5. कंपनी हवलदार मेजर पीरू सिंह

कंपनी हवलदार मेजर पीरू सिंह

(जम्मू कश्मीर, 18 जुलाई 1948)

15 अगस्त 1947 जो अंग्रेज जांदे-जांदे देसे दियां छोटियां-बड्डियां रियासतां जो एह् छूट देई गै थे कि सैह् भारत जां पाकिस्तान कुसी नै भी मिली सकदे थे या फिरी अजाद रही सकदे थे। कश्मीर रियासत दे महाराजा हरी सिंह होरां इस मामले च अतिह्यें कोई फैसला नीं था कित्तेया। पाकिस्तान हर हाल च कश्मीर जो अपणे पासें मलाणा चांहदा था। पाकिस्तानियां इक सोच्ची-समझी चाल चली थी। तिन्हां कश्मीर जो अपणे पासे ते औणे वाळे रोजमर्रा दे जरूरी समानां दी सप्लाई बंद करी दित्ती थी कनै कबाइलियां जो कश्मीर पर हमला करने तांईं उकसाई दित्ता था। तिन्हां कबाइलियां बिच भेस बदळी करी पाकिस्तानी फौज भी मिलिह्यो थी। जाह्लू महाराजा हरी सिंह दी मुठ्ठी भर फ़ौज पाकिस्तानियां जो रोकी नीं पाई तां तिन्हां 26 अक्टूबर 1947 जो भारत कनै मिलणे दे समझौते पर दस्तखत करी दित्ते थे। 27 अक्टूबर 1947 जो भारत दी फौज जम्मू कश्मीर च दाखल होई गई थी।

सन् 1948 दिया तोंदिया दी रुत थी। टिथवाल सेक्टर च पाकिस्तानी हमलावरां दे जवाबी हमले जोरां पर थे। कृष्णगंगा दे पारले पासे दियां अगलियां चौकियां ते भारत दियां फौजां जो पिच्छें हटणा पिया था।  पिच्छे हट्टी करी भारत दियां फौजां टिथवाल दियां धारां पर अपणा ठकाणा बणाई लिया था।  तिस दौरान 6 राजपुताना राइफल्स जो उड़ी ते टिथवाल जाणे दा हुक्म दित्ता गिया ताकि अग्गें होणे वाळे हमलेयां तांईं 163 इन्फैंट्री ब्रिगेड दी ताकत बद्धाई जाई सके। पकिस्तानियां जो पिच्छें धकेलणे दा कम्म 11 जुलाई 1948 ते सुरू होई करी 15 जुलाई 1948 तिकर ठीक-ठाक चलदा रिहा था।  

फ़ौजा दियां टोह लैणे वाळी टोलियां दियां रपोटां ते पता चलेया था कि 11,481 फुट दिया उचाइया पर  दारा पहाड़ी नांयें दिया इक्की ठाहरी पर पाकिस्तानी हमलावरां दा इक बड़ा मज़बूत ठकाणा था। तित्थू ते पकिस्तानी असां दे 163 इन्फेंट्री ब्रिगड़े दिया जिम्मेदारिया दे सारे इलाके पर अपणी नज़र रखा दे थे। एह् भी पता चलेया था कि दारा पहाड़ी ते थोड़ा कि अग्गें पाकिस्तानियां दा इक होर ठकाणा था। जेकर भारत दियां फौजां जो तिस पासें अग्गें बद्धणा था तां सारेयां ते पहलें दारा पहाड़ी कनै उसदे अगले ठकाणे ते पकिस्तानियां दा सफाया करना लाजमी था।

16 जुलाई 1948 जो दारा पहाड़ी कनै उसते अगले पाकिस्तानी ठकाणे पर कब्जा करने दी ज़िम्मेदारी 6 राजपुताना राइफल्स जो दित्ती गई थी। उस मौकें लेफ्टिनेंट कर्नल एस एस कल्लन 6 राजपुताना राइफल्स दे कमांडिंग अफसर थे। तिन्हा अपणी डेल्टा कम्पनी जो दारा पहाड़ी पर कब्जा करने दा कम्म दित्ता था कनै चार्ली कम्पनी जो उसते अगले ठिकाणे ते दुस्मणा दा सफाया करने दी ज़िम्मेदारी संभाळी थी। चार्ली कंपनी जो अपणा कम्म डेल्टा कंपनी जो दित्तेह्यो कम्मे दे पूरा होणे ते परंत करना था।  कंपनी हवलदार मेजर पीरू सिंह डेल्टा कम्पनी दे सी.एच.एम थे।

