2. लांस नायक कर्म सिंह

लांस नायक कर्म सिंह

(जम्मू-कश्मीर, अक्टूबर 1948)

15 अगस्त 1947 जो अंग्रेजां ते अजादी मिल्ली थी। देस दा बंटवारा होई गिया था। फौज भी बंडोई गई थी। फौज दी उत्तरी कमांड पाकिस्तान च चली गई थी। इक नोंईं कमांड बणी थी जिसा दा नां था दिल्ली एंड ईस्ट पंजाब कमांड (डी ई पी कमांड) जेह्डी बाद च पच्छमी कमांड बणी थी। लेफ्टिनेंट जनरल सर डुड़ले रस्सेल, डी ई पी कमांड दे आर्मी कमांडर थे।  26 अक्तूबर 1947 दिया संझा लेफ्टिनेंट जनरल रस्सेल जो हुक्म मिळेया कि पाकिस्तानी हमलावरां ते जम्मु कशमीर दी फ्हाजत करने तांईं  27 अक्तूबर दिया भ्यागा फौज श्रीनगर भेजणी थी।  रस्सेल होरां जो सिक्ख रजिमेंट दी पहली बटालियन यनि कि 1 सिक्ख कनै तिन्हां दे कमांडिंग अफसर लेफ्टिनेंट कर्नल दीवान रंजीत राय दे उम्दा दर्जे दे होणे दी जाणकारी थी। तिस वक्त 1 सिक्ख गुड़गांव च तैनात थी।  जनरल रस्सेल होरां 1 सिक्ख जो हवाई रस्तें श्री नगर जाणे दा हुक्म दित्ता था। कर्नल दीवान रंजीत राय 27 अक्तूबर दिया भ्यागा श्रीनगर तांईं उड़ी गै थे। तिस दिनें अजाद भारत दी फौज पहली बरी जंग दे मैदान च उतरी थी। तिस दिया यादा च 27 अक्तूबर जो हर साल 'इन्फेंट्री ड़े' मनाया जांदा है।

कर्नल राय होरां श्रीनगर पोंह्चणे पर, अपणे तकरीबन 100 जुआन श्रीनगर हवाई अड्डे दी फ्हाजत तांईं छड्डे कनै अप्पू सौगी 200 जुआन लई करी बारामूला वक्खी कूच करी दित्ता था। तिस वक्त पाकिस्तानी हमलावर बारामूला दिया लुट्टा च मग्न थे। कर्नल राय होरां दे साह्मणे तकरीबन 4000 हमलावर थे।  हमलावरां दा भारी दबाव होंणे पर कर्नल राय होरां 28 अक्तूबर दे दोपहरां परंत पट्टन तिकर पिच्छे हटणे दा फैसला कित्ता था।  पट्टन श्रीनगर कनै बारामूला दे ठीक गभ्भें पोंदा है। कर्नल राय होरां अपणे जुआनां जो पिच्छें टाह्णे च कामयाव रैह् थे पर सैह् अप्पू अपणे खीरी दस्ते कन्नै पिच्छें हटदिया बारिया दुस्मण दी गोळी लगणे परंत सहीद होई गै थे।  लेफ्टिनेंट कर्नल दीवान रंजीत राय होरां अपणा कम्म पूरा करी नै ही गुजरे थे। तिन्हां चतराइया कन्नै भारत दियां फौजां जो श्रीनगर हवाई अड्डे च उतरनें तांईं वक्त कढेया था।  कर्नल राय होरां जो मरनेपरंत महावीर चक्र दित्तेया गिया था।

इसते ठीक इक साल परंत,  13 अक्टूबर 1948 दा धिआड़ा। जम्मू-कश्मीर च भारत कनै पाकिस्तान दी जंग जोरां पर थी। टिथवाल दे बाहरले इलाके च रिच्छमार गळी नांयें दी इक चौकी थी। इसा चौकिया पर सहीद कर्नल राय दी पलटन 1 सिक्ख दी अल्फा कम्पनी दे जुआन तैनात थे। सैह् जुआन  तैह्ड़ी  होरना दिनां ते ज्यादा चत्तन थे। बजह एह् थी कि तैह्ड़ी तिसा चौकिया पर भ्यागा दे झुळमुळे ते ही पाकिस्तानी बम्बारी होणा लगी थी पइयो। अपर एह् बम्बारी होरना दिनां ते किछ ज्यादा ही थी। चौकिया दा कमांडर तिसा बम्बारिया दा मतलब खूब जाणदा था। दुस्मण दा इक बड्डा हमला होणे वाळा था। 

