3. सेकंड लेफ्टिनेंट रामा राघोबा राणे

सेकंड लेफ्टिनेंट रामा राघोबा राणे

(जम्मू-कश्मीर, अप्रैल 1948)

बॉम्बे इंजीनियर ग्रुप सेंटर पुणे च 1 फरवरी 2020 जो 200 साल पूरे होणे दा जस्न बड़े बाजे-गाजे नै मनौआ दा था। इसा परेड़ा दी सलामी लैणा सेनाध्यक्ष जनरल मनोज मुकुंद नरवणे भी आयो थे।जाह्लू श्रीमती राजेश्वरी राणे होरां तिन्हा जो अपणे 'साहिब' दे तमगे भेंट कित्ते, सारेयां दियां हाखीं च सेदळ थी कनै हिक्कां फक्रे कनै फुलियां थियां। श्रीमती राजेश्वरी राणे होरां बॉम्बे इंजीनियर ग्रुप जो म्हेसा अपणा परुआर समझेया। तिन्हां 84 साल दी उम्र च अपणे 'साहिब' दे तमगे अपणे परुआरे जो संभाळी दित्ते ताकि बॉम्बे सैपरज दी औणे वाळी पीढियां जो तिन्हां ते सबक मिलदा रैहे। इन्हां तमगेयां च श्रीमती राजेश्वरी राणे दे 'साहिब' होरां दा परमवीर चक्र भी सामिल था। हाँ, श्रीमती राणे अपणे घरेवाळे जो म्हेसा 'साहिब' करी नै ही बुलांदे रैह्। तिन्हां दे 'साहिब' थे मेजर रामा राघोबा राणे।

श्रीमती राजेश्वरी राणे (फ़ोटो साभार TOI)

सन 1947 दे अक्टूबर महीने दी गल्ल है। भारत जो अंग्रेजां ते अजादिया मिलिह्या जो अज्झें मते दिन नीं थे होयो। पाकिस्तानी फौजां कबाइलियां कन्नै रळी-मिळी जम्मू-कश्मीरे पर हमला करी दित्ता था।  इत पासें भारत दियां फौजां जो जाह्लू तिकर जंग च उतरने दा हुक्म मिल्लेया ताह्लुए तिकर दुस्मण काफी गांह् बद्धी आयो थे। खूब मुठभेडां होइयां थियां। तगड़ी जंग होई थी। अजाद भारत दी फौजां दी एह् पहली जंग थी। असां दियां फौजां अग्गें बद्धियां थियां पर कईयां ठाहरीं तिन्हां जो पिच्छें भी हटणा पिया था। लड़ाई चलदी रही थी। 1948 दा मार्च महीना आई लग्गा था।  राजौरी दा इलाका दुस्मणा दे कब्जे च चली गिया था। अपणे कब्जे वाळे इलाक़ेयां च दुस्मणा लोकां जो बेरहमिया नें लुट्टेया। बड़े भारी जुल्म ढाए। मते लोक लोहू-लुहान कित्ते। मतियां जानीं गइयां। सैंकडेयां दे हिसावें जणासां जो अपणी आबरू बचाणे तांईं ज़हर खाणा पिया।

भारत दी फ़ौजा दा मकसद राजौरी जो  मुड़ी अपणे कब्जे च लैणा था।  नौशेरा ते राजौरी तकरीबन 48 किलोमीटर उत्तरे बक्खी है। इन्हां जो जोड़ने वाळी मौसमी सड़क तवी दरिया दिया घाटिया च दूंहीं पासें घणे बणा कन्नै ढकोइयां धारां दे विच होंदी होई जांदी है। इन्हां धारां उप्पर जगहें-जगहें दुस्मणा दी फौज घात लगाई करी बैठियो थी।  नौशेरा ते राजौरी तिकर इस रस्ते दे तकरीबन गभ्भें चिंगास नांएं दी इक जगह पोंदी। इसा जगह च पाकिस्तानी फौजां इक मजबूत अड्डा बणाई लिया था। इस अड्डे दा इस्तेमाल दुस्मणा नौशेरा पर हमले करने तांईं करा दे थे।