कंपनी हवलदार मेजर पीरू सिंह दा जन्म 20 मई 1918 जो राजस्थान दे जिला झुनझुनु दे रामपुरा बेरी नांएं दे ग्रांएं च होया था। सैह् लाल सिंह शेखावत दे जागत थे। तिन्हां दे टब्बरे च सत्त निक्केयाणे थे―तिन्न भाऊ कनै चार बैहणीं। पीरू सिंह सब्भते छोटे पुत्र थे। पीरू सिंह जो सुरू ते ही स्कूल जाणा पसंद नीं था। तिन्हां जो रोक-टोक वाळा महौळ खरा नीं लगदा था। इक दिन सोगी पढ़ने वाळे मूंडुये कन्नै तिन्हां दी घुळाटी होणे पर मास्टरें तिन्हां जो डांट-डपट लगाई तां सैह् स्कूले ते नह्ठी गै थे। फिरी तिन्हां कदी भी स्कूले बक्खी मुँह नीं कित्ता था। तिसते परंत सैह् खेतीबाड़ी दे कम्म च अपणे अम्मा-बापुए दा हत्थ बडांदे  रैह् थे। बड्डे होई नै पीरू सिंह इक छैळ नोजुआन बणे थे। सिकार (तिस पासे दा इक खेल) तिन्हां दा मन पसंद  खेल था। 

पीरू सिंह बचपण ते ही इक फौजी बणने दे सुपने दिक्खदे थे। सैह् 18 साल दे होंदे ही 20 मई 1936 जो झेलम च 10/1 पंजाब च भर्ती होई गै थे।  झेलम च इक साल दी फ़ौजी सिखळाई पूरी करी नै सैह् 5/1 पंजाब च सामल होए थे। देस अजाद होणे ते परंत तिन्हां जो 6 राजपुताना राइफल्स च भेजेया गिया था।  तिन्हां जो स्कूल जाणे ते नफ़रत थी पर फौज च आई करी तिन्हां अपणे प्रमोसन दे मतिहान इक ते बाद इक होरना ते पहलें ही पास करी लैह्यो थे। पीरू सिंह होरां किछ ही सालां च 'इंडियन आर्मी फर्स्ट क्लास सर्टिफिकेट ऑफ़ एजुकेशन' पास करी लिया था। अपणी पढ़ाई दे बलबूते नै पीरू सिंह होरां 7 अगस्त 1940 जो लांस नायक बणे थे। तिस टैमें तिन्हां उत्तर-पच्छम बाडर पर इक लड़ाइया च हेस्सा भी लिया था। मार्च 1941 च तिन्हां जो नायक बणाया गिया था। सितम्बर 1941 ते अक्टूबर 1945 तिकर सैह् पंजाब रेजिमेंटल सेंटर च उस्ताद रैह् थे। फरवरी 1942 सैह् हवलदार बणाई दित्ते गै थे। फिरी मई 1943 जो पीरू सिंह कंपनी हवलदार मेजर बणी गै थे। दूजी आलमी जंग दे खत्म होणे पर तिन्हां जो ब्रिटिश कामनवेल्थ ऑक्यूपेशन फ़ोर्स च सामल करी नै जापान भेजेया गिया था, जित्थू सैह् सितम्बर 1947 तिकर रैहे थे।  तिन्हां दे इक ते बाद इक प्रमोसन तिन्हां दे मेहनती, बहादुर कनै जिम्मेदार फौजी होणे दे सबूत थे।

दारा पहाड़ी पर डेल्टा कंपनी दा हमला 17/18 जुलाई 1948 दिया राती धरातें डिढ़ कि बजे सुरू होया था।  चढ़ाइया च गोहणे जो सिर्फ तिन्न फुट चौड़ी पगडंडी थी। इस रस्ते दे दूंहीं पास्सेयां बड़े डुग्घे खोळे थे। सिरे उप्पर दुस्मणा दे बंकर थे। सैह् सारा रस्ता दुस्मण दियां मीडियम मसीन गनां दिया मारा पर था। भारत दी फ़ौज जो उप्पर चढ़देयां दिक्खी दुस्मणा दियां मीडियम मसीन गनां अग्ग उगळना लगी पइयां थियां।  तिन्हां राजपूतां पर हैंड ग्रेनेडां दी झड़ी लगाई दित्ती थी। पहले अद्धे घण्टे च डेल्टा कंपनी दे 51 जुआन हताहत होई गै थे। इन्हां च किच्छ सहीद कनैं किच्छ जख्मी भी थे। कंपनी हवलदार मेजर पीरू सिंह अपणी डेल्टा कंपनी दिया मुहरलिया सेक्शना कन्नै थे।  दुस्मण दे खतरनाक फायर दिया बजह ते तिन्हां दिया सेक्शना दे अद्धे ते ज्यादा जुआन फट्टड़ होई चुक्केह्यो थे पर पीरू सिंह घबराए नीं थे। सैह् दुस्मण दिया पहलिया मीडियम मसीन गन पोस्टा बक्खी लपके जेह्ड़ी तिन्हां दे जुआनां पर अग्ग बरसा दी थी। दुस्मणा तिन्हा पर हैंड ग्रेनेड सट्टेया था। तिन्हां दे  कपड़े  कइयां जगहां ते फट्टी गै थे। बदन लोहूलुहान होई गिया पर सैह् रुके नीं थे।  तिन्हां 'राजा रामचंदर की जय' दा जैकारा लगाया था कनै अपणी स्टेनगन दा फायर करदे होए दुस्मणा दिया एम.एम.जी पोस्टा पर कुद्दी गै थे। दुस्मणा पर अपणी स्टेनगन दे बैनेट दे बार करी नै तिन्हां जो म्हेसा तांईं सुआई दित्ता था। चाणचक तिन्हां जो पता चलेया था कि सैह् तिसा घड़िया तित्थू किह्ले ही थे।  तिन्हा दे साथी या तां सहीद होई चुक्केह्यो थे या बुरी तरहां जख्मी होई गैयो थे।