भ्यागा दे साढ़े नो बजणा लगेह्यो थे। साह्मणे ते पाकिस्तानी हमला ओंदा सुज्झेया। कमांडरें इक नज़र अपणे तिन्न जुआनां बक्खी दित्ती कनै दूजी नज़र हमलावरां पर। हमलावर तकरीबन चाळी थे। तिसदे तिन्हों ही जुआन जख्मी थे। कमांडरे दी अपणी बर्दी भी खूनें नै लथपथ थी। तैह्ड़ी पहला हमला भ्यागा छे बजे होया था। दुस्मण अंधाधुंध गोळाबारी करा दा था। जाह्लू पाकिस्तानी तोपखाने दे गोळे अक्खे-वक्खे दे पत्थरां गास फटदे तां पत्थरां दियां उड़दियां छींगडां भी गोळियां बणी जांदियां थियां। तैह्ड़ी ईद थी। दुस्मण कुसी भी कीमता पर रिच्छमार गळी दिया चौकिया पर मुड़ी कब्जा जमाणा चांहदा था।  चौकिया दी कमाण लांस नायक कर्म सिंह दे जिम्में थी। एह् सैही कर्म सिंह थे जिन्हां जो दूजी आलमी जंग दे दौरान बर्मा दिया लड़ाइया च बहादुरिया तांईं मिलिट्री मैडल मिलेया था कनै लांस नायक बणाया गिया था।

कर्म सिंह दा जन्म 15 सितम्बर 1915 जो पंजाब दे बरनाला जिले दे सेहना गरांयें च इक खांदे-पींदे सिक्ख जट टब्बरे च होया था। कर्म सिंह बचपण ते ही बड़े सरारती थे। सैह् अपणे अम्मा-बापुये दे सब ते बड्डे पुत्र थे।  उन्हां दे बापू उत्तम सिंह  होरां अपणे पुत्रे जो स्कूल भेजणे दी बड़ी कोस्त कित्ती पर कर्म सिंह पढ़े नीं। बापू अपणे पुत्रे जो इक पढेया-लिक्खेया चतर जमींदार बणाणा चांहदे थे। कर्म सिंह जो कबड्डी खेलणे कनै पहलवानी करने दा शौक़ था। सैह् पोल वाल्ट कनै हाई जम्प च भी माहिर थे।  कर्म सिंह दा खेलां वक्खी झुकाव दिक्खी तिन्हां दे मामा होरां, जेह्डे फौजा च खुद जूनियर कमीशन्ड अफसर थे, तिन्हां जो फौजा च भर्ती होणे दी सलाह दित्ती थी।

कर्म सिंह 15 सितम्बर 1941 जो 26 सालां दिया उमरा बिच सिक्ख रेजिमेंट दी पहली बटालियन च दाखिल होई गै थे। दूजी आलमी जंग च बर्मा दी लड़ाईया च अपणी बहादुरी दस्सी थी। मैडल, रैंक कनै  मसहूरी पाई थी।

पाकिस्तानी हमलावरां टिथवाल कनै होर अक्खे-वक्खे दे गरां पर अपणा कब्जा करी लिया था। कुपवाड़ा सेक्टर च सरहदा पर बसेया एह् टिथवाल गरां फौजी नज़रिए कनै बड़ा अहम था। 28 मई 1948 जो भारत दियां फौजां एह् गरां पाकिस्तान ते वापस लई लिया था। पाकिस्तानी हमलावर इसा जगहा पर कब्जा करने तांईं बार-बार कोस्त करदे रैह् थे। टिथवाल दी लड़ाई कई महीनेयां तिकर चलदी रही थी। पाकिस्तानी फौज दा मकसद टिथवाल दे दच्छणे च रिच्छमार गळी कनै पूर्व च नस्ताचूर दर्रे पर कब्जा करी ने श्रीनगर दे पासें अग्गें बद्धणा था।

तिस दिन रिछमार गली दिया चौकिया पर हिन्दोस्तानी फौज दे चार सिक्ख जुआन खतरनाक गोळाबारी दे बिच तकरीबन चाळी पाकिस्तानियां दे हमले दा साह्मणा करने तांईं चक्कनें होई बैठेयो थे। कर्म सिंह लम्मे-झम्मे बांके जुआन, उपरा पासें गोळ मरोडियां मुच्छां, काळी दाह्ड़ी, लिसकदा चेहरा अपणे साथियां बक्खें खडोई नै दुस्मण दे दूजे हमले दा जवाब देणे दी तरकीब सोचा दे थे। ताह्लू इक जुआन बोलेया था, 'उस्ताद दुस्मण बहोत नेड़े आ गिया, असीं की करना है, हुक्म देओ'। कर्म सिंह होरां जुआने दिया गल्ला दा कोई जवाब नीं दित्ता था। सैह् अग्गें ओंदे पकिस्तानियां पर नज़र रक्खी किछ सोचदे रैह् थे। सैह् चारेह्यो पहलें ही दुश्मण दिया गोळाबारिया हेठ थे। जख्मी भी थे। कर्म सिंह होरां अपणेयां हत्थां च पकडियो .303 रैफळा वक्खी नज़र दित्ती। रैफळ चलाणे दा कोई खास फायदा नीं था किंञा कि दुस्मणा दी नफरी बहोत ज्यादा थी। तिन्हां ली गोळियां भी घट थियां।  दुस्मण दा तोपखाना बड़ी घणी गोळाबारी करा दा था इस करी नै पिच्छे ते गोळाबारूद ओणे दी कोई आस भी नीं थी। कम्पनी हैड़कुआटर काफी पिच्छें था। तिन्हां हलातां च पिच्छे ते मदद दा कोई सुआल ही पैदा नीं था होंदा।