असां दिया फौजा दी उन्नीसवीं इन्फैंट्री ब्रिगेड नौशेरा ते राजौरी वक्खी अग्गें बद्धणे दी कोस्त करा दी थी।  इस ब्रिगड़े च उस मौकें इक आर्म्ड रेजिमेंट (सेंट्रल इंडिया हॉर्स), डोगरा रेजिमेंट दी चौथी बटालियन, जाट रेजिमेंट दी दूजी बटालियन, राजपुताना राइफल्स दी दूजी बटालियन कनै तोपखाने दी इक-इक फील्ड कनै माउंटेन बैटरियां थियां। सौगी इंजीनियर रेजिमेंट दी सैंतीसवीं असाल्ट फील्ड  कम्पनी भी थी।

नौशेरा ते राजौरी तिकर 48 किलोमीटर रस्ता दुस्मणा मतियां ठाहरीं तोड़ी दित्तेया था कनै अणमुक रोकां पाई थियां छड्डियां। असां दिया फौजां कनै टैंकां जो तिस सुरगां भरे इलाके च अग्गें बद्धणा मुस्कल होआ दा था।

रस्ता बणाणे, रोकां कनै सुरगां टाह्णे कनै पुळ बह्नणे दी जिम्मेदारी फौज दियां इंजीनियर रेजीमेंटां दी होंदी है।  इस मुस्कल कनै जोखमा आले कम्में दी जिम्मेदारी दित्ती गई इंजीनियर रेजिमेंट दी सैंतीसवी असाल्ट फील्ड कम्पनी दे इक बहादुर कनै चतर अफसर सेकंड लेफ्टिनेंट रामा राघोबा राणे जो। राणे सौगी तिन्हां दे दो दर्जण सैपर थे। जिञा तोपखाने दे जुआनां जो 'गनर' या 'तोपची'  गलांदे, आर्म्ड रेजिमेंटां दे जुआनां जो 'सवार' बोलदे तिञा  इंजीनियर रेजिमेंटां दे जुआनां जो 'सैपर' करी नै बुलांदे हन।

8 अप्रैल 1948 जो भारत दियां फौजां अग्गें बद्धणा सुरू करी दित्ता।  जिञा असां दे जुआन नाड़पोर फ़ोर्ट इलाके दे नेड़ें पूज्जे, दुस्मणा 3 इंच मोर्टारां कन्नै हमला करी दित्ता। इक मोर्टार बम्ब, रस्ता बणादी इंजीनियरां दिया टुकड़िया गास आई फट्टेया। दो सैपर मारे गै कनै दो जख्मी होए। सेकंड लेफ्टिनेंट राणे भी जख्मी होई गै।  बम्ब दी इक कित्तर राणे दिया जंघा जो छिल्ली नै निकळी गईयो थी। तिन्हां पछ्हां हटणे जो नांह् करी दित्ती। 

उच्चियां जगहां पर लुक्की नै बैठेयो दुस्मणा दी नज़रां हेठ रस्ते च बिछाइयां सुरंगां कनै ढायां मोटे-मोटे रुक्खां दियां अड़चणा जो टाह्णा मुस्कल कम्म था। जाह्लू भी राणे अड़चणा जो टाह्णे दी कोस्त करदे दुस्मण गोलाबारी करना लगी पोंदा था।  इस बजह ते भारत दियां फौजां दा अग्गें बद्धणा रुकी गिया। राणे जो अंदाजा लगीय्या कि भई  छुप्पेयो दुस्मणा दी नज़र रस्ते पर थी कनै आम सिक्खे-सिखाए तरीके नै रस्ता बणाणा मुमकिण नीं था।  

