थे।  तिस दिन भी तिन्हाँ पिच्छले दिनें साँह्ईं दो टैंक उड़ाये कनै चार टैंक दुस्मणाँ डरी करी छड्डी दित्ते थे। तैह्डी दुस्मणाँ दे तोपखानें कनै हौआई जहाजाँ भारी गोळाबारी कित्ती थी पर ग्रेनेडियर्स अपणिया जगह डटी रैह् थे।  अब्दुल हमीद दी बहादुरी दे कारनामे जो दिक्खी करी पच्छमी कमाण दे आर्मी कमांडर लेफ्टिनेंट जनरल हरबक्स सिंह होराँ तिन्हाँ दे नाँ दी सफारस परमवीर चक्र ताँईं आर्मी हैडकुआटर जो भेजी दित्ती थी जिस च चार टैंक तोड़ने दा ही ज़िक्र था।

10 सितम्बर दा ध्याड़ा था।  अब्दुल हमीद होराँ होरनाँ दिनाँ साँह्ईं तिस दिन भी अपणी आर.सी.एल तोपा कन्नै तैयार थे।  दुस्मण बड़ी भारी बम्बारी करा दा था।  हर पासें अग्ग बरहा दी थी। तैह्डी भी दुस्मण दे टैंक तिन्न-तिन्न करी नै ओणा लगे थे। हमीद होराँ बड़िया फुर्तिया कन्नै दो टैंक उड़ाई दित्ते थे। जाह्लू तिन्हाँ दुये टैंके पर फैर कित्ता था ताह्लू इक होर दुस्मण दे टैंके दी नज़र तिन्हाँ गास पई गई थी।  अन्धाधुंध गोळाबारिया बिच सैह् अपणी जगह तरंत नीं बदळी सके थे।  तिन्नी टैंके तिन्हाँ पर नसाणा लगाया कनै तिन्हाँ भी तिस टैंके पर सिस्त लगाई दित्ती थी।  टैंके दा गोळा तिन्हाँ जो आई बज्जेया था। इसते पहलें हमीद होराँ भी तिस टैंके गास फैर करी दित्तेह्या था।  अब्दुल हमीद होराँ दा जिस्म चिथड़े-चिथड़े होई गिया था पर तिन्हाँ दा खीरी गोळा बेकार नीं गिया था। सहीद होणे ते पहलें तिन्हाँ तैह्डी त्रिया टैंक भी बरबाद करी दित्तेया था।  तिन्हाँ कुल मिलाई नै  दुस्मण दे सत्त टैंक बरबाद करी दित्ते थे।

तिन्हाँ दा एह् कारनामा अपणे आप च इक नौखा कारनामा था।  कम्पनी क्वार्टर मास्टर हवलदार अब्दुल हमीद होराँ जो मरणेपरंत भारत सरकारें परमवीर चक्र दित्ता था।

असल उत्तर ग्राँ च अब्दुल हमीद होराँ दिया क़ब्रा गास बणिह्यो यादगार अज्ज भी तिन्हाँ दिया अणथोहिया बहादुरिया दी याद दुआँदी है।  तिसा जगहा पर हर साल 10 सितम्बर दे दिन बड्डा मेळा लगदा है।  असल उत्तर च अब्दुल हमीद जो 'पीर बाबा' मन्नेयाँ जाँदा है। हर वीरवार जो तित्थू लोक दर्सन करना औंदे हन्न।

―भगत राम मंडोत्रा