कर्म सिंह होरां अपणे पिट्ठु झोळे च सज्जा हत्थ पाई नै इक एच.ई. 36 हैंड ग्रनेड कड्ढ़ेया था। खब्बे हत्थे दे गूंट्ठे कनै सेफ्टी पिन नकाळेया था। सज्जी बांह सिद्धी करी घुमाई नै ग्रनेड अग्गें बद्धदे दुस्मणा वक्खी छुआळी दित्ता कनै जोरे नै 'जो बोले सो निहाल, सत श्री अकाल' दा जैकारा लगाया था।  पीड़ा दा चणाका बांही ते निकळी जख्मी जंघा ते होंदा होया पैरां तिकर चला गिया पर तिन्हां छुआळेयो ग्रनेडे दे अपणी नज़र नीं टाह्ई थी। ग्रनेड अग्गें बद्धदे दुस्मणा दिया अगलिया कतारा पर जाई पड़केया था। कई पाकिस्तानी मारे गै कनै कई जख्मी होई पीडा नै डड़़णा लगी पै थे। तिन्हां च नह्ठ-भज्ज पई गई थी। कर्म सिंह होरां अपणे सख्त चेहरे पर मुस्कान लाई नै अपणे साथियां बक्खी नज़र दित्ती थी। जुआन नटट् होई करी दिक्खा दे थे। सैह् अपणे चेहरे जो सख्त करदे बोले थे, "जदों असीं इत्थे जान दे दियांगे तां साडी कीमत बद्ध जाबेगी। साड़े पिच्छे भतेरे ने लड़ण वाळे, सारी कम्पनी साड़े पिच्छे है"। ये बोली करी कर्म सिंह होरां अपणा पिट्ठू-झोळा दूजे ग्रेनेडे तांईं थळोपेया था। सेफ्टी पिन निकाळेया कनै ग्रेनेडे जो अग्गें बद्धदेयां बचेयां पाकिस्तानियां पर छुआळी दित्ता था। इक बड्डा धमाका होया था। धूं कनै धूड़ हौआ च छाई गै थे।

हमलावर पकिस्तानियां दियां लहरां पर लहरां ओंदियां गइयां थियां पर लांस नायक कर्म सिंह कनै तिन्हां दे जुआना चौकी नीं छड्डी थी। कर्म सिंह होरां बड़ी चतराइया कन्नै हैंड ग्रनेडां दा इस्तेमाल कित्तेया था। पाकिस्तानी फौजा दियां दो सेक्सना दिक्खदेयां-दिक्खदेयां ढेर होई गइयां थियां। कर्म सिंह होरां दी हिम्मत, बहादुरी कनै चौकिया जो नीं छड़णे दी जिद्द दा कोई जवाब नीं था। दुस्मणा दे उस दिनें दे दो हमले रोकणे दा सेहरा बन्हणे दे इक मात्र हक़दार लांस नायक कर्म सिंह ही थे।

दूजे पाकिस्तानी हमले जो नाकाम करने ते बाद कर्म सिंह होरां जो लगेया था कि चौकिया पर ज्यादा देर तिकर अपणा कब्जा बणाई रखणा मुमकिण नीं था। इक तां दुस्मणा दी गिणती ज्यादा थी। दूजा अपणे जुआन जख्मी थे। तीजा एम्युनिशन घट था। चौथा दुस्मण दी गोलाबारी बड़ी घमसाण होआ दी थी। आखिरकार तिन्हा अपणी कम्पणी दी मेन पोजीशन पर जाणे दा फैसला करी लिया था पर अपणे दो बुरी तरह जख्मी साथियों जो भी पिच्छें सौगी लई जाणे दी ठाणी लई थी। तिन्हा अपणे तरिइये साथिये, जेह्ड़ा घट जख्मी था, दिया मददा कनै दूहीं जख्मियां जो अपणी जाना दी परुआह कित्ते बगैर अल्फा कम्पणी दी मेन पोजिसन दियां खंदकां तिकर पजाया था।