सेकंड लेफ्टिनेंट राणे जो कुसी भी कीमता पर अपणिया फौजा जो अग्गें बद्धणे तांईं रस्ता बणाणे दी अड़ी लगी गई। सियाणे सच्च गलाई गैह्यो, 'जित्थु चाह ओत्थू राह'। तिन्हां चलदी चाल अपणी मरहम पट्टी कराई कनै टैंकां दे दस्ते दे कमांडरे व्ह्ली जाई नै रस्ता साफ करने दी अपणी नोंईं तरकीब दस्सी। टैंक कमांडर जो तरकीब खतरनाक कन्नै अटपटी लग्गी अपर होर कोई चारा था ही नीं, इस करी नै तिन्हां अपणी तरफा ते हामी भरी ती।

नोंईं तरकीब एह् थी कि सेकंड लेफ्टिनेंट राणे होळें-होळें चलदे मूहरले टैंके हेठ लेटी नें रस्ते च रगडोंदे चलण कनै जमींना च दबोहियां सुरगां जो तोपी नै बेकार करदे जाह्ण। टैंक ड्राइवरे जो चलणे या रुकणे दा इसारा देणे तांईं दो रस्सियां बन्हीं दित्तियां गइयां। राणे जो जाह्लू धरती च सुरंग होणे दा सक होंदा था तां सैह् सज्जे हत्थे दी रस्सी खिंजदे।  टैंक डरैवर टैंके जो रोकी दिंदा। राणे अपणे दूंहीं हत्थां दियां उंगळियां नै चिक्का जो ख़रोळदे, सुरंगा दा ढक्कण टांह्दे, फ्यूज़ निकाळदे फिरी ढक्कण लगाई दिंदे। इञा सुरंग बेअसर होई जांदी। सैह् किछ सकिंट तांईं अपणी हाखीं बन्द करी नें  चैने दा लम्मा साह लैंदे। फिरी खब्बे हत्थे दी रस्सी खिंजदे।  टैंक अग्गें चली पोंदा। राणे भी टैंके हेठ ज़मीना पर रगडोंदे अग्गें बद्धदे चलदे अगलिया सुरंगा जो तलासणा।

सेकंड लेफ्टिनेंट रामा राघोबा राणे दी ये नोंईं जुगत बड़ी कारगर साबत होई। भारत दी फौजां दा अग्गें बद्धणा मुमकिण होई सक्केया। बारवाली रिज दे आमणे-सामणे आई करी अगले हमले तांईं बेस बणाणे दी कामयाबी मिल्ली। ये हमला डोगरा रेजिमेंट दी चौथी बटालियनें तोपखाने कनै टैंकां दिया मदता नै कित्ता था।  दुस्मणा जो बहोत सारा जानी नुकसान झलणा पिया। संझा दे चार बजदेयां-बजदेयां बारवाळी रिज च हिंदोस्तानी फौजां दा कब्जा होई गिया।  राणे दे सैपरां रिज दे थल्लें सड़का च पैह्यो इक बड्डे ल्हासे जो टाहणा सुरू कित्ता ही था कि दुस्मणा जवाबी हमला करी नै रिज दिया जमीना दा इक टुकड़ू फिरी अपने कब्जे च करी लिया। राणे जो रस्ता बणाणे दा कम्म रोकणा पिया। पर बहादुर डोगरेयां राती हमला करी ने दुस्मणे जो मुड़ी पिच्छें धकेली दिता। अगले दिन भ्यागा हिंदोस्तानी फौजां फिरी अग्गैं बद्धना शुरू करी ता। हर किलोमीटर पर कोई न कोई रुकावट सामणे ओंदी रही पर राणे होरां हिम्मत नीं हारी। राणे भुक्खे-प्यासे अपणे कम्में लगी रैह्। कोई न कोई जुगत लगाई नें औंणे वाळियां रुकावटां जो टांह्दे रैह्। 