तिन्हां जो पता था कि तिस वक़्त दुस्मणा दा सफाया करने दी जिम्मेदारी सिर्फ तिन्हां दे कंधेयां पर ही थी। तिन्हां दे जख्मां ते लोहुए दे फुआरे फुट्टा दे थे। दुस्मणा दी दूजी एम.एम.जी पोस्टा पर हमला करने तांईं सैह् मट्ठे-मट्ठे अग्गें बद्धे थे। तिसा घड़िया तिन्हां दा चेहरा भी दुस्मणा दे ग्रेनेड हमले कन्नै जख्मी होई गिया था कनै चेहरे ते खून बगणा लगेह्या था। मत्थे ते लोहू चुड़ी करी हाखीं च आई गिया था जिसते सुझणा तकरीबन बन्द होई गिया था। तिस टैमे तिकर तिन्हां ली स्टेन गना दियां गोळियां भी मुक्की चुक्किह्यां थियां। इतणा किछ होई जाणे पर भी पीरू सिंह होरां अपणा होंसला नीं छड्डेया था। दुस्मणा दिया खंदका ते सैह् कुरदे-कुरदे बाहर आए कनै इक हैंड ग्रेनेड अगलिया पोस्टा गास छुआळी दित्ता था। इसते बाद अप्पु भी पोस्टा च कुद्दी गै थे कनै दुस्मणा दे दो जुआन अपणे बैनेटा नै मारी दित्ते थे। जिंञा ही सी.एच.एम पीरू सिंह तीजे बंकरे पर हमला करने तांईं बाहर आए तिन्हां दे सिरे पर इक गोळी आई बज्जी थी। सैह् दुस्मणा दे बंकरे दे कनारे पर ढैंह्दे सुज्झे थे। चंद पलां परंत तरीइए बंकरे च इक बड्डा टल्हाका होया था। मतलब साफ था कि पीरू सिंह होरां दा खीरी हैंड ग्रेनेड भी अपणा कम्म करी गिया था। दारा पहाड़ी पर असां दा कब्जा होई चुक्केह्या था।  डुग्घेयां जख्मां ते बगदे लोहुयें अपणा असर दस्सेया था।  कंपनी हवलदार मेजर पीरू सिंह सहीद होई गै थे अपर तिन्हां अगले पाकिस्तानी ठकाणे पर कब्जा करने जो तियार अपणी बटालियन दी चार्ली कंपनी तांईं रस्ता साफ करी छड्डेया था।

एह् सारा मंजर चार्ली  कंपनी दे कमांडर पिच्छे ते अपणिया दूरबीणा कन्नै दिक्खा दे थे। पर सैह् चाही करी भी पीरू सिंह होरां दी मदद नीं करी सकदे थे। कैंह् कि तिन्हां दी कित्तियो गोळाबारी दुस्मणा कन्नै हत्थापाई करदे पीरू सिंह होरां जो भी लगी सकदी थी।

"तिन्हां अपणी बेमिसाल बहादुरी तांईं अपणिया जानी दी बाजी लगाई दित्ती पर तिन्हां अपणे बाकी साथियां तांईं किह्ले-हत्थ वाळी बहादुरी कनै ठण्डे होंसले दी इक नोखी मसाल पेस कित्ती। मातृभूमि दिया सेवा तांईं कुर्बानी देणे तांईं देस तिन्हां दा सुक्रगुजार है कनै असां दी प्रार्थना है कि एह् तुसां जो किच्छ सांति कनै तसल्ली दे।"  प्रधानमंत्री जवाहर लाल नेहरू होरां कंपनी हवलदार मेजर पीरू सिंह दी 75 साल उम्रा दिया अम्मा, श्रीमती तारावती जो लिक्खेया था।

कंपनी हवलदार मेजर पीरू सिंह जो सुरगवास होणे ते बाद बहादुरी दे सब्भते बड्डे इनाम परमवीर चक्र कन्नै नवाजेया गिया था।

― भगत राम मंडोत्रा