दस बजे दे  करीब दुस्मण दा होर हमला होया था। इसा बारिया दा हमला कम्पणी दी मेन पोजिसना पर था। अपणे जख्मा दी परुआह नीं करदे होयां कर्म सिंह कम्पणी दे साह्मणे वाले मोर्चेयां ते लड़दे रैह् थे। दुस्मण दिया घमसाण गोलाबारिया कन्नै कम्पणी दे सारे बंकर तबाह होई गै थे। कर्म सिंह इक खन्दका ते दूजिया खन्दका तिकर जाई करी जुआना दा होंसला बधांदे रैह् थे कनै जख्मियां जो मरहम पट्टी करने तांईं पिच्छें भेजदे रैह् थे। बार-बार होंदेयां हमलेयां दे बाबजूद तिन्हां जुआना दा होंसला डिगणा नीं दित्ता था।

अगले हमले च लांस नायक कर्म सिंह फिरी जख्मी होए थे पर तिन्हां अपणी हिम्मत नीं हारी थी। कम्पणी दे जुआना दी घटदी गिणतिया दे बाबजूद बहादुरिया नै दुस्मण दा साह्मणा करदे रैह् थे। तैह्डी दोपहरां जो इक बजे पञ्जुआं हमला होया था। भ्यागा दे छे बजे ते तिन्हां जो हमलेयां ते रती भी बारी नीं मिलिह्यो थी। सैह् थकी गैयो थे। जख्मा ते लोहू रिसा दा था। तिन्हां पीड़ा नै अपणे दंद जिक्की नै ग्रनेडां दे धुंयें दिया आड़ा च अप्पु बक्खी अग्गें बद्धदे दो पकिस्तानियां पर अपणी रैफळ ताणी थी। दुस्मण इतणे नेडें आई गेह्यो थे कि कर्म सिंह होरां तिन्हा पर फैर करना ठीक नीं समझेया था। आह्मणे-साह्मणे दिया लड़ाइया च गोळी चलाणे ते अपणे जुआना दा नुकसान भी होई सकदा था।  कर्म सिंह होरां फुर्तिया नें अपणिया रैफळा पर बैनेट चढ़ाया कनै कुद्दी करी मोर्चे ते बाहर आई गै थे। जंग दा जैकारा लगाई करी अगले दुश्मणे दिया छातिया च बैनेट घोपी दित्ता था। इसते पहलें कि दुश्मणे जो पता लगदा की क्या होया तिन्हा दूजी बरी बैनेट घोपी ता था। दूजा पाकिस्तानी तिन्हां पर फैर करने वाळा ही था कि तिन्हां तिस दे पेटे च भी बैनेट दा वार करी दित्तेया था। सैह् पिच्छे जो नह्ठेया पर कर्म सिंह होरां दूजा वार करी नै तिस जो भी गिराइता था। लांस नायक कर्म सिंह दे डरौणे रूपे दिक्खी दुस्मण घबराई करी इसा बारिया भी पिच्छें हटी गै।

पाकिस्तानी हमले बन्द नीं होये। संझा सत बजे कर्म सिंह दिया कम्पणिया गास अट्ठुआं हमला होया। सिक्खां हिम्मता कन्नै मुकाबला करी नै सैह्  हमला भी नाकाम करी ता था। एह् खीरी हमला था।  इस दे परंत  पाकिस्तानियां अपणी हिम्मत हारी ती थी। तैह्ड़ी पाकिस्तानियां तकरीबन 3000 गोले दाग्गे थे। अल्फा कम्पणी दे बंकर धूड़ी नै मिलाई दित्ते थे पर जुआनां दे होंसले नीं टुट्टे थे। 1 सिक्ख दे दस जुआन शहीद होए थे कनै सैंती जख्मी। लांस नायक कर्म सिंह, एम एम (मिलटरी मैडल) होरां अपणिया पलटणा दे जंग दे इतिहास च अपणा नां अमर करी दित्ता था। तिन्हां जो डियूटी दी लग्न कनै अणथोही बहादुरी तांईं भारत सरकारें परमवीर चक्र दित्ता था। सैह् पहले फौजी थे जिन्हां जो जींदेयां जी परमवीर चक्र मिलेया था।

कर्म सिंह होरां ऑनरेरी कप्तान दे रैंक ते फौजा ते रटैर होए थे। तिन्हां दा व्याह 1955 दे अक्खे-वक्खें गुरदयाल कौर कन्नै होया था। दो बच्चे होए थे इक पुत्र कनै इक धी। सैह् 77 सालां दिया उमरा च 1993 च अपणे गरायें च चैने कन्नै सुरगवास होए थे।

― भगत राम मंडोत्रा