10 अप्रैल 1948 दे दोपहरां जो हिंदोस्तानी फौज दे टैंक चिंगास च जाई धमके। ब्रिगेड कमांडर तौळेयां ते तौळे राजौरी जो अजाद करुआणा चांहदे थे।  राजौरी तिकर जल्दी टैंक लई जाणे दी इक मुस्कल कनै खतरनाक जुगत लगाई गई। सड़कें-सड़कें जाणे दे बजाय टैंकां जो इन्फैंट्री दी इक कंपणी सौगी तवी दरियाए दे कंढे-कंढे लई जाणे दा फैसला लिया गिया। सेकंड लेफ्टिनेंट राणे जो तिन्हां सौगी जाणे कनै तिन्हां तांईं रस्ता बणाणे दा जिम्मा दित्ता गिया। 11 अप्रैल 1948 दिया संझा टैंक कल्लर नांएं दी जगह जाई रैह्। 12 अप्रैल 1948 दिया भ्यागा राणे दिया मददा कनै टैंक फिरी अग्गें बद्धे। उस दिनें संझा साढ़े छे बजे हिंदोस्तानी फौज दे टैंक राजौरी च दाखिल होई गै। भारत दियां फौजां दे औणे दी खबर सुणी पाकिस्तानी हमलाबर राजौरी जो खाली करी नह्ठी गैयो थे पर नह्ठणे ते पैहलें तिन्हा राजौरी जो मुड़द घाट बणाई छड्डेया था। भारत दियां फौजां जो राजौरी ड़रौणी कनै सुन्नम-सुन्नी मिल्ली थी। 

राजौरी जो दुस्मण ते बापस लैणे तांईं भारत दिया फौजा दियां कोसतां च सेकंड लेफ्टिनेंट रामा राघोबा राणे दा बोहत बड्डा हत्थ रिहा था। ये इतणी मुुुुस्कल मुहिम तिन्हां दिया सूझबूझा कनै अणथक कोस्तां दिया बजह ते बड़े घट समै च कामयाव होई सकी। हिन्दोस्तानी फौजां दा जानी नुकसान दुस्मण दे मुकाबलें कई गुणा घट होया था। तिन्हां अपणा फ़र्ज़ निभांदिया बारिया अपणिया जानी दी रत्ती भी परुआह नीं कित्ती थी। इस कारनामे तांईं भारत सरकारें इंजीनियरां जो 'बैटल ऑनर राजौरी' दित्ता कनै सेकंड लेफ्टिनेंट रामा राघोबा राणे जो बहादुरी दा सबना ते बड्डा इनाम परमवीर चक्र मिल्या था।

रामा राघोबा राणे दा जन्म 26 जून 1918 जो कर्नाटक दे कारवार च चेंदिया नां दे गरां च होया था। इन्हां दे बापू आर पी राणे कर्नाटक पुलिस च हैड कांस्टेबल थे। बापुये दी बार-बार बदळी होणे दी बजह ते इन्हां दी पढ़ाई जिला स्कूलां च होई। राणे बचपण ते ही खेलां कनै जोखम भरेयो कम्मां जो पसंद करदे थे।  सैह् जुलाई 1940 च 22 साल दी उम्रा च बॉम्बे सैपर्स च भर्ती होए। उस वक़्त दूजी आलमी जंग छिड़ी चुक्कियो थी। रंगरूटी सिखळाई दे दौरान राणे सारेयां ते अब्बल आए थे कनै तिन्हां जो सब्भते होणहार रंगरूट होणे तांईं इनाम भी मिलेया था। तिन्हां दूजी आलमी जंग च बर्मा च हेस्सा लिया था। सैह् अपणिया लियाकता कनै बहादुरिया दे बलबूते पर तौळे ही जूनियर कमीशन्ड अफसर बणे कनै फिरी कमीशन्ड अफसर बणी गै थे।

राणे होरां सिर्फ जम्मू कनै कश्मीर च ही बहादुरी नीं दस्सी थी, तिन्हां दूजी आलमी जंग दे दौरान मीडियम मशीन गन कनै इक जपानी हवाई जहाज मारी टराया था। तिन्हां जो 21 साल दिया फौजी नौकरिया च बहादुरी कनै लग्न कन्नै कम्म करने तांईं पंज बरी 'मैन्शन इन डिस्पैचज' मिल्लेया था। 

तिन्हां दिया जिंदगिया दे बारे च होर भी मते दसणे लाइक रोचक किस्से हन। इक बरी कश्मीर च इक कुड़ी खुह्ए च पई गई। राणे होरां अपणिया जानीं दी परुआह कित्ते बगैर खुह्ए च छाळ मारी नै कुड़िया जो सही सलामत बाहर कड्ढ़ी लई आए थे। सन् 1962 च बंगाल च हिन्दू मुस्लिम दंगेयां दे टैमें राणे कलकत्तें तैनात थे। सैह् बिना डरे दंगाइयां जो रोकणे दा कम्म करदे रैह् थे। इक बरी सैह् अपणिया घरेबाळिया कनै पुणे दे इक सिनेमा हाल च फिल्म दिखणा गियो थे। तित्थू सिनेमा हाल ते बाहर भीड़ा च लोक अप्पु च लड़ना लगी पै थे। अच्छा-खासा दंगा होई गिया था। राणे होरां अपणी फहाजत दी परुआह कित्ते बगैर भीड़ा च कुदी पै थे कनै सारेयां जो सांत करी दित्ता था।

राणे अगस्त 1950 तिकर 37 फील्ड कंपनी कन्नै जुड़ेह्यो रैह् थे। इसदे बाद तिन्हां जो बॉम्बे इंजीनियर ग्रुप सेंटर च भेजया गिया था। अप्रैल 1948 दिया नोखी सूझबूझ कनैं बहादुरिया तांईं राणे होरां जो  सन् 1951 च परमवीर चक्र मिल्लेया था। तिन्हां जो कश्मीर च महाप्रभु मेले दे दौरान दिल लगाई करी कम्म करने तांईं जुलाई 1954 च सेना प्रमुख दा प्रसंसा पत्र भी मिल्लेया था। तिन्हां इक बम डिस्पोजल पलाटून दी कमांड दी जिम्मेदारी भी बखूबी संभाळी थी। सैह्  25 जून 1968 च मेजर रैंक ते रटैर होए थे।

राणे होरां दा ब्याह 3 फरबरी 1955 जो लीला कन्नै होया था। वियाहे ते परंत लीला दा नां श्रीमती राजेश्वरी राणे होया था।  रामा राघोबा राणे होरां दी लीला कन्नै कुड़माईया दे टैमे दी गल्ल है।  जाहलू राणे होरां दा रिस्ता लीला दे अम्मा बापुए ब्ह्ली गिया तां सैह् रिस्ता मंजूर करने तांईं झिझका दे थे। तिन्हां सुणेह्या था कि जंग च राणे दी इक जंघ जख्मी होई गई थी। तिन्हां जो सक था कि कुहत्की  तिन्हां दिया जंघा च फर्क नीं पई गिया होए।  राणे होरां जो इसा गल्ला दा पता चलेया तां तिन्हां अपणे होणे वाळे सस्स कनै सोहरे सामणे इक्की खुए जो छाळ मारी नै पार टप्पी करी अपणियां दूंहीं जघां दे ठीक होणे दा सबूत दित्तेया था।

मेजर रामा राघोबा राणे उन्हां चंद भागां बाळे जोद्धेयां च सामल थे जिन्हां जींदे जी परमवीर चक्र पहनेया। रटैरमेंट ते बाद सैह् पुणे च जाई बसे थे। अंत बिच 11 जुलाई 1994 जो ये परमवीर इसा दुनिया ते विदा होई गै थे।

—भगत राम मंडोत्रा